好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 


         前年六月底佇公園散步時，看著塗跤幾若粒大粒梨仔，真稀奇。毋過伊有大細不等的五瓣萼片，kah一粒圓圓的梨仔無仝款。

樹仔邊有牌仔，才知影伊叫做「第倫桃」這个好聽、有「異國風情」的名。伊的形體特殊，我馬上就抾（khioh，拾）兩粒轉去。

我本來就愛抾植物，色彩媠的葉仔，尤其愛抾；不過，抾遐大粒落落來的果子是第一遍。抾甲袂收煞，一個外月之間總共抾了十幾粒，囥（khǹg，放）佇客廳桌頂、冊櫥頂，感覺有一種微妙的歡喜。

回想著我兩个囝（kiánn，兒子）細漢時，我若做饅頭，佇食飯桌頂排幾若列，in就歡喜甲也笑也跳；三不五時，in嘛會kā 兒童故冊排佇地板，講，「哈哈，我有遮爾濟冊！」

看起來，數量大有一種魅力。kā 第倫桃排列組合，嘛會使講是一種「裝置藝術」吧。

後來，我閣提in來寫生，佇札記簿內參插速寫，甚至畫一幅四開的粉彩畫。

舊（去）年六月我開始注意，啥人知影一个熱天過去，攏無見著in的行蹤。

想袂到這个五月初，無張持（無意中）就看到in。有熟似的植物來kā你報告時序的變化，敢若為你的生活寫一首小詩，做一个記號；也予人較安心、較安慰。這幾年，氣候變遷、作物的生長、結果攏袂按算之類的講法聽真濟啊。

雖然無第一遍看著的時遐爾希罕，猶是愛第倫桃的造形，抾兩粒囥佇客廳。

第二工，一時靈感，用簽字筆為其中一粒畫兩蕊大大的目睭，煞予伊有淡薄仔困擾兼無辜的表情，配合伊低低的額頭，看起來親像電影裡的E.T，誠趣味！

隔兩日，閣抾三粒。而且，「一不做，二不休」，用顏料來畫。

第倫桃的五瓣萼片，敢若人的鼻和喙䫌（tshuì-phué，臉頰），利用紅的、青的、黃的幾个基本色亂畫，就予in變做無仝款面色和表情的外星人矣。

一面畫一面想家己實在是「食飽換枵」，這款物件，過差不多二十工就會焦去、爛去，無法度保存，根本是白白消磨氣力和時間。翻頭閣想，藝術家用粉筆畫佇街路的3D圖遐爾專業、遐爾媠，一兩日就完全無看e影哩。西藏僧人集中全部精神畫的沙畫，也是畫完就馬上拊（hú，擦）掉，比囡仔捒（sak，推）倒積木閣較快！

畫好，共in撨（tshiâu，移）過來撨過去，有時予E.T和阿凡達相看，有時予紅面人kah青紅面對話，嘛真心適（sim-sik，有趣）。 烏白畫，烏白歡喜就好。 發表於2016.6.5《中華日報》副利