2004年12月17暗11點40分，我佮一個聽講即世人嘸捌去到新竹以南，顛倒去過金門遊覽，熟似兩冬外ｅ朋友--國隆，作陣坐莒光號火車落去高雄，相揣熟似欲八冬，因為文學結緣ｅ老朋友--阿榮；誠濟冬來，透me坐
火車落南，早就慣勢慣勢，絕大部份攏是佮文學聖地南鯓鯤有牽連，干單三冬前阿榮chua我走遍下港五縣市彼bai，是單純ｅ蹉跎，遊山玩水。
火車kok啊kok，經過島嶼西爿ｅ山色佮平洋，沿路開講、啄龜以外；我攏咧讀海外台灣人林良彬ｅ頭一本冊《一九七九年夏天》，這是一部白色恐怖時代，士林福林橋彼箍圍仔，一陣青年男女ｅ成長小說；六點半鐘了後，天拄仔拍潽光ｅ坎站，兩個都市倯(song5)行出高雄後驛，等待日頭光。
下港ｅ天一向比頂港卡清朗，即工早起，阮一行四名--阿榮、淑陵、
國隆和我，置罩一沿煙霧ｅ天色下底，位港都高雄起行；經過高屏溪、東港溪，阮來到以王爺信仰出名ｅ東港小鎮，聽對台灣民俗誠有認捌ｅ阿榮講，即踏逐冬燒王船ｅ祭典，通台灣島無地比；進前捌做過空軍基地ｅ大鵬灣，永過是日本時代ｅ水上飛凌機場，曠闊ｅ營地即陣嘛綴著時代ｅ跤步，學人咧收門票，水上活動百百款，耍會了袂盡，嘸知佗一位腦筋轉了有夠緊ｅ生理人，以水上飛凌機做形体，用紅毛塗硿(kong7)幾仔層樓懸，好天時仔，茲ｅ視野誠讚，嘸過，內底ｅ空間猶無充分利用，有卡可惜淡薄。
一路向南，經過林邊溪，來到枋寮、楓港一帶，沿岸種歸排麻黃仔，近年來當時行ｅ行動咖啡車，嘛踮即段美麗ｅ海岸線頂頭，形成另外一幅特出ｅ景緻；無偌久來到地方農會經營ｅ門市部，阿榮刁工將車駛過對面車道，淑陵落車買原汁ｅ檨仔冰沙，請國隆佮我試滋味，有影原汁無錯，無地食ｅ享受；若享受檨仔冰沙ｅ風味，車已經駛到阿榮自細漢生長ｅ故鄉－枋山，到厝，聽講怹阿母拄好出外，減采是去台東查某囝遐看頭看尾，入門，倒手爿參三冬前明顯無仝，已經翻一間新厝欲做客房使用，盈暗，阮就愛置茲暫蹛一me。
歇喘了再度起行，來到柴城地頭，代先阿榮chua阮去一間正宗老店食
綠豆蒜，頂畷來到地，初次聽著即款透世人嘸捌鼻芳過ｅ物件，掠準是一種綠豆仔參蒜頭ｅ小食，其實，這是一種將綠豆擘殼，了後創互一瓣一瓣參糖，無論燒ｅ、冰ｅ，抑是加粉條仔，攏讚甲會觸(dak)舌ｅ好物；即角勢，有一間通台灣上氣派ｅ土地公廟－福安宮，茲ｅ敬字亭(燒金紙ｅ所在)，不管時火光照人面，咱逐四界看著ｅ細間土地公廟仔，佮福安宮相比，有影一丈差九尺；廟ｅ雙爿邊ｅ，擔頭排兩列，上出名是四重溪ｅ鹹鴨卵，無給汝騙，免配飯礁食，絕對袂害汝哽歸，茶水灌袂離；另外，猶一踏佮茲會凍比併，就是北部關渡廟邊仔賣ｅ鹹鴨卵，前一暫仔我才嚐過鹹汫。
