上星期發生左一 D 事，搞到我唔想繼續寫呢個日記。但係近期好多朋友唔知點解，見到我個貓樣，又或者聽到我把聲就覺得我好唔開心咁。於是今日盡量將唔開心既心情寫晒出黎啦﹗
上星期四，我返番去公司拎票，橫掂近食 Lunch 時間，咁不如搵佢地食飯啦。於事乎我地去左對面間貴酒樓度食。我第一個去到攞位先，之後見到史力奇，同佢傾左一陣，就見到 Annie、CP 仔、Ann 姐黎到，因為我一點至去到攞位，變左佢地黎到都要等位添，大約等左十分鐘後終於有位喇，於是我咪跟住 CP 仔行，諗住坐佢隔離囉，點知… Ann 姐叫我同佢企埋一邊簽收票，咁我個位就無端端俾本來跟我後面既 Annie 搶左去喇﹗（坐位分佈：我 -> 師奶仔-> Annie -> Chair -> CP 仔 -> Chair -> 史力奇 -> Chair -> Chair -> Ann 姐 -> 我）
我地張枱係坐十個人，所以有幾個位多出黎，剛剛 CP 仔坐左入面個風口位，佢就坐左一陣就話凍要坐出黎，咁就坐左 Ann 姐隔離喇（即係由原本坐對面變左而家隔一個位）。跟住 Annie 又話凍，咁正常黎講其他人咪叫佢坐埋出黎囉，咁佢都扭左一陣至肯出黎坐，變左佢就坐0係 CP 仔既隔離喇﹗（坐位分佈：我 -> 師奶仔-> Chair -> Chair -> Chair -> Chair -> 史力奇 -> Annie -> CP 仔 -> Ann 姐 -> 我）
點野食責任落0係我同 Ann 姐度，所以我成日趁同 Ann 姐講野時乘機望下 CP 仔，有時見到佢都望一望我，但跟住就擰轉頭同 Annie、史力奇傾計，由頭到尾都冇同我講野。而我惟有同師奶仔、Ann 姐傾，間唔中聽到佢地講野就陪笑。>﹏<
因為 Annie 話牙痛，所以我地食野都要就晒佢，而佢亦都唔止一次，開聲要 CP 仔餵佢食野，咁 CP 仔梗係話啋妳都傻啦﹗但係我覺得當我唔0係度既呢段期間，Annie 已經取代左我個位喇。所以更加唔開心。@︿@ 因為之後 Annie 話將碗粥打包攞走時，都係 CP 仔幫佢攞，但係由頭到尾佢隻手係冇事，淨係牙痛咋喎…
因為之前都係 CP 仔同 Ann 姐開玩笑咁講係我請，而我都係咁諗，但到埋單 $3xx 時，CP 仔已經攞定個銀包俾 $$ 喇，後來我又做左同之前一樣既野，俾番 $100 俾佢，佢就望一望我（可能見個情形咁熟啦﹗），推番 D $$ 俾我，之後講要俾就俾晒，唔好俾成咁。我見我個荷包都係得 $100 就冇再出聲，就咁代番 D $$ 喇﹗
之後去銀行入票、落左舖頭買野磨左一陣，因為我 7:30 至上日文堂。到 6:00 左右就見到…細佬黎左喇﹗好耐冇見佢，不過冇咩大轉變，惟一唔同我諗係佢比以前返工時精神左囉﹗我地傾左一陣，知道佢由 8 月到而家一直搵緊工，不過佢差唔多到放棄階段，呢個我之前已經聽阿 Paul 講過，不過0係佢把口講出黎有少少無奈咁。後來講講下發現，原來佢到而家仲未攞離職証明（唔係吓化﹖），我就用差唔多以死諫既語氣同佢講一定要攞番至得。咁佢竟然叫我問 Ann 姐攞既時候順便幫佢問埋喎（吓﹗咁都得﹖）。果然細佬真係細佬，真係永遠都長唔大，未生埋腦腎咁﹗
0個日就係咁俾 CP 仔同 Annie 搞到好唔開心，究竟佢兩個想點，係咪想做戲俾人睇﹖定係佢兩個根本係有意思﹖我唔知，亦唔想理﹗但係見到細佬冇穿冇爛又好開心喎，呢幾日就係咁樣呆下呆下過左，不過我都有 Send Resume 出去既﹗我好唔鍾意兩頭唔到岸既感覺，希望搞掂一樣還一樣啦﹗
呀﹗漏左一樣野，Rita 上星期四約我星期二去唱 K，諗住同成班同事一齊去，我都想去，屈左好耐，發洩一下都好，又可能見到佢。我應承左喇，到時睇下點囉﹗
文章定位：
