今日本來媽咪話要去金龍船食飯慶祝生日，點知佢 Lunch Time 打電話俾我，都係食和民算喇﹗咁荀﹖因為原來佢睇中咗套衫，好似係 $5xx 喎﹗哦~﹗唔怪之得喇﹗咁都好啦﹗
叫咗 4 碟嘢，其中兩碟係帶子，真係服咗佢，咁樣抵啲嘛﹗係係係﹗呢餐我就食得好飽喇﹗但係媽咪話得七成飽咋﹗唔通之前節食減肥真係有效﹖連個胃都收細埋﹖不過到而家為止都已經反彈咗一、兩磅喇﹗真係要隔一個禮拜 Keep 住食至得喇﹗
呢餐埋單 $15x，買衫 $45x，總數 $60x。OK 啦﹗本來想去仙跡岩飲杯珠珠奶茶，但係都係唔好，我怕聽日仲會唔止反彈多幾多磅添呀﹗媽咪又話唔好洗錢，咁算啦﹗臨返屋企時都有去傢私舖睇下啲電視機組合櫃，大約 $4xxx，好貴﹗不過媽咪話都係搵番屋村既承辦商去做會好啲喎，因為佢地有房屋署監管，做得唔好可以剷佢地咁話喎。哦~~﹗咁希望成間屋都做得值囉，唔好做到出嚟唔知要唔要咁就麻煩喇﹗
聽日唔駛去唱 K 喇﹗唉~又繼續等~~~原因：Rita 話 Office 班友仔話下個禮拜至去喎。其實本來我同 Rita 都話下星期既，但係佢地話今個星期四啦﹗咁好啦﹗約晒喇﹗今日又話下個禮拜至去，真係麻鬼煩﹗Office 有邊個﹖咪 CP 同 Annie 囉﹗Elmo 都會叫埋佢去。（唔係妳呀﹗Ruby）咁即係，我又會見到呢個人，算啦﹗到時我狂食嘢，同埋坐去第二度，費事好似上次咁樣﹗俾人笑﹗不過今次可以唔洗玩到咁夜喇﹗因為下個禮拜 Rita 佢地搬去寫字樓做嘢，跟 Office Hour 時間，咁即係 5:30 佢地就放工，可以早兩個鐘頭玩，好呀﹗上次第二日返工想死咁濟，今次好好多喇﹗不過唔知約邊一日就真﹗一日未去，真係隨時改。
文章定位：
