呢個機會我等左好耐，應該係由舊年已經開始咁樣諗，終於可以0係下個禮拜成真喇﹗
呢幾日同 Elmo 見面，講到學日文 Topic，佢話佢想轉學校，咁我當然想佢轉去我間學啦﹗唔好話我賣花讚花香，我真係覺得呢間學校真係讀得好舒服，雖然佢會就番一班人既程度0黎調整每一堂既內容；即係如果一個文法唔明，佢會一直講到明，甚至連下一堂都會繼續講番可能係同一樣既野，總之一定要你明為止。我會覺得：與其為左追進度而唔理學生識唔識，夾硬要學生塞晒入腦，倒不如好似而家咁樣教，起碼唔會嚇走班真係有心讀既人嘛，係咪﹖所以呢間學校我已經推薦左 5 個人以上喇，事先聲明：我冇股份架﹗
講講下，佢講左我一直想做但冇去做既野﹗就係：我而家同其他同學既程度係有距離，老實講係我好過佢0地。但我一直都冇轉班，係因為我怕搵唔番一班咁好玩既同學。而家變左我既日文要因為佢地至停滯不前，好似交左學費，但到頭來好似白交咁﹗佢就講（大概）：有時做人要做決定時要勇敢 D，唔好因為怕結果唔好而咩都唔做﹗到時自己後悔，有時追求理想就會放棄身邊一 D 事。但如果真係好朋友既，唔會因為唔一齊讀而絕交嘛，總會再見面。
咁我就諗番起學校除左一班上堂之外，仲有單人授課、二人授課課程，而 Elmo 又同我既日文程度一樣（但佢好堅持我既程度係高過佢，激死﹗），所以不如同佢一齊上二人班啦﹗而且二人授課會平過單人授課，又唔駛咁貴，再加上因為只有兩個人上堂，所以學習範圍可以隨自己想學既而改變，自由得多。於是大家討論要上咩野時間、幾多個鐘、想學既 Topic 等等……真係決定得好快，俾我見識到獅子座既果斷力，佩服﹗而水瓶座係如果冇心情就咩都唔做，但係一想做就會好快搞掂﹗所以水瓶座同獅子座係工作伙伴伙冇錯既。Yeah!! 而當時只但一晚時間咩都搞掂晒，真係爭在未同 Miss 講咋，幾勁﹗
突然間心中學日文既0個團火燃燒起上0黎﹗好﹗我要為0左可以考到一級能力試及格而全力以赴，跟著到日本繼續鑽研我既日文，之後唔返黎﹗哈哈﹗
文章定位：
