春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　
　　投入台語文學創作十二冬來，好親像有一條無形ｅ索仔，給我牽咧一直向前行！無論跤步緊抑慢，總是無時停。
　　剖白來講，其實九冬前，我就發願欲編選台語文學ｅ年度選集，不而過，因為個人頇慢、喟力無夠，終其尾愛等到2007年ｅ即陣，頭一本ｅ台語文學年度選──《2006台語文學選》，才會凍正式出世。
　　人生ｅ途合奧得講，徛居台南了後，參府城舊冊店兩位潘姓頭家──景新兄、靜竹姊結緣，是我中年以後ｅ人生難得有ｅ幸福，怹m7-na7無棄嫌邀請我成做駐店詩人，嘛雙人殘殘潦落去參與推搡台語文學ｅ事工。上可貴ｅ，是怹無惜成本，無條件助我完成即層久年來ｅ願望。
　　當該然，我愛感謝參我鬥陣選稿、主編ｅ好友施俊州，伊看台語文學ｅ角度，往往參眾人無啥仝款，無的確，減采我個人有可能漏交ｅ好作品，置伊ｅ看守下底，原原本本出現置各位讀者ｅ目睭前。另外，嘛愛感謝伊費誠濟喟力整理作者簡介佮書寫本冊後記。
　　下底是阮編選《2006台語文學選》ｅ過程佮結果。
　　即本冊ｅ初選文本有：《台文通訊》、《台文罔報》、《蓮蕉花台文雜誌》、《海翁台語文學》、《台文戰線》、《鹽分地帶文學》、《王城氣度》、《第十四屆南瀛文學獎專輯》等舊年出版ｅ雜誌、專冊。阮有共識，以嚴格ｅ標準、憑個人ｅ文學良心選稿，只要有被一位編者選著ｅ作品，就會凍入選。但是，我堅持某一位作者置仝一種文類內底（散文、小說、新詩），干單會凍入選一篇作品，所致，編選結果攏總入選二十八篇作品（散文四篇、小說五篇、新詩十九篇）。
　　誠可惜，置徵求作者同意ｅ過程中，陳素真聯絡袂著，蔡婷琳、蕭俊傑、陳建成恬恬無回應，致使本冊最後干單選入二十四篇佳作。誠拄好，怹四位攏是入選台語詩，尚且攏會凍被歸入新生代ｅ創作者。
　　戰後台語文學史ｅ分期，以個人粗淺了解，到旦未曾有任何一本正式ｅ史冊出版，所致關心台語文學發展ｅ專家、學者猶無一定ｅ共識。為著統計利便，個人暫且以1990年、2000年劃界線，以創作者開始發表作品ｅ年箇分做前行代、中生代、新生代。換一句話講，1990年（含）進前開始發表作品者是前行代，1991年－2000年期間開始發表作品者列入中生代，2001年以後才發表作品者成做新生代。若照頂面ｅ標準，本冊二十三位入選者（柯柏榮入選兩篇）ｅ分期是安呢：

前行代：胡民祥、陳雷、林央敏、宋澤萊、李勤岸、陳明仁（6人）
中生代：藍淑貞、王貞文、李長青、周華斌、陳正雄、陳金順、周定邦、胡長松、林文平、方耀乾（10人）
新生代：柯柏榮、張翠苓、A-hi（陳廷宣）、Voyu Taokara Lâu（劉承賢）、崔根源、楊焜顯、吳正任（7人）

　　看著頂面列出來ｅ名單，相信逐家會有一寡疑問。譬論講，內底年紀上大──1938年出世ｅ崔根源被列入新生代，1975年出世ｅ李長青被列入中生代等現象。研究者施俊州捌踮論文內底解破，伊表示這是台文世代慢熟現象ｅ特點。個人對台語文學史粗淺ｅ分期若有無周至ｅ所在，請專家、學者莫細膩給阮指正。
　　關係入選本冊作品ｅ特色佮美學成就，請各位讀完作品了後，續落去讀施俊州寫ｅ後記，就聽好有概念性ｅ了解，我無欲閣踮即踏加話。
　　這是到目前為止，頭一本台語文學ｅ年度選集。無論阮安怎頂真編選，定著無法度滿足逐個人ｅ口味。我做一個開頭，映望台語文學年度選會凍一冬一冬續接落去，這是台語文學經典化一個重要ｅ過程佮必須要做ｅ空課。
　　最後，愛感謝成大台文系應鳳凰老師、多年戰友陳正雄兄、方耀乾兄三位，怹鬥助贊銀兩，互即本冊順利出版ｅ美意。
　　
──2007.4.7寫置埔姜頭