春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　《思念飛過嘉南平原》是我ｅ第二本詩集。亦聽好講是一本情詩集，因為置56首詩內面，拄好一半是情詩；五冬前我出版頭一本詩集《島鄉詩情》ｅ時，根本料想袂到我會寫茲濟情詩，甚至出情詩集；彼時我有講過，一生無欲追求榮華富貴佮美麗女子；對一個頇慢談情說愛ｅ人來講，《思念飛過嘉南平原》ｅ出世，泛勢會成做即世人唯一愛ｅ印記。
　　愛ｅ種籽東時飛入我ｅ心田，我實在講無路來，我干單知影恬恬仔付出，直欲四十ｅ我，袂輸一個小孩兒，閉思ｅ心並無綴咧轉大人；1800個日子親像夜空消失ｅ流星，咻一下！來無張弛，去嘛袂赴相辭；一切ｅ情景、話語，攏逗逗椆置我中古ｅ記智，有一日我若老，提出彼幾張青春ｅ相片，飛過嘉南平原思念伊。
　　感念宋澤萊老師，置2001年春天提倡所謂ｅ「寫實情詩」，互我匿踮心內ｅ勇氣，一夜之間齊闖出來，位＜妳二十歲生日彼工＞到＜最掛心ｅ人＞，攏總寫二十外首；返頭來看，我並無後悔寫茲ｅ情詩，我原原本本寫出當時ｅ情感，減采手路有卡幼稚，詩質無夠精煉，嘸過，遐是真情實意ｅ所在。
　　多謝干單見過兩擺面ｅ王貞文小姐、多年戰友胡長松先生，特別撥工為即本詩集寫序文，怹攏是「寫實情詩」忠實ｅ支持者，佮宋澤萊老師仝款，怹本身嘛寫過袂少首「寫實情詩」，攏有誠濟我愛學習ｅ所在；怹對我ｅ呵咾佮鼓勵，將會成做我不斷創作ｅ喟力。
　　1995年開始創作台語文學，十冬歲月星光照路，到旦才出版兩本詩集，我感覺見笑面反紅；耀乾兄立志欲一直寫到頭毛落霜，伊搰力種詩ｅ精神佮詩藝超群ｅ文才，常再鼓舞我愛閣卡拍拚；一跤跨入中年ｅ我，欲以耀乾兄做模範，用筆做犁，歸年昶天無停種作，吸收先進ｅ技術，開出一季一季飽滇ｅ稻穗；這是我ｅ自我要求佮映望，我嘸那欲寫到頭毛落霜，嘛欲寫到天頂上光彼粒星墜落為止。
　　即暫定定想起，人生已經過半，上大ｅ志氣，不過寫幾首(篇)漂浪ｅ詩、自然如流水ｅ散文、風雲變幻ｅ小說，安呢，心願足矣；時間若到，我會搬去南瀛參耀乾兄做厝邊，有閒，談文論藝練嘴花，無閒，用筆做犁星伴月；彼時，央敏兄泛勢告老還鄉，踮水牛厝孵鴨母王ｅ史詩；彼陣，柴山少年漸中年，長松會一步一跤印，不斷挖出魔幻ｅ過去事；日落黃昏時，老朋友相放伴，坐咧海邊搧海風，佮海鳥合唱舊情綿綿；若欲遊山玩水，用跤行透台灣，阿榮定著人選頭一個。
　　《思念飛過嘉南平原》欲獻予陳春足小姐，當做熟似五冬ｅ紀念，感謝五冬來對我ｅ疼痛佮照顧；阮阿媽過身ｅ時，伊講過：「汝ｅ代誌就是我ｅ代誌。」即句話，永遠感念在心內；伊是一位善良有愛心ｅ查某囡仔，1800個日子恬恬行過，伊ｅ成長我攏看在眼內，有影誠安慰；我真心映望，伊早日達成理想，揣著真情，過伊幸福美滿ｅ人生。

－－2005.8.5風颱天，寫置枋橋街
　　2005.9.12《台灣教會公報》2794期