偎晝，阮來到歸年昶天燒和的地頭--恒春，茲是民間藝人陳達ｅ原鄉，伊手彈月琴，喙唱＜思相枝＞ｅ經典畫面，早就成做台灣人共同ｅ記智；頂一暫置電視內底看著古城門的報導，特別拜託阿榮將車駛到西門，即個城門的磅孔，車會使出入內外，干單欲歙一張相，就愛讓車通過幾仔畷，閣過，南門用紅毛塗、鐵枝仔箍起來，創甲袂輸圓環，無西門彼款讓車過路ｅ問題，總是，我恰意西門ｅ古早味；中晝頓，淑陵欲chua逐家去一間「董娘ｅ店」，伊ｅ同事再三呵咾兼推薦，茲ｅ物件好食有特色，阮踅歸晡，給兩位小姑娘問路了後，誠無簡單，置一條巷仔內看著「董娘ｅ店」無偌顯目ｅ看板；落座了後，瞻頭看著正爿壁頂，一塊染有古早味ｅ布面，用毛筆字寫宋澤萊ｅ＜若是到恒春＞，嘸知是天氣傷熱，抑是早起拄食過檨仔冰沙和綠豆蒜，我連一碗魯肉飯都食袂了，真正是魯肉跤，阮眾人ｅ感受相仝，後bai無欲來茲交關。
續落來，就是即畷落來島南，上想欲去ｅ所在--墾丁，阿榮講墾丁國家公園雖罔創甲真嫷，嘸過，傷過頭人工化，伊想欲chua阮去社頂自然公園，遐ｅ所有光景，會使講九成九以上，攏保持自然ｅ風味，我夯雙手喝讚，若欲去人工化ｅ所在，都市滿滿是，汰有需要專工走即畷；拜六下晡時仔，日頭誠炎，將牛仔外套褪起來綁踮身軀頂，行上自然步道，沿路搪著袂少佮阮仝款捌貨知孔ｅ朋友，總是，茲無親像別踏遊樂區沿路人揳人ｅ款勢，好佳哉；會記行無偌久，泛勢卡無半點鐘，阮就來到大小峽谷，茲ｅ自然景緻，通講是天地所設，一點仔都無膨風，路雖是卡細條淡薄，寬寬仔行總嘛行會到一遍開闊ｅ天地，峽谷ｅ壁堵，永早地理冊頂懸讀過ｅ鐘乳石，宛那看會著；行出峽谷，眼前是一大遍平坦ｅ草埔，老早就有幾仔位青年男女，目睭瞌瞌倒踮遐享受難忘ｅ假期，即時，風微微，吹過身軀頂，爽快無地比，阮四個人嘛夯萫綴拜，學人倒踮草埔頂，我想，干單短短五分鐘，聽好解消歸晡ｅ疲勞。
位下晡兩點行到三點半跤兜，阮完成即bai ｅ散步行原(始)路；來到墾丁牧場，小可趄趄ｅ山坪頂懸，幾百隻牛置遐食草，即幅放牛食草ｅ光景畫，佮墾丁ｅ藍色天篷，連成一体，偎路邊一欉樹仔跤，一隻細隻牛仔，嘸知是孤老抑是閉思，單操一個徛踮遐，隔著護欄，我逗逗行偎，參牠歙一張相，減采袂將牠嚇驚；四點統仔，來到龍磐公園海岸線，茲是珊瑚礁ｅ保護區，沿岸ｅ景緻，嫷甲予憨筆ｅ我，嘸知欲用啥款幼路ｅ文字來形容？總講一句，美景天成！可嘆ｅ是，卡過無偌遠ｅ外海，幾冬前一台阿啄仔貨船--阿瑪迪斯號，置茲沈底，它漏出來ｅ油垢，將歸個海面舞甲烏
嗎嗎，船体夆拆甲碎骨分屍，寶貝仔珊瑚礁，無跤通走、無喙通哮，只好相招作伴，踮即遍悲愁ｅ海葬場，吹奏無奈ｅ哀歌。
墾丁ｅ天逗逗仔烏陰，五點卡加，阮趕欲去看關山落日，聽講茲是清朝時代台灣八景之一；烏陰天猶原人揳人，好ｅ視野早就予人佔了了，阿榮講免著急，差不多五點半跤兜，人群就會散了，時到，阮徛起哩涼亭仔視野上闊ｅ所在，遠遠看過是墾丁ｅ地標--小尖山，阿榮講眼前即幅圖，
