入去房同佢講第一句時，“唔好意思，我想辭職﹗”時，淨係見到佢傻笑，“典解呀﹖典解呀﹖”係咁問我﹗“有間日本公司請咗我，所以想唔做﹗”“仲有咩弦因呀﹖”“咁…人工又比呢度多既。”“幾多呀﹖幾多呀﹖﹖”(我覺得佢唔似豬，好似鸚鵡，不停 Repeat)“都有五位數字呀﹗”“啫係幾多呀﹖”“萬幾囉﹗”“吓﹗萬幾呀﹗”(係呀﹗好煩呀你)“係咪前幾日見架﹖”(咁廢既廢話都係第一次聽)“唔，係呀﹗不過佢想我可以 6 月返工，所以睇下可唔可以提早走。”“咁你覺得有冇人做到哩個位呀﹖”(九唔搭八)“唔…我 D 朋友都冇人做呢行既，我諗…”“唔係呀﹗哩覺得呢度公司既人有冇人做到哩個位呀﹖”(吓﹗佢想唔請人﹗不過我剛剛諗到應該係如果有人做到既話，會提早放我走，直至請到人為止。但係咁咪累街坊﹖﹗)“唔…咁我唔係好知喎﹗”“唔﹗咁我撚下先啦﹗”收完信之後“咁我想聽日 (星期六，即今日) 請半日假，因為要過去簽約﹗”唔﹗等我撚下先啦﹗”(咁你慢慢撚啦﹗)
之後 6 點我就走人，都冇再理佢喇。我都叫我阿姐快 D 走人，因為實會俾佢問話，佢就話剛剛個鸚鵡俾咗張單叫佢訂嘢，想走都唔得﹗但都叫我努力。多謝佢啦﹗因為自從 2 月開始，成個部門都係我同阿姐夾，溝通因此多咗，上星期我都已經同佢講我唔做，佢都覺得個老頂既心態有問題，留唔到舊人，淨係以為唔憂請唔到人，不停請人、走人，請唔到人時又要俾晒舊人做。係人都驚啦﹗呢幾日我都成日同阿姐傾我之後既手尾，當我同佢講番老頂同我既對話時，佢大鬧“X 線﹗(唔識寫)佢唔係吖化﹖咁都得，邊個做得到呀﹖個個都有嘢做…”唉﹗總之，之後難為佢啦﹗
其實仲未有日本公司請我，我咁講只係想佢可以俾我走，之前阿姐就因為未有人請佢，而老頂 + 老闆娘同佢傾過，佢自己又有三頭家要養，於是留番低，咁就出事喇﹗所以講咗已經有人請，咁佢就冇我符，最遲都要一個月放生我喇﹗
-------------------------------------------------
今日 10:30 去荃灣見工，成晚都瞓唔到，所以 8:00 已經醒咗喇﹗因為已經揀咗要著既衫，但係仲未影相，於是 9:20 出門口食早餐，9:50 去到荃灣地鐵站影即有相，點知站頭冇機，站尾冇機，死喇﹗剛剛 10:00，於是即刻衝去中國旅行社 (申請回鄉證既地方) 影相喇﹗行去 + 影相 + 攞埋 = 3 分鐘搞掂晒﹗於是出發去日本公司喇﹗
上到去 10:20，冇遲仲早添﹗但係填 Form 就填咗半個鐘﹗10:50 至正式見 HR，唉﹗我都唔知自己典解次次會填咁鬼耐。嗰個 HR 真係好嚴肅，又冇表情﹗好似好難相處咁，但係佢冇 Test 我英文同國語就叫我等等，叫個日本人 Sales 入嚟同我傾，之後佢 (鍵本先生) 就睇我履歷，同我講一大堆呢間公司既事，會有咩客人，生產 D 咩呀…坐低冇耐就已經問我介唔介意佢食煙 (又係一個煙產)，總共食咗三支，我就吸咗幾十啖二手煙﹗我以為係 HR 最後問我有冇咩問題，點知係呢個日本人問我有冇問題，我又要將條問題轉做日文喇﹗“咁呢度係咪淨係做配件咋﹖”咁跟住佢又講一大輪日文，我就係咁係﹗係﹗係﹗其實成個 Interview 只係講好少日文，我諗都唔係好得﹗一來唔知同佢講咩，二來始終自己怯。佢話佢自己英文唔好，廣東話又唔識講，同人聯絡都要翻譯，死喇，我咪仲唔好﹗(汗^ ^’) 差唔多到 12:00 時，佢突然話出去搵番 HR 入嚟，我就呆咗，連多謝都唔記得講，成個傻瓜咁坐喺度。HR 入嚟就同我講而家仲見緊人，不過下個禮拜尾有消息喇﹗但係成日問我可唔可以 6 月返工，我其實都要等老頂通知，如果知道既話咪盡快同 Agent 講囉﹗咁就 12:30 走得喇﹗
之後落到愉景新城行緊時，Agent 打電話俾我，同我講嗰邊肯請我喇﹗哈哈﹗得咗﹗不過…因為我仲未 Confirm 到幾時可以返工，咁就要下星期一一定要回覆可否提早返喇﹗我諗如果真係要補錢既話都冇辦法啦﹗而家真係夾住中間喇，星期一再作戰啦﹗
今次寫得好長﹗不過新工有少少驚，因為自己既英文唔好，可能要進修下至得喇﹗下個月又要考商業日文試，好大衝擊既 6 月呀~~~﹗
文章定位：
