之前會計講，要到放假前一日至會出 Bonus，點知今日已經出咗喇﹗因為聽日開始無皇管，老闆娘都走埋返鄉下喇。Yeah~~~!!! \~ (^ 0 ^) ~//
我舊年既 Bonus 只係得 $200 咋，當時只係剛開始做冇耐，又未過試用，咁少係好正常，加上老頂講咗俾我知一部份 Bonus 係要計返工有冇遲到時，我已經心諗：唉﹗今年有 $500 已經好好彩喇﹗到今日老闆娘俾張支票收據我簽時，呵呵~﹗有 $500，但係再加多一個零添呀﹗扣咗 MPF，都有 $4,750。好嘢﹗聽日返工前去埋銀行，過埋數先﹗不過佢咁樣搞到我唔知點，好似怕我會走咁，最慘就係佢叫我入去同我講今年比舊年生意差好多。其實因為除咗有個長期大客今年 Cut 單之外，其他既客都係魚毛仔。係年尾有個新客好似發咗癲咁，都仲未交貨就係咁落單，跟到我哋個個傻咁濟，同埋有個公司舊客又無端端今年落番單，而且係幾張大嘢，年尾就淨係做佢兩個客既貨，至叫做幫補一下，如果唔係仲慘淡收場。但係今次 Bonus 咁重手俾咁多，唔知其他人係咪呢，聽日睇下問唔問到人先﹗
尋日我買咗…呀唔係，應該係話訂咗個新電話，要兩個禮拜至收到，仲唔知係咪訂到，因為呢個要喺日本訂番嚟用，日本嚟講已經係舊款喇﹗仲要係停產埋添﹗如果兩個禮拜都訂唔到，咁就要轉過第二個款，或者退訂。但係嗰隻色好靚同好特別架﹗不過呢架機有一樣唔好既，就係如果好彩既可以用到日文、英文介面，萬一唔好彩既就只用得英文介面，因為冇人研究呢部機既解碼方法，只係用番解其他機既方法解，分分鐘洗咗顯示日文既 Program。雖然同我之前想要有埋日文介面既日本機有少少出入，但係隻色真係好靚。一切謎團要等嗰間嘢睇下搵唔搵到貨，再運番嚟香港解完碼至知道喇﹗我計過時間，應該喺我生日時就知道喇﹗好心急呀~~﹗睇下會唔會夢想成真先﹗呀係，隻機係摺機，有爛牙功能，MP3 鈴聲，錄短片，雙鏡頭，130 萬像素等等，計埋解碼，承惠 $1,980。好平呀﹗所以雖然係舊款，但係功能都唔差架，都算抵啦。
文章定位：
