星期日一早，７：１５起身執被換衫，ＧＲＡＮＤＭＡ晨咁早入黎話要飲茶，阿媽勁唔得閒都要走去陪佢飲，之後就上黎屋企一直坐，我同阿媽就團團轉摸呢樣摸果樣。之後陸陸續續都有親戚上黎等飲茶，搞到就算有張３人梳化都冇位俾人坐，要搞到開埋個貴賓房俾人喇！
註：呢盤花係我四姨早一日上黎插架，靚嗎？
原本話１１點黎到，結果１１：４０分至到，原來屋企人係唔可以直望住個新娘入屋，結果大家玩躲貓貓。成班人加埋過千歲玩躲貓貓，笑死人喇！
由於屋企實在太太太太細既關係，兄弟姊妹團全部人入唔到屋，罰企走廊。我同阿媽又掛住安排逐家飲茶都冇拎汽水朱古力俾佢地食，而家屋企變左士多咁。勘茶當然係由ＧＲＡＮＤＭＡ開始輪住飲，而我就要變身大襟姐做捧茶，好好笑既係，原來做捧茶既係有利是收既。每次當俾到我既時候，我都好配合地大聲叫多謝晒，笑到班親戚死。
之後去酒樓食ＬＵＮＣＨ，本來以為訂３圍就夠，點知…不過間酒樓唔太多人，即刻開多一圍都唔緊要。食食食．．．．．．
返番屋企執野去酒樓，坐的，３：３０就到，跟住發吽等人黎幫我化妝。因為我係自己另外搵人黎化既，所以好快就搞掂，但我阿媽因為係阿嫂既化妝師包埋，所以要變左第三個化，唉，一早用我果個化妝咪好囉，又包埋ＳＥＴ頭。而家呢個都唔同佢搞個頭既，真係衰。不過因為我阿媽件戰衣夠搶，飾物又夠撐眼，所以都可以彌補呢個缺陷。
註：我阿媽就係著成咁（未有飾物時影都咁靚）
係咁影相，係咁招呼人，係咁影相，狂影狂影．．．．．因為唔係用呢部機所以得咁少相。而自己都唔記得拎部機周圍同人影相。蝕晒！
終於到８：３０開始結婚典禮喇，我阿哥搞到好似開演唱會咁唱晒歌，有ＬＩＶＥ ＢＡＮＤ、有和音、有專人剪片，不過最激氣竟然佢細個既相冇我份，二打六既人就竟然都有一張。咩野意思呀？算！我志不在段片！
註：就係呢對痴男怨女。佢地原來拍左拖１２年，而我同阿哥亦都冷戰左１２年。
註：笑容一致，簡直同一個餅印（後續）
簽完紙，切完個假蛋糕就開始上乳豬喇，ＬＩＶＥ ＢＡＮＤ竟然奏『味分高下』既主提曲，好過Ｄ傳統音樂既，幾好。好彩呢段兩個和音先生冇扮庾生同鄧生唱，如果唔係我真係會噴水有陰影。
註：我部相機只有呢幾張係有影到條裙，所以放多一次呢張相啦！不過唔同ＰＯＳＥ既
之後玩既遊戲因為冇咩可觀性，不提也罷。
好早就敬酒，好似剛剛食完翅就黎喇，於是我又繞場一周喇，去到識得既，就個個都讚我好靚。開心死我，有一個仲話我靚過新娘添。不過佢地成班走左喇，剩番我同阿媽同佢地敬酒既時候講既。哈哈，仲有好多姨姨叫我拿拿聲識個兄弟！
呀係！（接續）
我阿媽竟然請到當年佢同老豆結婚時既伴郎叔叔，果個叔叔見到我就同阿媽講：『嘩！個女好似老豆呀！成個餅印咁！個仔就似足妳（指阿媽）』我平時只係睇相至知我老豆係點樣既，而家有個同老豆有關連既人兜口兜面話我似，真係有Ｄ想喊。 Ｔ＿Ｔ
因為我唔係坐主家席，阿媽之後話番俾我聽，原來佢放多個吉位係俾老豆坐既。頭三碟菜都有夾俾老豆，ＧＲＡＮＤＭＡ可能咁樣諗起老豆，觸景傷情啦，成晚唔係好出聲。如果我見到咁樣，我一定喊得出。ＴＯＴ
愛吃魚的我當晚只係食得好少，因為要準備送客，真係冇時停。係咁握手笑握手笑握手笑握手笑握手笑握手笑握手笑．．．．．．牙都軟晒 －田－
因司機大佬個電話冇電兼俾人趕走要轉停第二度，結果成班等坐車（包括我＆媽）既人要等到成１２：４５至成功走人。本來我都諗住要去左阿哥新屋至自己搭車走，結果阿哥都兜左去俾我同媽落車先再去新屋度。返到去落埋妝都已經２：３０喇。期間我同阿媽趁前世未化過濃妝，所以就狂影相！哈哈！
註：嚇死冇命賠﹗ＢＹ ＭＥ
至於艷遇呢～～係有既！呵呵﹗係阿媽經過好多觀察睇出黎既。不過有冇下文呢～～就真係唔知喇，睇下阿哥肯唔肯做扯皮條呀唔係，肯唔肯做條紅線俾我地啦！
文章定位：
