Happy Birthday to you!生日冇朋友0係身邊真係好寂寞﹗下年生日都係留番0係香港過好 D 喇﹗
一早出去搵 Miss，因為佢會帶我返去佢間教會崇拜，係大阪市唔知邊度既一間近民居既一幢禮拜堂。上到去時佢地已經開始唱緊歌，有隊 Band 架。可能我返開間教會嚴肅 D 啦，所以咁樣都係第一次見，好得意。又好好氣氛，因為佢地好投入，有 D 跳埋舞添呀﹗佢地 D 歌好聽過我上次跟小敏豬0個間好多呀，起碼我唔會訓覺先啦﹗我都有跟住佢地讀經，試下聽道，都好開心。最後佢地介紹新來賓有叫到我，真係俾佢地嚇一跳，尤其係成班阿叔阿嬸擰轉個頭望住你0個陣。冇好多後生仔有少少失望添，不過牧師（女人）知道我今日生日都特登同我有個祝福祈禱，都係一份好好既禮物既﹗之後 Miss 請我食 Lunch，係魚定食﹗哈哈﹗
食完飯之後，又諗唔到去邊好，突然間 Miss 話去大阪城喎﹗咁咪去囉，影左好多相，兼行左成日公園，但係周圍都撞到香港人、大陸人，因為始終係旅行團必到既景點，冇計﹗唉…﹗
夜晚去左拉麵舖食野，好早就返去喇﹗因為實在行得太耐。返去就一直睇電視，睇到稻垣吾郎套日劇『 M 之悲劇』、Kinki Kids 既『堂本兄弟』同埋中居正廣既一個節目。而家日本上緊兩套鬼片，過左 11 點就會有時睇到廣告片，因為我訓覺係唔熄電視，所以有時醒左望下個電視就會見到，都咪話唔驚，不過今次好似練大左個膽咁，就算睇到都係擰轉面就算。
今年個生日就係好平凡咁渡過喇，冇遇到好樣既男人。又繼續等﹗
其他人可以不理，Elmo 請留意：
PS. 深夜一點幾時睇到有個節目有 Exile 既 Hero 同另一位成員(Dance) 一齊遊京都寺廟，仲去一間舖頭食 Exile 每逢演唱會必定要食既野（唔記得係咩野﹗唔好問我﹗）。食左一啖之後另一成員即刻跳 Hip Hop 舞好似鬼上身添呀﹗好搞笑﹗
文章定位：
