日頭e5光，chhio7 ti7 Grace e5身軀，白色lam7米黃色e5毛，光iaN7iaN7。不sam2時，有生份e5人停落來注神看伊，o-lo2 伊生作真sui2。對狗有淡薄a2了解e5人，看伊活潑、好奇e5模樣，攏ioh伊是狗a2 kiaN2，事實上伊tih-beh滿1歲。Chit-ma2 e5 Grace，歡喜過日子、幸福無底比。M7-koh半年前，伊m7是chit個形，伊有皮膚病，毛焦lian na2稻草，bai2 koh臭老，無人會ka7伊kap kou2-chui tau3作伙。伊是一隻拉不拉多lam7土狗e5流浪狗。
我敬佩hia e5為流浪狗奉獻e5人，m7-koh，我本身對狗無啥感覺。我是一個連「米格魯」kap「哈士奇」ma7分be7清楚e5人，對我來講，狗就是狗，m7管伊生作大隻細隻，圓e5 iah扁e5，攏kap我無關係。但是，一切攏因為Grace e5出現，完全無仝loh。Chit-ma2 e5我，逐工下班攏會緊趕轉去，因為Grace teh等我，轉去e5 頭項khang-khoe3就是沖狗尿、掃狗屎。阮歡喜做、甘願受，因為伊是阮e5寶貝。為什麼Grace會chiaN5作阮厝e5一份子？認真回想起來，冥冥中間，na2注好好e5。
Tu2-tioh8 Grace晉前e5 一禮拜，一個攏teh撿流浪狗e5阿蘭師姐kha3電話hou7我，問我是m7是願意照顧一隻hong5放sak e5「雪納瑞」，伊ka7叫作Rrinbow，大約三歳大，發現e5時，歸身軀全傷，長lo3-lo3 e5毛結歸咎，對人充滿敵意，可能hong5苦毒，經過in個goa7月e5照顧，Rrinbow變kah kou2-chui koh黏人，伊hou7 Rrinbow暫時住ti7寵物旅館。伊e-mail Rrinbow e5相片hou7我，希望我hou7 Rrinbow一個厝。現實環境e5問題，hou7我真躊躇。師姐講伊e5公寓已經飼6隻中大型狗，實在無空間a2。Hit暗，kap阮翁婿商量，伊勉强同意照顧一隻食素食e5狗，阮tioh8去ka7 Rrinbow mouh轉來，Rrinbow一看tioh8阮，主動跳來beh hou7阮抱，到厝了後耍歸暝。隔轉工阮去上班，心肝亂紛紛，m7知伊家己ti7厝有乖無？想be7到1轉去，厝邊就來投，講伊哀歸工，社區e5主委ma7來抗議，阮只好ka7 Rrinbow送轉去。Beh離開e5時，伊親像足m7甘e5，我ma7無奈何。
十月下旬，雨落be7soah，hit工總算出日頭，我kap平常仝款去教室巡學生食晝，經過25班e5教室，一陣gin2-a2圍ti7 1隻狗e5邊a2，土跤有gin2-a2好心提hou7伊食e5飯菜，伊連鼻芳一下ma7無，恬恬坐ti7壁邊。「老師，伊thai3攏m7食？」1個gin2-a2問我。In 10嘴9 kha-chhng teh會hit隻狗m7食e5原因。「我知影，伊傷心kah食be7落」，一個平常真孽e5 gin2-a2大聲講。伊講hit隻狗失去狗a2伴teh傷心，講有1隻kap伊生作1模1樣e5狗，m7知是in姐妹iah是in kiaN2，已經死去a2，chit-ma2 chhun伊孤1個。其他e5 gin2-a2 ma7 ka7贊聲，講in有看過hit隻狗。我hou7 in講e5故事感動tioh8，用理智e5口氣講：「伊應該是破病啦」。我看tioh8伊e5眼神充滿悲傷，緊oat8頭作我走，be7輸1個戰敗e5小卒a2走na2飛。心肝頭 ju5-chhang3-chhang3，我無法度坐leh好好a2食飯，伊絕望e5眼神hou7我e5心na2針teh刺、刀teh oe。卡輸講法老e5查某kiaN2若没ka7 khng3紅嬰a2摩西e5竹籃koaN7起來，世界就無《舊約全書》。對我來講，Grace tioh8 na2親像鉛桶內面e5紅嬰a2，我只要ka7鉛桶koaN7起來，伊tioh8脫離大水e5威脅，命運就會完全無仝款。
我徵求一個有飼狗經驗e5 gin2-a2 kap我作伙chhoa7伊去看醫生。醫生詳細檢查：中型身材，瘦koh薄板，身重10公斤，貧血、發燒，得tioh8肺炎，肝ma7腫腫。醫生報我看伊趴ti7手術檯e5身軀chhoah 1下chhoah一下，病毒已經侵入神經。醫生講盡力救看mai7，無掛保證醫會好。一工kan-na7住院e5費用tioh8愛九佰箍，我無時間躊躇，ma7無法度見死不救。醫生隨ka7伊注射，伊連tin2動e5氣力ma7無，據在射針tong7 ti7身軀。伊形容憔悴，m7知食goa7 che7苦楚。我看tioh8一個當teh受苦e5靈魂。
2008.06
文章定位：
