原來我細嗰個已經遞咗信走人，仲要係新年後見唔到佢。即係做咗最快走嗰個，總算佢諗通咗喇。佢走既原因係：因為自己越來越冇嘢做，好悶喎﹗梗係啦，講極都唔明，又唔問人，成日自己靠估，越做就越錯，仲有人敢俾嘢你做咩，如果我俾你做既，咪即係搵石頭卜自己隻腳，你估我傻架﹖之後佢要求可唔可以唔駛返多一個月，放新年假前返埋就算，咁老頂見到都冇嘢俾佢做都應承咗佢，咁即係我生日嗰日就見佢唔到喇﹗一天都光晒﹗
其實老頂都想炒佢，唔係會請過一個，而係唔要呢個位。因為呢個位淨係 Scan 嘢同開裝配單，其餘時間就係我同生產部阿姐既助手。老頂都叫我唔好俾嘢佢做，要我自己做番晒喇，咁所以佢大部份時間都係坐喺度冇嘢做。咁橋今次係細既講咗先，益咗阿頂唔駛補一個月，我老頂仲想佢即刻走添。唉﹗算啦，好頭好尾，咁就變咗過年走囉。
呢個禮拜因為好多廠都開始收爐，所以真係好鬼得閒。就咁坐喺度扮有嘢做原來真係好痛苦，隨時瞓得著。仲有兩個禮拜，阿媽又話想去迪士尼喎，咁諗住不如攞一日年假請佢去玩，我怕新年得個“迫”字。而且又唔駛對住阿頂爺。我仲想住埋酒店添，好啦，聽日問下價錢先﹗
文章定位：
