春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

──第一屆島鄉台語文學貢獻奬紀事

 

2017年7月20日，是我上蓋歡喜的日子。

毋是我得著彩券頭獎，閣較毋是娶某、生囝。

是本人成立二十冬的島鄉台文工作室，頒發第一屆台語文學貢獻獎予胡民祥先生。

下底是獎詞：「胡民祥先生，三十冬來運用理性參感性的台語文字，奔走佇台美兩岸。伊毋但綿爛深掘散文、新詩佮小說遮的無仝文類，尚且佇台灣文學猶是禁忌的年代，就孤身泅入研究台語文學源頭的天地裡。這款堅持的心志佮過謙的精神，值得濟濟台灣人跟綴學習。」

短短百捅字，當該然無法度表達對胡民祥先生的敬意。若欲了解伊三十冬來的文學成就，請參考筆者所寫的碩論專冊《茉里鄉渡鳥》。

人咧講：「青盲毋驚銃」正正就是指我這款人。透世人頇顢趁錢，獨獨綿爛台語文學的創作、編輯、推捒種種事工。

到今，個人出版十本台語文學冊莫論，校長兼摃鐘的工作室出刊六冬31號的《島鄉台語文學》，近年來出版五本其他優秀作者的小說佮詩集。今仔日，會當親手頒發台語文學貢獻獎予並我閣較綿爛的民祥兄，有影是一層料想袂到的代誌。

我知影，這絕對是真拄真的代誌，毋是光頭白日咧陷眠。我嘛知，民祥兄袂棄嫌這个小獎，閣較肯定伊嶄然仔歡喜接受。這个獎對無到有，干焦考慮短短一點鐘，就大主大意決定辦落去，事實上，這是無私的前輩者行過三十冬的跤跡所造就的。

因為這个獎，予我見著胡民祥的兄弟姊妹親人，怹做伙來見證這个榮光的時刻，看著眾人喙笑目笑，我感覺這个獎辦了真著。

因為這个獎，我邀請幾位對我真心疼痛的兄姊來鬥鬧熱。人數雖罔無濟，場面嘛毋是蓋奢颺，總是我感受會著逐家的喜樂參滿足。

島鄉台語文學貢獻獎，阮會繼續辦落去。

 

──2017.7.20寫佇赤崁南門仔

2017.8.19《中華日報》副刊