春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　早起十點，位鹽埕明興路60號起行，日頭赤炎目睭擘袂金，古都路草無熟，騎or-dor-vai綴俊州後壁，逗逗仔kok，彎來斡去，大街小巷四界攢，攢過歹算個青紅燈，二十分鐘後，or-dor-vai停咧警察局亭仔跤；行過對面中正路1號，俊州永過踮茲上班，它ｅ名真怪奇，號作「國家台灣文學館籌備處」，位北門路時代開始籌備，籌備七、八冬，紅嬰仔出世都愛入學讀冊，嘸知愛閣籌備偌久，誠使人煩惱！
　　前幾日，新聞報講明年十月「國家台灣文學館」欲辦「俄羅斯文學展」，怹有普希金、托爾斯泰、蕭洛霍夫，茲ｅ文學館館長踏上古都地頭，咱「國家台灣文學館」猶未籌備好勢，減采會互遐ｅ俄羅仔笑破腹肚皮。
　　透早五點統，天拍潽光，行出月台，踮車頭門口埕敲手機仔，拜託俊州來載我去明興路徛家，昨昏伊睏歸晡，所致透暝無眠；早起十點半，是伊發表學術論文ｅ在室航，雖罔嘴喝緊張，嘸過，伊嘴唇皮掠出精彩要點，我對伊信心滿滿。
　　以早，坐暝車到府城，拜託正勳兄載我幾仔畷，伊加我一沿，拄好二十歲，對下輩人看頭看尾，僎早頓、報紙，捌踮怹兜促造一暝；彼冬，耀乾兄ｅ阿母往生，南北遠路，好得正勳兄電話通報，予我量早排假，會赴現身式場致意；後來，文學斷路，伊ｅ「正義感」勝過專業，我參耀乾兄被伊＜賣心＞！
　　兩、三冬來，若是到府城，耀乾兄成作專屬司機，載我四界去；2003年2月初，耀乾兄以＜新世代新風景＞為題，駛出台語文學營ｅ在室帆，彼日透早，伊直接位車頭載我去南鯤鯓，看伊談笑論詩，＜思念飛過嘉南平原＞有幸參文友面會，仝日，《台語詩新人選》燒燙燙拄出爐。
　　即兩日，「台語文學學術研討會」，耀乾兄大柱鎮殿；我面皮激厚，好膽勞煩俊州載我；鹽埕明興路60號三樓，我今暝免費ｅ旅舍，俊州ｅ睏間、冊房踮四樓；行李囥好，六點統，雙人無睏意，踮冊房談文論藝，講卡停論文七蕊「菅芒花」開ｅ屈勢；七蕊菅芒花，六蕊捌交陪，＜淡薄仔春光＞引出《台灣ｅ文藝》；「描景、寫物有人事的見解，浪漫溫情泉出本土歷史內裡。」是俊州對我散文風格ｅ短評，伊認為我文風偎近胡民祥，實在不敢當！
　　前禮拜，俊州大膽接受委託，願為我頭一本散文集《真情書》掠漏寫評，伊ｅ真情的確溫暖我孤寂ｅ心；摒出十冬來無夠綿爛深掘ｅ文本，稀微中暫揀24篇，去除雜草掠文字蟲，連續三日，修訂11篇永過欠點ｅ書寫，傳送台文界初生ｅ評論人；我若無暝日拚勢、筆尖深掘，恐驚明年春天尾，最後交稿ｅ期限，《真情書》會成作有浪漫溫情，無本土歷史內裡ｅ淺薄之作。
　　聽煞俊州發表「寂寞，或是鬧熱的花園：《菅芒花》詩刊的文學實踐kah內涵試論」，阮置「國家台灣文學館」門口埕食便當；央敏兄拄仔置台頂予俊州誠懸ｅ評價，即時，猶原對伊無停鼓舞，映望伊成作台文評論ｅ健欉；貞文來到地，交五千箍予央敏兄，欲作《台文戰線》創刊經費；央敏兄做媒人，為《天使》撟(giau7)「島鄉」牽線，請我做產婆，明年春天使《天使》人間出世。
　　食飽晝，綴俊州騎or-dor-vai轉明興路60號，補眠兩點統鐘，欲暗赴耀乾兄備辦ｅ晚宴，我即個不速之客，扭俊州衫仔裾綴入餐廳，食一頓粗飽。透過無形電話線，正雄兄出嘴贊聲，央敏兄推薦ｅ崔根源票數過半，「台文戰線」同仁加一；八、九點仔，央敏兄相招赴「劍橋飯店」，房間內續攤會談，俊州面帶紅醉意薄薄，車我到十字路口，暫且回府小歇睏。
　　劍橋房間內，主人央敏兄、勤寫小說頭毛落雪ｅ根源兄、「台灣唸歌界ｅ貓王」定邦兄、對人事誠有見解ｅ金順仔，當咧矯策文藝復興大計；徛家就近，宗源舍手綰兩本《無禁忌的激情》，無意啊無意入門，加入參伊無對筒(dang5)ｅ多邊會談；耀乾兄續尾到，目睭皮千斤重，併踮壁邊秋凊，無精神加話對談；翻點，踏出飯店戶碇，順路欲轉茄萣仔ｅ根源兄，載我轉鹽埕明興路。
　　徛置明興路60號門牌下，暗毿(sam3)暗毿ｅ光線，照出手機仔頂俊州ｅ名，請伊落樓跤開門；上樓，愛睏神走了了，俊州招我四樓睏房開講，房間內兩大座冊架仔，幾十位世界大文豪陪阮談文論藝；歸暝目睭無瞌，提手機仔看時間，透早五點外，回房歇睏，八點起床，出門前看俊州夢鄉流連，拍開電動門，緊步行出明興路60號大門。
　　鹽埕明興路，我會不時轉來，茲有我ｅ鄉愁；我故鄉本厝踮龜山明興街。

──2005.11.6 寫置枋橋街
　　2005.12《台文戰線》創刊號