牽涉tio̍h 台語是一款語言 ia̍h是方言ê 相諍，tsé-tsé 年來一直濛霧了社會ê
關心點。確實，台語是一種發育 bô 夠完全 ê 語言，至tsió 在科學技術話字方面 ū 嚴重缺陷，tse m̄-ta 是台語ê 問題，tī lán 平常用ê
華語，應付千萬條英語縮寫 kap ta̍k年暴增ê 新用語，kâng款是欠kha欠手，像，DRAM
ia̍h者「很in」tsit類字詞。
Lán 祖先所傳落來ê tsit門語言，ū 一項 特出ê 優點，he tio̍h是對動作 ham
事物狀況ê 分析真tsiaⁿ，至tsió 比 lán tiāⁿ用ê 華語，koh khah tsiaⁿ tsé。
以「tńg-se̍h」tsit-ê 概念做例。
基本字是「轉」（tsuán）ham「旋」（suân），在華語，大概 án-ne
niâ。但台語內，分ka̍h iù，平平是 tńg-se̍h，依速度
bô-kâng，就有se̍h（漢字擬為「踅」）、tńg（漢字訓做「轉」）、kńg（捲），se̍h 是beh-se̍h nā m̄-se̍h ê se̍h，tńg
是正常tńg速ê tńg，a kńg 是 kin-kin teh kńg。
其中，se̍h 又 koh 引出 tàm 一塊所在來回散步kiâⁿ動ê 意思，所以，lán
講「逛夜市」 ê 時，ē講「se̍h夜市」，華語中ê「逛」kap 我們ê se̍h，並 bô kâng款，因為「逛」並 bô tàm 一位 se̍h ê
意思，khah 接近 wander，tàm台語內面，大概是「遨」（gô），kâng款是 wander，iáu-koh ū 一个表現 khah
散漫ê「趖」（sô）。
Tńg來講「tńg-se̍h」，kńg ê 速度是kin kah tio̍h-beh kā 邊á ê
物件lóng「kā入去」，所以 ū時 ài 表現最高速ê tńg-se̍h 時，mā-ē 用tio̍h kā tsit个字，雖然華語nih
也有「絞動」tsit个字詞，m̄過，「絞動」並bô一定是不斷tńg-se̍h ê 意思。
Uì tsia，lán ē-tang
發現，用漢字表達台語時，真產生誤解。因為，「se̍h」bô定本底kap「踅」kâng
一字，但，「tńg」kap「轉」，「kńg」kap「捲」，「kā」kap「絞」，其實並bô 相kâng。
頭前是以速度來講，nā 以tńg-se̍h kuí-pái 看，ta tńg 一pái，比論 turn
on/off，台語是「tsūn」，華語ê 話，「扭開」「轉開」「旋開」lóng ē-īng。
如果，tńg bô-kàu 一kai，「彎」（uan）是華台語 kâng-ū-ê，不過，台語 iàu-ū
一項，是「uat」，指ê 是正tńg 九十度，比論 uat-kak。
Koh 以tńg旋 ê 媒質看，lián-á teh tńg-se̍h ê
叫做「lìn」（輾），但「lìn」kap「輾」mā-ū kua bô-kâng，因為「輾」ū「車輪壓過去」ê 意思 tī。nā
水流自作旋轉，稱做「滾」（kún），不過，在華語中「滾」ê 用法已經混亂，lián-á tī thô͘-kha mā-ē「滾」。
如果一定 ài指 lián-á 在thô͘-kha lìn，to 真ê
是「輾」（liàn）。
最āu，tuì 華語來 ê「轉」（tsuán）kap「旋」（suān）通常用 tī
名詞 ham 動詞化ê 名詞頂，比論「轉途」（tsuán-tô͘）ham「凱旋」（khái-suân）。
Guá 一直感覺台語 ē 將動作分析 kah
tsia清楚，tsiâⁿ可能是因為tse 原底是一个作穡lâng ê 話語。i 本身 to-ū ka-kī ê 價值，並m̄是其他 siáⁿ物語言ê
suè-ê。
