上次講到 Rita 約左星期二唱 K，到星期二當日 Lunch 時間 TT 打電話俾我話改期，原因係因為 CP 仔話唔去，史力奇要返學，師奶仔要陪屋企，Annie 想縮沙，阿 Paul 見得番 4 個人咁少就話不如改第二日啦。跟住改今個星期五，但今日又打黎話改期，搞到都唔知係咪唔想同我去所以搵藉口。
講番先，咁所以星期二冇出到街，不過好彩，有間公司打電話俾我約星期三見工，咁都冇咁謝。但係我醒起我重未攞離職證明添，咁我梗係追瘦 Ann 姐啦，不過佢都話可以星期三俾到我，跟住佢就話原來細佬都係早我少少打過電話俾佢問同一樣野（咁橋﹖），好野，唔駛我幫佢講。
星期三我約左細佬 2:00 不如一齊上去 Office，但係因為本小姐要以最好一面見人，所以遲左少少，叫左佢上去先。上去攞封野既途中，我見到：Annie、Ann 姐、史力奇、師奶仔，但係見唔到 CP 仔同前老闆，淨係聽到佢兩個把聲，唔通真係無緣﹗
跟住我同細佬出左門口就講番個 Office 而家搬左落十樓就搞到好鬼肉酸，又窄又寒酸，連個招牌都係臨時整個 Board 貼上去咋，我地仲講笑話好彩走得快。講講下原來細佬佢都係要見工（唔怪之得咁積極啦﹗）佢就去柴灣見 3:30（Trainner），而我就去尖咀港威見 4:30（Japanese Speaking Sales Co-or.）我地都不約而同落左去舖頭影印，傾計，等夠鐘就出發。
最開心係佢地個個都話我又靚又瘦左，當然除左 D 男仔啦﹗都好啦，臨出發時收到個電話，原來係另一間 Agent 打電話俾我，又用日文問我野，又要我上去見佢先至介紹工俾我見，搞到同佢講過左時間，遲左 8 分鐘至行，幾驚遲到呀，不過好彩仲要早 5 分鐘（4:25）已經去到0個度，但係代價係我隻腳呀﹏痛死我喇﹗
間公司都幾靚，空間好大，同頭先0個間差好遠，又好 Pay（雖然冇要求成皮，但係有車費，OT 費，Double Pay），又唔駛我講英文，因為佢話最主要係講國語同日文咋，正啦，不過佢淨係叫我用日文介紹自己，跟住問我住邊，邊度學日文，問 D 好似鎖碎野就話有消息會 Call Agent 再搵我喎，前後見左半個鐘就完，好似唔想請我咁。跟住 6:30 約左班日文同學一齊食飯，咁於是去海港城行左陣，就咁就大出血喇，唉﹗
聽日星期五一早已經要出門口喇，因為 11:30 約左之前提過既 Agent 要上去見左佢0個間呢，原來又係0係海港城，不過今次係海洋中心，跟住 2:30 要番去荃灣有線電視大樓見另一份工（Senior Purchase Clerk），不過呢份工我睇番原來佢唔係日本公司黎架，係我之前 Send 左後來睇番原來 Send 錯既一間，而佢呢份又話 Urgent，所以我而家諗諗下如果真係見得成既話我會唔會做呢﹖唔好理喇，明天會更好，見左再算啦﹗
嘩﹗﹗講下講下唔記得要早 D 抖，聽日熊貓眼就死喇，嘩~~~~
文章定位：
