置陳進興導演彼齣「廿四點鐘」ｅ高潮好戲猶燒滾滾，烏金選戰拍甲當熱ｅ11月23禮拜時，我佮伯勛仔相招參加「建國廣場」主辦ｅ「苗栗大湖一日遊」；參加即擺活動是因為長久以來罕咧出外行踏、走跳，會凍去光景秀麗，看會著青山白雲飄、綠水四界流ｅ野外，吮一嘴新鮮ｅ空氣，真正是神清氣爽，樂暢無塊講。
聽電台廣告，我知影彼工ｅ行程大約是安呢：早起7點集合，7點半出發，10點到馬拉邦山賞楓仔葉，12點半食中晝，下晡去大湖挽草莓(m5)，欲暗仔去泰安洗溫泉，閣有點心菜包通好食，連遊覽車錢算在內，才九百箍爾，有食閣有掠，有影俗！
彼工透早，我佮伯勛仔誠早就起床，6點半卡加位枋橋大觀路後街仔出發，伯勛仔騎伊彼台or-dor-vai，我坐後壁，透早空氣淡薄仔清新，阮向「建國廣場」出發；禮拜早仔，減采逐家猶咧睏，少人出來街仔路行踏，歸路攏無塞車，阮真緊來到和平東路、新生南路ｅ十字路口，「建國廣場」樓跤，時間是早起7點統。
到位了後，看著三、四台遊覽車早就峙咧路邊歇喘，參加活動ｅ查甫查某、大大細細來袂少人，比我本底想ｅ加好誠濟，我原本掠作欲偎7點半逐家才會逗逗仔到位，無想著茲ｅ阿伯、阿姆，囡仔兄、囡仔姊茲呢準時，這定著是「建國廣場」平常時辦活動，參加遊行、抗爭所粒積ｅ精神力量；台灣人若每擺佮人相約，抑是參加活動，攏準時赴約，嘸知偌好！
罕得參加「建國廣場」ｅ活動，雖罔看著幾個仔熟識面，嘸過我ｅ個性閉思，實在揣無人通拍招呼，當感覺無聊，拄好看著傅律師揹一枝放送頭，置遐廣播一寡注意事項；我給伯勛仔講來看坐佗一車，凊采行到一台遊覽車ｅ腹肚邊，揣頂懸ｅ名單，揣無5秒鐘看著阮兩人ｅ名排置上尾溜，誠拄好！阮無隨上車，置外口開講、納涼，講一睏仔，想欲上車，爬起車頂一看，坐滿滿，干單頂層上頭到正爿兩個空位，已經無加位通選；等工作人員代誌發落好勢，車駛起行，已經8點外。
車駛上高速公路，運將大哥航導履(han-dor-lu)捍(huaN7)了不只仔好勢，平穩向目的地起行，阮坐置頂層頭到，視野上好，彼工天色清朗，沿路ｅ山色景緻看現現，車頂有設卡拉OK，沿路歌聲無停，時間咧過真緊，目一睨落苗栗交流道，時間大約10點統；到苗栗了後，車經過大湖，駛向馬拉邦山，離開市區一截仔，路遂愈來愈細條，茲大台ｅ遊覽車，行置遐細條ｅ庄跤小路，四、五台連相偎，袂輸四、五個大箍人，欲攢隘甲歹轉踅ｅ山洞仝款；行一下擋一下，車駛到山跤，因為山路傷隘，欲爬山ｅ人愛置茲換坐九人座，到登山步道開始行，偆ｅ人坐遊覽車翻頭，到另外一爿會合食中晝。
來到登山步道欲起行，已經10點半卡加，想著連鞭會凍親目看著捌置電視、圖片影過ｅ楓仔葉，跤步遂作一下輕鬆；我想，當我看著楓仔葉ｅ情景，泛勢會寫一首詩，紀念秋天走閃去ｅ影跡，秋天，咁已經離咱遐遠？我無感覺，我嘸管即陣秋天抑寒天，我干單知影置氣候清爽ｅ季節來爬馬拉邦山，本身就是享受；行無幾分鐘，感覺小可熱熱，給穿置身軀頂ｅ裘仔褪起來綁咧腰脊骨，閣行一塊仔，連手ng2嘛襞(bih)起來；小汗那流，薄日那曝，輕風那吹，彼種感覺，比關置房間仔底，加讚千萬倍！
