【泅水日記】2003.03.10＠星光.月光.日頭光

2003-03-11 16:15:04| 人氣240| 回應0 | 上一篇 | 下一篇

【泅水日記】2003.03.10

推薦 0 收藏 0 轉貼0 訂閱站台

連續3工，天氣攏真寒，「3月初，寒死少年家」，這句話提來新曆3月e今a日，擱ma有通，其實阮阿媽tiaN tiaN講e 是「春天後母面」，講春天天氣hoah變著變。我be 愛hit句話，感覺ka 後母e形象攏講bai 去。
M-koh，最近e天氣正港liam mi 寒. liam mi 熱，變天比piN面卡緊。

電話liang liang liang ，提醒我m通be記得去上泅水課，阿娘喂！氣象報告講合歡山kap 玉山攏teh 落雪，kam 通去泅水？真gau a taN，選這款日子開課！

外口teh 落雨呢！真想boai 去準煞，想講作人愛有信用，已經報名a，時到日到才講無愛去，對人真歹交待，擱講tak- e 若攏無去，ka 教練放粉鳥，kam m 是真淒慘？
Chhan chhan a 豆干切5角，雨幔幔咧出門去！

果然干單來3e 勇敢e 職員！m 是，是勇敢e 學員！哈！哈！哈！我是其中e1 e！

啥物溫水游泳池！阮攏寒kah phi-phi-chhoah ，教練先教阮『韻律』喘氣，浮ti 水面，腳坳彎、拍水、ti 水底khia 起來，叫阮練習m 通驚水。

時間1到，教練講真冷，伊beh 去浸溫泉。

阮3e ma 緊起來，1e有代誌先走，我去浸硫黃水，乎身軀卡燒熱咧，無goa久，阿玉ma ui 藥水池過來作伙浸硫黃水，阮chh¢n-chhai 講東講西互相熟悉，以後1月日阮攏作伙學泅水。

講kah 1半，我感覺淡薄仔熱熱，歹勢隨走，了後頭眩眩心肝頭喘喘，我起來坐ti 池a 邊，匈匈戇神去。

目睭擘金，看著幾若e人ka 我giu 咧，m 知發生啥物代誌，我e耳a chiau 水，in 牽我去沖冷水，提毯a 乎我moa ，捧溫e茶乎我飲，擱乎我2塊chalate，叫我坐ti 外口歇睏。

我lian 落水底，阿玉chhoa 1 e ，吱1聲大-大--聲，我隨hong giu 起來，這是我醒起來了後，阿玉ka 我講e，伊吱hit 聲，我當然無聽著，我ma m 知我lian 落水底。

昏昏去m 知人，到醒來無超過1分鐘，m-koh 一切若teh 眠夢！

我笑笑a，ka 大家hoe歹勢，坐1 tah 久，身體卡舒適了，才緊去換衫。

到換衫間a ，1 e媽媽看著我，掠我金金相，問講：「你是m是tu a 昏去hit e？」
我tim 頭，戇戇a 笑，伊講：「咱查某人卡會貧血，愛細膩，人浸15分鐘，咱5分鐘就好a ，昏去真危險！」

tu 好另外1e媽媽洗好出來，m 知是beh 安慰我，抑是真e，伊講伊家己常在ma 浸kah 昏昏死死去，伊笑講有1回1e人看伊teh beh 昏去，擱一直問伊厝nih 電話kui 番，有夠ham ，…，伊講kah 好親像真有經驗e款！

看來，我第1擺學泅水，著轟動歸e 游泳池！真正有夠歹勢！m-koh ，因為按呢，我感受著人kap 人e 關懷，ti 寒寒寒e天，感受厚厚厚e人情味！

我要檢舉

台長： A-chiak