春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　彼年熱天，我十三歲，入去一間隔壁是雪文粉工場ｅ國中，逐工若到食中晝頓，日頭當炎ｅ時，工場煙筒管內底ｅ雪文粉，就會綴燒風飛起藍色ｅ天頂，飛置運動埕，飛甲滿四界；阮茲ｅ當咧大ｅ猴囡仔，便若鼻著雪文粉ｅ味，就強欲烏暗眩，險險仔食袂落飯。
　　誠好運，一入學抵著一位互我永遠數念ｅ老師，伊ｅ名號做黃素敏，彼當陣拄位師範大學出業一、兩冬，猶是一位少年嫷噹噹ｅ查某囡仔。伊佮別個老師無仝，是真正用愛心咧引掣學生，置我ｅ記智內底，伊嘸捌拍阮，攏是用鼓勵代替責備佮處罰；幾十冬來台灣威權ｅ教育體制下底，袂對學生歹聲嗽、真心付出ｅ教育工作者，實在真少。
　　黃老師教阮地理，閣是阮班ｅ導師，自然的佮伊接近ｅ機會卡濟，伊教學生嘸是干單注重課本內底ｅ智識，閣卡關心阮ｅ品德佮健康；伊叫阮愛定定給同學鬥相共，嘛愛注意家己ｅ身體健康，安呢才是乖囡仔。
　　自細漢我就無膽閣驚生份，會記老師第一擺掣阮去蹉跎，彼工透早阿媽掣我去等車ｅ所在，給老師千吩咐萬交代，講我會眩車，勞煩老師沿路照顧我，黃老師自上車到蹉跎ｅ所在，嘸那三擺問我有眩車否？到野外肉烘好，伊驚我食無，緊挾一塊塞咧我ｅ嘴孔，害我差一屑仔流目油，嘸知是感動，抑是見笑驚歹勢，一時嘛分袂清。
　　運動會進前，伊為欲鼓舞同學替家己班爭取光榮，犧牲歇睏時間，禮拜時仔陪阮到學校訓練，伊叫阮佮三年仔校隊走相逐，若走贏伊欲請阮食物件，逐家聽著安呢，拚性命走，結果安怎？用跤頭窩想嘛知，阮哪走會贏校隊？嘸過，落尾伊嘛是請阮食baN buN(芋冰)。阮知影老師對阮誠看重，置彼月日內底，逐家拚勢訓練，運動會彼工，阮ｅ成績袂嫫，無互老師失望。
　　講起來真好耍，讀國校ｅ時，我嘸捌參加任何比賽，黃老師真好膽，一學期內底派我參加作文佮書法比賽，結果三字塗排作夥──塗、塗、塗，我攏無著名，對老師真袂得過。
　　彼學期欲結束前幾工，有一日早起上課進前，老師無張弛喚六個人名，我嘛算在內，伊叫阮徛踮講台頭前，向歸班同學宣佈，講阮六個後學期欲調去上好班；阮無感覺歡喜，顛倒淡薄仔傷悲，逐個人頭犁犁，嘸甘離開，主要ｅ原因是黃老師對阮實在太好！
　　調去好班了後，日子有影不只仔痛苦，考試不管時攏排尾仔幾名；佳哉，黃老師猶有教阮地理，一禮拜會凍見伊一面，這是我無閒ｅ課業中間，一層卡期待ｅ代誌。
　　二年歇寒彼陣，阮兜搬去龜山，本底我無欲轉學，嘸過序大人講騎孔明車去遐遠讀冊危險，無答應我ｅ要求；我去學校辦轉學手續彼工，無疑誤會抵著黃老師，我嘸知欲佮伊講啥？伊猶原參卡早仝款遐呢關心我，吩咐我去新學校愛卡拍拚，嘸通夆看無目地；我已經袂記安怎佮伊講再會，彼時，我干單想著即世人泛勢袂凍閣相見！
　　一冬外後，我考椆虎頭山跤彼間高中，遐是一位山青地靈、空氣清新ｅ好所在；逐早起山頂攏會傳來土風舞ｅ音樂聲，三不五時嘛會聽著鳥仔唱歌；有一工我置教室外口ｅ亭仔跤，看著一個真熟似ｅ形影，是我上數念ｅ黃素敏老師！我實在想袂到會置茲抵著伊，一時遂嘸知欲安怎？我洶洶狂狂翻頭想欲落跑，拄好互伊看著，伊用親像以早彼種溫柔ｅ聲音叫我：「陳金順，妳咁袂記得老師矣？」我歹勢甲一個面無輸紅關公！後來閣互伊教一學期地理，置讀冊佮考試中，時間無張無弛過去，嘸知東時開始，就無閣看著伊ｅ形影。
　　目一下睨，十三、四冬過去矣，少年時代ｅ記智給我喚醒，置我嘸捌世事ｅ年紀，有一位歸年昶天懷抱愛心ｅ老師牽教，可比春天ｅ花蕊，沃著溫暖ｅ雨水。阮只有將祝福囥置心肝底，互春風吹向妳ｅ耳孔邊，輕輕講一聲：「老師我愛妳！」

──1996.2.3寫置枋橋街
　　1996.2.14『南鯤鯓台語文學獎』散文組佳作
　　1996.4.25《台語世界》試刊號
　　1996.5.1《茄苳台文月刊》第12期
　　2005.10.24修訂