諗極都諗唔到呢個標題，遲啲諗到至改番個名啦﹗
尋晚終於搵咗當事人出嚟傾。其實一開初都唔認得佢，所以就算約咗喺潮流特區度等，我都見唔到佢，哈哈。不過呢個新髮型幾襯佢喎講真，雖然當時我冇講。食嘢既時候，我不停咁聽佢講，佢舊公司同埋而家公司同事既事、讀書時既同學仔（雖然我都識）既事等等，好似企圖及意圖將大家既氣氛搞到冇咁尷尬，我就全程大部份時間好留心聽佢講唔係點出聲，總之辛苦晒妳嘞。
食完晚餐後，佢就終於開始問我做咩事嘞﹖﹖我都一頭霧水唔知近排發生咩嘢事，搞到我好似關公咁，係人都嬲一餐。其實我好似一路都係做緊被動角色咋喎，係直到某一位朋友仔話俾我知該當事人同佢講咗好多唔滿意我既說話，我喺呢度講番我感受時，大家既反應就……唉﹗聽番當事人講佢既版本出嚟時，我就奇怪，點解同朋友仔講既又係另一個版本既﹖﹖
而家我都唔想理邊個版本至係真喇﹗好老實講，由一開始知道呢件事開始，我冇嬲過，亦都冇發脾氣。但係有一樣我係好介意既就係，當事人一開始唔直接搵我講，而係講俾其他人知我有咩唔好，令到其他人都覺得我有問題，搞到好似玩杯葛咁。不過呢個問題，隨著當事人講出佢嗰個版本之後，我就冇咗呢個想法喇﹗老實講，大家識咗咁諗，我而家至發現，原來我喺大家既心目中係一個咁小氣既人，真係令我跌眼鏡（咁咪好囉，可以配 Con﹗）。
唔經唔覺坐喺餐廳傾就傾到成 10:30 pm，後尾臨返屋企前好彩我哋都買到我哋想要買既嘢，如果唔係出到嚟齋傾好慘0架嘛。總之，而家冇事啦﹗
PS 如無意外我 7 月 1 號正式搬屋喇﹗而家開始有少少唔捨得呢度喇﹗
PS PS （賣廣告）w-inds. 既第四隻大碟 “ageha”（燕尾蝶）出咗喇，今日大部份既歌聽咗，唔知點解我覺得好似 Backstreet Boys 咁既﹖不過旋律都易記得嗰種，有機會既話去買隻香港版聽下啦﹗（而家暫時得日版咋，遲啲出既港版會平啲﹗）
文章定位：
