從圖書館借回來後，聽得真心感動，
推薦大家，詩集中同名的那首詩：
－－－－－－－－－－－－－－－－－－－－－
夭壽靜的春天 林沉默
四月燒風，
炊過彼欉老粿仔樹。
巴拉松的空罐仔，
佇風中唱歌...
今年春天，
稻仔無病蟲，
柳丁、檨仔早弄花，
可惜找無蜜蜂做媒人。
四界看無水雞影、
聽無斑鴿咕咕咕的聲。
蝶仔、金龜、田嬰...
一隻一隻毋知飛去佗藏？
圳溝仔邊，
鯽仔、溪哥魚，
無緣無故翻了白肚。
一葩葩福壽螺的卵，
沿著水路湠開紅色恐怖。
穀雨，
無雲無雨。
發袂出雜草的田岸，
有揹噴霧器的老人，
隱痀、喘嗽巡過。
這是一个夭壽靜的春天。
巴拉松的空罐仔，
佇風中唱歌...
──2011年8月31日中國時報 人間副刊
