春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　十點跤兜，空氣中焦燥佮燠歙透濫作伙，七月天猶原六月火燒埔ｅ氣候；來到枋橋車頭，排隊提昨昏置網路訂好ｅ車單，車單提好勢，無想欲隨轉去；行落地下一樓，誠品冊店外口有一陣少年學生，置遐唱歌撓曲，入去內面巡巡看看咧；看著一份出刊二十外冬ｅ文學雜誌，揣101位少年輩ｅ文學工作者，調查講準若銀票頂面會凍囥台灣ｅ文學作家，恁會選誰？結果，一千箍賴和得著頭名，二名ｅ票數猶輸伊忝忝；本底掠準台灣人ｅ文學喟口，佮我天差咧地，茲濟冬來，總算有一項合我ｅ意。
　　行出枋橋車頭，我想著七月十六ｅ車單拆到彰化，彰化是賴和先ｅ故鄉，一時賴和先ｅ代誌，猶閣有我佮賴和先ｅ因緣往事，一幕一幕闖入腦海；我佮賴和先增差七十二歲，伊過身二十三冬我才出世，無緣見伊一面；置日本時代做一個醫生人，賴和先嘸那參蔣渭水相像，積極參加台灣文化協會ｅ啟蒙運動，伊閣善用無閒看診ｅ閬縫，開出一首一首台灣ｅ詩花，嘛種出一欉一欉反抗強權ｅ小說樹；互人上感心ｅ，是伊置每冬ｅ過年暝，將一冬來無錢納醫藥費，遐ｅ散良人欠數ｅ單尾燒掉，我好親像看著一葩人格者點灼ｅ火光，照透彰化ｅ街頭巷尾。
　　我ｅ性命印記東時開始出現賴和先，早就揣無清楚ｅ跤跡；至無，1996年春天《台語世界雜誌》試刊了後，我佮賴和先ｅ文學緣，置不知不覺中，已經逗逗仔相牽連；即份新刊物竟然食著好膽藥仔，給腦筋動到賴和先ｅ身軀頂，怹以翻譯為手段，欲來徛旗造擂台，＜赴了春宴回來＞好運搶著頭香；創作生涯拄仔度晬ｅ我，決心欲潦落去參加即場擂台賽，我將題目翻做＜食春酒轉來＞，費神惱命完成初次ｅ出帆，順續用敬畏ｅ心給稿寄出去，想袂到個半月後我來開花結果，坐上擂台主ｅ寶座；續落，第二場佮第三場我分別以＜行進前＞(原題＜前進＞)、＜一枝稱仔＞(原題
＜一桿稱仔＞)欲佮家己拚懸低，輸贏雖罔重要，自我挑戰猶卡要緊，為著欲將賴和先ｅ作品翻互嫷喟，四常步數盡展，腦筋定定想到強欲爆開；即份無偌輕可ｅ穡頭，置炎天赤日ｅ熱人時分，薄汗那流那來完成，收割ｅ歡喜總是踮心頭無定ｅ等待了後；即兩回，高手猶原相讓，我三連勝袂輸咧眠夢。
　　隔轉年三月尾，《台語世界雜誌》週年暗會辦甲袂輸糜咧滾，各界名流受邀現身會場，主辦單位為我結一蕊大紅花，我以「台譯賴和小說系列」徛上台頂，受頒「1997台語文創作獎」獎牌一面。
　　1998年開正兩月日內，我閣翻譯＜鬥鬧熱＞、＜一個同志的批信＞、＜不如意的過年＞等三篇賴和小說。2月14文經社置誠品冊店，為日治時代作家張深切辦全集發表會，到遐才知社長吳榮斌是張深切ｅ外甥仔；會前，抵著賴和先ｅ第二後生賴洝奧里桑，林政華教授為阮牽線紹介，奧里桑表露出意外ｅ面色，伊講透早看著《民眾日報》副刊登出歸版ｅ＜一個同志的批信＞，原底掠準翻譯者諒必四五十歲跤兜，實在想袂到竟然是一位少年家！
　　1998年8月參加「鹽分地帶文藝營」第二十屆ｅ盛會，置遐熟似落尾成做優秀台語詩人ｅ方耀乾、陳潔民、周定邦等文友，結營煞戲，阮ｅ友情並無綴咧煞鼓；彼冬11月，蹛置彰化、對賴和漢詩用心研究ｅ潔民，邀請我去賴和紀念館，這是我求之不得ｅ唯一一擺，可惜時間無量尚，若無，我應當愛去賴和先ｅ墓前向伊行禮參拜。
　　2001年，月津文史工作室踮鹽水田寮社區，以斑芝花做自然背景，用陶版燒出台灣詩句，造一條150公尺長ｅ「台灣詩路」，選出62位詩人ｅ77首詩，位賴和ｅ＜農民謠＞到陳金順ｅ＜霧＞，牽一條隔開七十外冬ｅ詩線。　
　　時代ｅ跤步常再互咱綴袂著陣，如今，研究賴和先ｅ論文一冬一冬濟，伊ｅ全集嘛已經跨過世紀ｅ戶碇；親像古井水雞ｅ我，遂嘸捌看過有人為伊寫傳，其實，我真早就有一個映望，欲以賴和先做主角，寫一篇互人感動甲流目油ｅ小說；不而過，即個願望愛先等我將筆尾磨互尖才閣講。
　　時到，賴和嘸那價值一千箍。

－－2005.7.24寫置枋橋街