原作者:花蓮門諾病院 黃勝雄院長
經作者同意改作台文
我tak 工透早出門，oaN oaN chiah tng--來。我是醫學院神經外科e 副教授，是真chê 同僚醫生中上受人歡迎e 腦外科醫生，ti 美國，一般人攏真khiau .真現實，in 會問講若有護士抑是醫生需要腦神經外科醫生e時chun，會去chhoe siang，in ka 這款醫生叫做“Doctor's doctor”。我就是真che 醫生e腦神經外科醫生，所以我e病人上濟，1年365天，要開360個病例，加上tak 工看門診、toa 院e 病人，tak 年至少有5000人次，按呢就知影我有joa 無閑。
有時半暝3更tng 去厝.路--nih，我會想著我hit 2個古錐e gin-a，m 知in有乖--無？Ti 學校有啥mih 問題--無？我e 心內感覺真虧--欠in，chhoe be 出時間應in e 要求做夥去kong 野球、騎馬抑是釣魚a。
我干單會凍安慰家己講，我已經替in 買4甲地e厝園，in 會凍 chhoa 朋友來厝--nih sng、會使露營、會使泅水、會使 peh 樹a 挽花。Kap 我細漢比--起-來好太濟--leh。而且我beh 替in khiam 錢，乎 in 讀上好e學校，乎in 有大學kap 研究所e 教育基金；我beh 為in 每1個人設立1個信託基金，乎 in 後pai 有創業基金；我ma beh 替年老退休e 阿爸設1個基金，伊就免tak個月ka gin-a 提錢，我beh……。
有1個禮拜日，阮 kui 家伙a 去做禮拜，送in tng--去了後，我就隨擱去病院巡病房。Ti 駛車去病院e 路--nih，我感覺胸坎chat-chat 疼疼，一直到病院急診處門口，擱 iau-boe 好--去。我請急診科e 駐院醫師替我做1個心電圖，結果真正常，tu 好有1個心臟科專家來，就請教伊 e 意見，伊看我e 心電圖kap 病例，聽我e 心跳，判斷叫我toa 院。伊e理由是：kui 個病院、社區be-sai 冒險失去像我chiah-nih 好e 神經外科醫生。
結果我toa 入去心臟加護病房3天3暝，in 為我做1套完整差不多愛10萬美金e檢查，檢查結果我並無『心肌梗塞』抑是『冠狀動脈硬化』。第4工chai 起，我ui 加護病房出院就去開刀房ka 人手術。
m-koh 我e 人生觀有真大e改變。因為toa 院期間我看真濟冊，其中1篇是俄國文學家托爾斯泰e 短文，故事是：有1個作sit 人，tak工透早出門，oaN oaN tng--去，種1 khu 惡質e 土地，伊拍拚做khang-khoe，連中晝時a ma 無hioh 睏食晝，日頭beh 落山e 時，定定吐大khui 感嘆時間siuN 短，嘴--nih seh-seh 唸講：「我一定愛 tun 5穀，預防萬一」。
有1個天使聽--著，感覺hit 個作sit 人真可憐，就去伊e 身軀邊ka講：「你真拚勢，對序大有孝，對序 細有愛心，做人古意，上帝beh 賞賜你土地，乎你富足。今a 日，ui chia 做起點，你拚勢走，等你seh 1 lian tng 來原點e 時，我會將箍--起-來e 土地送--你，乎你飽足。」
Hit 個作sit 人聽著chiok 歡喜--e，隨開始走，無chah 水，干單向前走。過半點鐘，越頭看：「啊！這塊土地有夠我食kui 世人--a！」I 想beh 停--落-來，m-koh 想著這是千載難逢e 機會，我應該為我e 子兒擱走1段路，乎 in 有淡薄仔財產，伊擱走1點鐘，汗 chham-chham 滴，thiam 擱嘴乾。伊越頭看，離起點已經真遠--a，伊想講無定著應該翻頭--a。伊想著伊e 兄弟姊妹，擱向前走1段。伊e 胸坎開始感覺chat-chat，頭殼sio-khoa gong -gong。伊想講：「唉！我年紀大--a，身體無親像卡早hiah-nih 好，我退休了後beh 按怎？我應該擱走-1-下。」這個時陣，伊頭hin 目暗，擋be 條，soah phak 落去塗kha，無joa 久就死--去-a，連tng 去原點e機會攏無。當然，啥mih 土地攏無得--著。
故事e 精神是講：人若siuN貪心，最後啥mih ma 得be 著。從此以後，我改變我e 人生觀，我開始回轉，無應該像hit 個作sit 人kang 款貪心.不知足。
我tak 年撥1個月hioh 假做義工，做短期e 醫療宣教師，去醫療落伍e 國家服務抑是教學，ma 拍算55歲到65歲獻乎主用。這段期間我tu 著真濟朋友kap 前輩，ma學習著服侍人e 趣味。
1985年teh 拜訪Sister Mother Theresa e 時，學習著勤儉e 真理，伊 ka 我講：「Live Simple, so thousands of others can simply live.」咱若生活勤儉簡單，chhun e 資源會凍供應千千萬萬散赤人活--落-去。
1986年我去門諾病院做1個月義工，kap 前院長Dr.Brown 鬥陣，有1工伊請阮翁仔某去in tau 食暗頓，我發現Mrs. Brown e手cheng 頭a. 因為花蓮e 濕氣重tai 風濕症，腦幹微血管破裂出血……。In 猶原繼續留ti 交通無利便、醫療無發達e後山，為台灣人奉獻將近40年e 時間，乎我這個台灣人感激擱見笑。
1990年Mrs. Brown 院長退休tng 去米國，退休了後連toa e所在攏無，這種無我無私、捨己為人e 腹腸乎我佩服萬分。
1991年伊 ti L.A. 接受台美基金會台灣奉獻獎e 時講：「我為台灣奉獻我e 一生，我ng 望台灣人，特別是台灣e 醫生，ma 會凍像我kang 款為家己e同胞，尤其是為上需要照顧e 花蓮人服務，真可惜！台灣e 醫生na像感覺花蓮真遠，米國卡近，無人beh 去花蓮，顛倒真濟人來米國。」
伊e 話na 針chhak 入我e 心肝iN-a，be輸leh 對我講kang 款，ma 進1步ka 我giu tng 來我e 原點－－台灣。
1993年年底，我tng 來接Mrs. Brown 院長e 使命－－服侍上細漢兄弟當中e 1位，就是服侍上帝；為原住民、為地區偏遠交通無利便e 人服務。另外1個料想be 著e 快樂是：我會凍 ti 台灣頭殼外傷頻率thong koan、死亡率thong koan e花蓮地區，運用我e 專長－－腦神經外科。
天使無應允我土地，m-koh 伊賜乎我平安、豐富e生命，乎我康健、快樂。
親愛e 朋友！咱攏是跨世紀e現代人，咱攏一直向前走。你有想--過：「啥mih 時陣，咱應該越 tng 來原點？」
文章定位：