大約行欲成點鐘，開始大腸告小腸，逗逗仔腹肚枵，歸身軀跤痠手軟，早知就帶兩塊粄(pang2)止飢，即陣講茲ｅ五四三嘛無卡詛，只有忍耐，忍耐！想著賴和ｅ小說＜前進＞內面彼兩個兄弟仔，置無人行跤到ｅ所在，抵著狂風暴雨，經過幾仔暝日，人嘛是牙齒根咬咧，勇敢堅心行落去；阮只不過枵一下仔腹肚，天差咧地，即點仔小case算啥！
嘸知行偌久，來到一位雙叉路口，逐家十嘴九尻川，有人講愛行進前，有人講行正手爿，落尾聽人講頭前閣爬一截仔就到上懸點，我想來到茲矣，無爬起哪會使？歇一睏仔繼續攻頂，行欲到上懸點ｅ路口，拄好搪著「頂港有名聲，下港有出名」ｅ李喬老師，邊仔是吳宏昌老師，即陣，吳老師決定行回頭路，到下跤路口和置遐歇喘ｅ人會合，行另外彼條路落山，我佮李喬老師行卡遠彼條路；聽李喬伯仔講，莫講12點半食中晝，若2、3點仔食會著飯，就誠偷笑！
行到歸身軀當無力，拄好欲落崎，落崎ｅ路嘛無咧好行，佳哉，塗跤有釘一枝一枝柴柱，兩柱中央用索仔穿過，手會凍捍索仔一步一步寬寬仔行，若無，沿路泛勢袂少人置遐撦(chia)畚斗；落崎了後，行一截不只仔大截，來到平坦ｅ所在，置茲總算互我看著楓仔葉，嘸過，佮我本底想ｅ一丈差九尺，我看著ｅ楓仔葉，嘸是位樹仔頂落(lak)落來，隨風飄飄搖，袂輸咧跳舞ｅ彼種款勢，是倒置塗跤嘸知互風吹日曝偌濟工，已經焦湅無半點血色ｅ焦葉仔，一時，我原本充滿詩意，一粒熱撲撲ｅ心，嘛歸個焦湅去；我想，秋天ｅ跤步行了有卡緊，是阮傷慢來，綴袂著伊ｅ跤步，無福氣看著伊美麗ｅ形影。
歸路我佮李喬伯仔行作夥，卡早攏是置演講場看著伊，無機會參伊當面開講，伊予我ｅ印象是會凍將白汫無味ｅ主題，講甲嘴角全波閣有淡薄仔趣味，即點實在無簡單，若無兩步七仔有影做袂到，我想，可能是伊長期寫小說練出來講古ｅ能力；今仔日既然互我掠著機會佮伊開講，當然嘸放伊煞，我問伊最近咁有寫小說？伊講今年以來卡無閒，一禮拜兩工愛去「淡水學院台灣文學系」佮「新竹聖經學院」教冊，連置「淡水學院」上課用ｅ《台灣文化概論》都猶未寫了，哪有閒工寫小說？續落向伊請教一寡台灣文學ｅ問題，順嘴談論《台灣文藝》ｅ過去佮未來；只要關心台灣文化、實際創作台灣文學ｅ人，便若講著咱ｅ文化環境，攏會浮出一種講袂出嘴ｅ無力感。
那行那開講時間過卡緊，阮行甲嘴焦喉渴，歸箍人強欲仆落ｅ崁站，誠無簡單行到山跤，爬上遊覽車頂，差不多欲偎3點半；去大湖一位人家厝開始食桌，已經4點跤兜，嘸知到底食晝抑食暗？食飽煞，4點半卡加，草莓無通挽，溫泉袂赴洗，頭殼頂逗逗仔罩落烏色天篷；欲暗，眾人忝歸工，嘛是鳥隻回岫ｅ時，5點統遊覽車駛起行，駛向五花十色ｅ都市暗暝，駛向明仔載愛勇敢面對ｅ現實社會。
再會！馬拉邦ｅ楓仔葉。
再會！明年ｅ秋天。
──1997.11.29寫置枋橋街
1997.12.23/24《民眾日報》『鄉土文學副刊』
2005.10.26修訂
文章定位：
