2002年植物園e 蓮花，開kah特別sui ，7 月e 中晝，我坐 ti水邊，欣賞出水 e 花蕊，時間那親像tng 去 20 年前，我看著濁水中學坐 ti 蓮花池邊theng候花開e 查某gin a 。
1 路行來，坎坎 khek-khek ，竟 ma 已經 20 冬，其中 e 艱苦干單家己知影，chim-a 我有「輕舟已過萬重山」hit 種快樂。
成長e過程中，從來m-bat 停止對生命 e giau 疑，m 相信生命是無答案e演算，m相信人生干單考試、考試、讀冊、讀冊，iu-koh 想無人生有啥 mih 意義，ti 功課壓 kah 我無法度喘氣 e 日子，我看無人生e 希望。我感覺家己是「希臘」神話內面hit--e 無暝無日 leh sak 石頭上山，石頭隨擱 lak--落-去，擱愛 teng sak e「 薛佛西斯」。
過去經歷痛苦e 勇氣，變作我人生 e 資產，我明白幸福 be 白白 ui 天頂 lak 落來，人會凍憑家己 e 意志 kap 拍拚，選擇 kap 創造家己 e 人生。
1-e 熱--人 e 中晝，我tng 去我 e 母校濁水中學，四界 lau-lau--leh ，校園 tak- ui 攏有我 e kha-jiah ，我無快樂 e 中學生活，to 是 ti 這 e 美麗 e 校園度過e 。hit 陣，我唯一e 快樂是黃昏 e 時，倒 ti 運動埕 e 草 a埔，看天頂e雲泅來泅去，作各種 e變幻。 Chim-a 校園 ke 真 che 「雄偉 e 建築」kap 美麗 e 景致。
我問家己 khah 輸青春若會凍重來，是 m 是願意 tng 去中學時代？答案是千萬e m 願意，1 sut a 攏無 tiu-tu （躊躇），擱佳在人生無法度重來。
Tu 著校長，伊泡茶請我，茶米茶 tu-a 好.厚，話題 ma sio-lo ，有 1-e 話題雙方堅持家己 e看法，伊認為大家攏愛認真讀冊.考大學。
無 m 對，讀過大學 e 人，可能攏願意時間 ti 大學時代停睏，m-koh ，按呢 kam 就表示所有 e 人攏愛讀大學？
我認為是所有e 人攏期待 1-e 自由、開放、活潑，會凍獨立思考 e 學習環境。長久以來咱 e「精英教育」是 m 是行 ti 正確 e 路，干那看chim-a 奇奇怪怪 e 社會亂象，白 chhat 無廉恥 e 滿四界…就知影--a 。若 gin-a 連笑起來攏無快樂 e 時，我 m知咱社會 e希望 ti 叨位？
1 大堆考試，推 sak gin-a 向前行，過關斬將，甚至是 ka 別人 lap ti 腳底，頭賞 e phok-a 聲催 lo ，In 學會曉『物競天擇』『唯我獨尊』e 驕傲 kap 自大，若考無好e ，be 輸 ui 天頂 poah 落來。『揠苗助長』最後是 kui-e 園攏拋荒 。
Ti 高職教冊 hit 2 年，看著真濟失去自信 e gin-a ，甚至是自暴自棄、偷走書、相拍、ka車、離家出走…，in e 心悶 kap 鬱卒有啥人了解？無論你 hoah joa 大聲，講 kui pai ：「天生我材必有用」、「 tak-e 人 攏是天地間獨一無二 ë 」，受傷 e心 kam hiah-ni 簡單復原？我深深同情 chia-e 無辜 e gin-a 。
校長用伊誠懇、堅定 e 口氣講：「若 m是 hit 陣你有讀大學，今仔日kam 有 hiah-ni 深 e 看法 kap 感受？」
我無想 beh 擱講啥，有 1 種悲傷 ui 心底bun 出--來。
人siong 大 e 悲哀是經過別人授權，chiah 肯定家己 e價值。
通過大學聯考e 我，na 經過火燒 koh 重生 e 鳳皇，人對我負面 e 看法攏完全消失，我得著從來 m-bat 有e 解脫 kap 釋放，ti 放榜 hit 1 工。
干單我家己知影，我猶原是原來 e 我，生命 e 本質無任何改變，有善良、溫暖 、體貼、包容e 心房，改變e 是別人對我 e 看法。
若講今仔日有啥 mih 成就，是我有家己 e 身世、經驗、kap 對生命、土地 e 關懷 kap 堅持，m 是因為我e學識、 財富 iah 是社會地位。
按呢咱 chiah 會凍了解，咱會凍是快樂 e 作田人、愛心看顧病人 e 護士、熱心服務 e 運將 、乎大家歡歡喜喜 e 店員…，咱會凍是人無看上目 e 菅芒花、會凍是生 ti 山 kham e 鼓吹花、市場 hoah 價 e 玫瑰花…，家己開家己 sui ，展現多采多姿生命 e 光彩。
有內涵 e 生命 siong sui ，ti 安安靜靜 e 中晝，我聽著花開 e 聲…。
