上番東涌線之後，我哋三個一路睇住本指南，一直都冇發現原來我哋上錯車 @﹏@"，架車係去東涌站架。直至我發現點解咁多人沖入車箱至知，原來我哋仍然喺迪士尼站﹗哈哈﹗唔緊要啦﹗車到香港自然落嘛﹗(引用『船到橋頭自然直』一句)其中子華見到有間酒樓既菜式好似攞咗好多獎，又有佢鍾意既龍蝦，於是我哋三個就去咗鰂魚涌，一間叫『同樂軒』既中式酒樓食晚飯喇﹗
經過九曲十三彎之後，終於到喇﹗我哋三個已經餓到不似人形，又眼瞓﹗於是嗱嗱臨睇吓食咩嘢好，其中有個阿叔見有個日本人喺度就喺咁要佢叫個 $400 得一隻既花蟹煲。佢都神神哋既，大 C 都話佢當我哋流既。阿叔仲同子華用日文介紹呢味菜添，我同大 C 係都唔叫呀﹗吹咩﹗嘻嘻﹗激死佢﹗呢間嘢半隻龍蝦都 $88，我哋淨係叫咗俾佢食，不過佢都好好，切開試咗之後拎出嚟叫我哋試，我俾面佢都試咗一舊仔，真係好鮮﹗但係子華開初見到隻龍蝦有 D 失望，因為佢諗住冇面前呢隻咁細既，好彩試過佢都話好味。
之後食咗好多嘢﹗有個大蕃茄，裡面有蛋白同燕窩，食落原來係熱既。好味﹗之後叫咗粉絲炒蟹，不過佢話粉絲賣晒，變咗普通既羌蔥炒蟹，炒得好夠火喉 (唔怪之得要等咁耐啦﹗)，好好味，佢仲食埋 D 蔥添﹗仲有海鮮炒飯，好乾身，好得，但係淡咗少少，但係加咗豆板醬之後，勁正。仲有大 C 可以食既素火腿炆伊麵，唔係好多油，已經得，又係加咗豆皮醬之後，全晚最正既就係呢樣﹗﹗之後叫一個甜品，可以極力推介，因為大 C 話好好食，佢俾滿分。而我就麻麻地，呢個係一個芝士騷皮夾住馬蹄糕，好 Cheese Cake Feel，好香好香﹗但因為我本身唔係咁鍾意 Cheese Cake 所以都 OK 啦﹗佢係三件 $50。三件食晒既話，成晚唔駛再食嘢都得喇﹗滯到眼光光﹗而間嘢除咗阿叔之外，其他既 Waiter 好後生好靚仔，唔知點解冇 Waitress 既。其中一個個樣好似韓國人，大 C 好開心 (佢鍾意阿 Rain)。最後佢仲有走過嚟同我哋傾計添﹗嘻嘻﹗
呀﹗講番子華，成餐飯我係咁用日文同佢溝通，佢都好主動搵話題同我哋講，我亦要負責翻譯廣東話，成晚唔得閒，我仲神經錯亂用日文同大 C 講嘢添，結果佢傻咗咁望住我，我至知講錯嘢﹗哈哈﹗不過佢都用廣東話同子華講嘢﹗子華都有用日文同大 C 講嘢﹗笑死人喇，總之好好玩啦﹗子華都話呢間嘢既食物樣樣都好好食，咁就好喇﹗食到十點半，埋單喇﹗承惠一隻牛牛+3蚊啦﹗吓~~~﹗我同大 C 眼都突埋，喺我 Check 緊單時，子華已經攞咗錢，仲叫我唔好睇，之後找錢，找剩廿幾蚊。果然係去慣高級食店食嘢，出手都闊綽 D ，唔似得我咁寒酸。
後天繼續，成晚掛住寫，冇溫過書。唉﹗﹏
文章定位：
