好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

坐我對面的女子真雅氣，掀冊的手勢敢若咧比「蘭花指」；輕，閣好看。兩擺看伊開保溫杯啉水、閣佮蓋捘（tsūn）好，嘛安靜無聲。若毋是目尾看著，我根本毋知影伊咧做遮的（ tsia--ê，這些）動作。

我也算是真知影佇圖書館愛保持安靜規則的人，毋過我的動作無伊遐爾（hiah-nī，那麼）優雅細膩。

伊的面，伊的動作，真熟似。啊，想著矣，和日本劇「麵包、湯與貓」內的女主角真像！彼个女主角原來是出版社的編輯，因為予人調去行政部門，無歡喜，閣加母親忽然過身，就按呢（tsiū-án-ne）辭職轉去小鎮接母親留落來的小餐廳。

伊改變餐廳的裝潢和菜單， kan-na（只）做較簡單的早餐。

伊和厝邊、顧客、鬥相共（幫忙）的查某囡仔，抑是和厝內一隻貓，攏一貫

輕聲細說，溫婉有禮數，閣笑微微；攏袂緊張、袂失去耐性。行路，做工課，也真優雅。

對！對面女子的外表和動作就親像伊。

我有一點仔好奇，想欲知影伊看啥物冊。不過，四个人公家用的大桌仔，以我的視力，無法度「窺探」伊的內在－－讀啥物冊濟少透露一个人的個性kah興趣啊。

莫怪少年時，我的媽媽就講我「雞母相踏，你也欲看」，伊讀啥冊kah我有啥關係，專心讀我的《褚威格的最後放逐》較要緊。

褚威格佇台灣的名聲來自一本《一封陌生女子的來信》，彼可能是我讀過的伊唯一的冊。眼前我讀的這本寫的是伊和太太最後佇巴西一个小村的日常生活。「他以為自己已聽遍世界所有的聲音，而新居的寧靜卻是他這輩子第一次聽聞。」這句話有意思，我停落來想，伊脫離奢華的歐洲生活，才有可能聽著安靜的聲音吧？

然後，我感覺有一點仔怪怪的氣味，毋是褚威格稀微的心情，較像是鹹菜的。

我看坐佇隔壁的女子，伊的穿插無偌整齊，不過，氣味毋是uì遐來；我探頭看桌仔下面，咦，對面女子一雙穿烏襪仔的腳，斜斜靠佇桌腳的木條頂，伸到我的「領地」矣！

2016.5.29《聯合報》副刋