予伊想起＜若是到恒春＞描寫ｅ光景，是嘸是？問宋澤萊隨知影；鳥隻回岫，天篷歸個罩烏落來，阮去屏鵝公路邊照利餐廳食暗，坐踮戶外，享受暗頭仔ｅ清涼，即踏上出名是--刺歸(河豚)米粉，有影生目睭頭一bai食著，口味清爽袂油臊；另外，予我數念ｅ是--蒜爆水母，食起來脆脆鬆鬆，滋
味到旦猶記椆椆；食飽，踅墾丁夜市，夜市仔頭ｅ倒手爿，就是下晡行點外鐘久，社頂自然公園ｅ牌樓；茲ｅ路嶄然仔開闊，無像別位赫呢阨擠擠，雙爿路邊排出來ｅ貨色，無論食ｅ、用ｅ，準做台灣各大夜市，嘛不過如此如此，用「火燒豬頭」(面熟)來形容，上界鬥貼。
暗時八點外，轉來阿榮枋山ｅ舊厝，怹阿母已經置厝裡等候，看著阮轉來，緊去盈暗國隆佮我欲睏ｅ總舖，款頭款尾，予阮有一個溫暖ｅ me；即me，睏甲誠庶是，第二工早起，猶未七點我就起床，徛置門口埕讀我紮來ｅ冊《一九七九年夏天》；了後，去頭前埠岸行行散步一下，怹兜卡頭到，一間人家厝掛「寶寶網咖」ｅ看板，想袂到網際網路茲敖生湠，連即款庄跤地頭，都嘸放它煞；九點統，阿姆煮好早頓，阮撟椅桌，踮門口埕食飯配話；十點，阮向阿姆講再會，離開路邊種滿檳榔欉、椰子樹ｅ屏東縣，沿路我ｅ腦海內猶沈迷置美景當中，南灣、貓鼻頭、鵝鑾鼻、龍鑾潭、大小尖山，猶有即bai無緣相會ｅ落山風。
十一點外，阮坐踮高雄愛河邊ｅ咖啡座，即陣猶無幾個人影，聽講黃昏以後，定定客滿；若飲茶，若食雞卵糕，若鼻著愛河淡薄仔臭味，講罔講，佮永過相比併，現此時加誠体面；面向愛河，阮ｅ倒手爿是五福橋，囡仔時代ｅ電影「八百壯士」，內面有一幕楊惠敏泅水送國旗ｅ場面，就是置即踏歙ｅ；透中晝，日頭當猛，阮來到高雄港，欲看細漢時大人講ｅ「大船放尿」，船有影足大隻，貨船、軍艦隨人佔隨人ｅ地盤，攏袂相拍；茲佮頂港淡水相像，攏學人美國舊金山，峙一塊「漁人碼頭」ｅ看板，一絲仔創意都無，我ｅ頭殼，予當頭白日曝甲無半點主意，阿榮講號作「芎蕉碼頭」上合味，茲是當年旗山芎蕉大出，最主要ｅ集貨場。
中晝食啥我無掛意，上北進前來食「阿婆仔冰」最著時，茲ｅ冰綿綿-綿，無論我ｅ八寶冰、國隆ｅ草莓冰、阿榮ｅ圓仔湯、淑陵ｅ柑仔蜜汁，抑是柑仔蜜切盤，攏有好氣味；欲走進前，頭家娘「阿婆仔」相送一杯梅仔湯，因為阿榮佮伊「鹽埕國小」ｅ學生仔，本底就是主顧客；食冰飽，向柴山起行，阮沿著柴枋仔設ｅ步道爬崎，量約仔爬兩百公尺，就出現三四隻猴猻仔，有ｅ匿置樹頂尾溜，嘛有一隻踮阮邊仔趒來趒去，我手頭彼杯梅仔湯，差一屑仔現予搶去；聽過路客講，爬起山頂猴猻仔有歸千隻，踮遐成群結黨，後bai機緣若到，才來去体會「孤鳥插猴群」ｅ滋味；最後，我參即隻活骨ｅ猴猻仔歙一張相作紀念，網路頂懸有圖為證。
拄仔，置高雄碼頭，嘸知啥因端？榮仔提起鴨母王朱一貴，我想，無定三四月仔，天氣當好、百花齊開ｅ春天，我會落南央請阿榮，chua我去
高雄縣內門鄉，參訪遐ｅ民俗傳承--宋江陣，順續走揣284冬前，鴨母王行過ｅ一步一跤印。
※2005.1.16 寫置枋橋街
2005.7《菅芒花詩刊》革新號第四期
文章定位：
