等左好耐既舊同事食飯之夜，終於係 11/4 完滿結束。
當晚改做唱 K，仲要去銅鑼灣 CEO 唱，好正﹗因為識得人，所以可以任唱，由 19:30 - 25:30 我地至走，即係我當日足足對住 CP 仔成 6 個鐘。
其實 6 點我即刻仆出去，7 點鐘去到銅鑼灣但又唔係即刻上去喎，係附近周圍磨，磨到 7:30 至上去。一出升降機就見到 CP 仔!!!（唔駛咁驚嚇呀﹖好彩臨上去時去左皇室堡度補左粧咋﹗）佢指我去 K 房，入去已經見到久違既細佬、Elmo、Annie三人，因為 CP 剛才出去係拎野食，我咪扮晒好肚餓又撲出去囉。（而家諗番好鬼娘﹗）
入番黎之後，Annie 同我講話 CP 仔覺得我瘦左﹗哈哈﹗真係不枉我係一個月前每晚做 50 下 Sit Up 同 25 下 Push Up。因為唔止係為左佢，我要佢地都覺得我走左係一件好事黎﹗食野時，雖然間房好大，有好多張檯，但係我地又好似以前咁坐埋同一張檯食飯，但我個位同佢地較遠，搞到我好似俾人孤立左咁﹗我當晚都好似冇咩點食野，淨係食左三文魚刺身同兩舊壽司咋﹗可能見到冇日文歌唱，冇心機啦﹗
終於聽到 CP 仔唱歌把聲喇﹗唔…唔識講﹗好難聽又唔係，好好聽就一定唔係，成晚淨係唱左兩首黎明咋，如果要我形容，我覺得佢把聲好似唐老鴨咁囉﹗
之後到我唱喇﹗『小城大事』﹗嘩﹗成首唱晒冇走音，仲比以前唱得好左，果然係 100% 精神喎﹗仲有人點左首鄭秀文 Version 『愛你』添﹗狀態奇好﹗唱完佢地全部（CP 在內）都有拍手。不過好似之後 CP 冇再唱歌喇﹗唔知係咪我既歌聲嚇親佢呢﹖
其實我開初唔係好覺，但係坐坐下就發現點解佢越坐越埋，最後只係同佢差一隻手臂位，即係大家擺隻手0係隔離就會拖住咁樣﹗﹗﹗搞到我冇心機再唱。雖然間中阿婆、細佬有拉我合唱我都有唱到，但係我個心已經飛左去第二度喇﹗
Ann 姐之前有話佢係大男人，我諗佢既大男人程度係連同其他男仔講野都會黑面0個隻。所以佢成晚都冇出聲喇。叫佢唱歌又話首首都唔識，搞到唔知點咁，不過我冇理佢，難得有間咁正既房，幾大唱到散場為止。唱唱下， CP 佢話第二日唔想返工，我都係咁話，但係心諗：佢又唔唱歌而家又唔返去訓﹖﹖因為陸陸續續都有人走先。最後得番我、CP、細佬、阿婆同 Rita 五個咋。不過成晚真係好好玩，好想個個月都約出黎，不過第二日好似想死咁濟。
走0個陣已經係 1:30 既事，我其實諗住0係度搭的士走，但係 CP 話搭巴士去旺角再搭的士走啦，因為慳番 D 嘛﹗好彩細佬都係去旺角轉車，咁變左同佢一齊走喇﹗而阿婆就同 Rita 兩個搭小巴。CP 仔因為已經搬左去北角，所以佢自己一個打的走。佢走左我都唔知，因為擰左轉頭同 Rita say bye-bye!
我同細佬一路行搵去旺角既巴士，結果去左灣仔舖頭搭紅 Van 返。佢就去搭巴士直接返屋企，大家都慳番一大筆。哈哈﹗途中知道細佬佢而家份工係 Part time 形式，不過係佢夢寐以求既廣告公司黎，咁樣有好有唔好啦﹗
呢篇終於完喇﹗
文章定位：
