尋晚，走時落狗屎，搞到成身濕漉漉去上堂，不過好好彩，會計堅叔打電話俾大 C 提佢帶遮時，堅叔都係冇人同佢食嘢，而且佢有一把遮喺手。所以大 C 就拉埋佢陪我哋食嘢，順便搶埋佢把遮，哈哈哈﹗
臨跳舞仲食豬腸粉係咪好過份呢﹖我除咗食咗粉腸…呀唔係，係腸粉之外，仲食咗一個細蓉 + 煎釀三寶 + 豆漿。嘻嘻﹗不過係腸粉食兩舊，三寶抖一抖，細蓉仲食得一半啫（妳仲啫﹖真係抵妳咁肥）^~^" 而堅叔仲俾埋錢添，真係多謝晒﹗
上到去時，之前一班仲未完，但係聽到有人嗌救命“呀﹗”“呀﹗”原來係一首叫做歌既嘢﹗叫到好似呻吟聲咁﹗聽到其他等緊上堂既人講，原來係祖兒容既“金銀蛋”…呀唔係，“金銀島”。唱咗好耐，我都唔知佢唱緊廣東定係國語，仲要不停呻吟（不停 Repeat）。我真係要嗌救命喇﹗
之後呢班完咗，到我哋喇﹗我有少少後悔上去，不過算啦﹗今次呢班都有接近 15 個人讀，大 C 講番原來算多人喇﹗有 D 都肥肥地，所以自己都唔算突出。終於上堂喇，一開始係先做熱身，都 OK 啦﹗跟住到 Miss 真正教喇﹗佢一開音樂，我想…即刻走，就係呢首金銀蛋喇﹗呢一堂餘下既 80 分鐘，我就要聽呢位小姐不停“呀﹗”“呀﹗”……你殺咗我好過啦﹗
終於“呀﹗”完喇﹗Miss 問我覺得點﹖我循例都要話“幾好呀﹗”心諗：妳唔揀呢首仲好添﹗D 舞步佢排到好鬼娘，好似 80 年代，EYT 晚晚跳嗰種咁。咦~﹗
仲有 5 堂，好好醜醜都捱埋佢啦﹗唯有﹗
P.S. 我真係好鍾意呢輯張相呀﹗所以唔好介意再整多一次，之前係單人，今次係三個人既，嘻嘻﹗
文章定位：
