春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　奧巴桑若猶在生，今年拄好一百歲足足。
　　奧巴桑置日本人ｅ天年出世，散良人出身，大漢嫁互龜山一個好額人ｅ第二後生，姓林ｅ家族有歸山坪ｅ地聽(thing3)好種茶，雖罔做穡人逐工流汗流滴，嘸過，話講轉來，一家大細會凍平安過日、無病無疼，減采是查某人上大ｅ幸福。古早大家庭做穡需要人工，若掠即款標準，奧巴桑ｅ腹肚皮的確會呵咾哩，伊生四男一女，大漢後生猶未度晬就來夭壽去。老輩人講：「千算萬算嘸值天一畫。」奧巴桑少年守寡，跋落囝兒坑，翁婿過身ｅ時，腹肚內猶揹一個細漢查某囝。乾官嘸甘少年新婦拖四個幼囝，對伊特別看顧，遂引起姛姒仔怨妒，用嘴唇皮相款待。閒仔話利劍劍，卡厚ｅ銅牆鐵壁嘛擋它袂檔，結局，安排伊去台北城管顧茶行。
　　日本時代尾期，市草一日bai2過一日，茶米生理辜不衷收擔。目一睨，奧巴桑成做失業人口，身軀邊纏綴細囝，伊只好手ng2襒(pih)起來，踮街頭巷尾賣薰度三頓。台灣人悲哀ｅ源頭，是成做殖民地帶來ｅ身命，嘸管日本人ｅ薰酒專賣，抑是支那走路政權ｅ公賣局，人民賣薰討趁攏犯怹欺(khia)。
　　彼年，二月尾ｅ暗頭仔，踮大稻埕天馬茶房門嘴賣薰ｅ中年奧巴桑，無張弛絞起歷史ｅ風颱，成做事變頭一位受難者。永過，自小學到大學ｅ歷史課本，罕得看著即位平凡查某人ｅ一字半字；嘸過，便若搪著彼個禁忌ｅ日子，奧巴桑ｅ名姓就出現置五花十色ｅ報紙、雜誌，莫怪伊ｅ親人懇求社會，嘸通時到日到才將奧巴桑ｅ神主牌仔峙出來朝拜。
　　奧巴桑一世人勤儉khinn5家，無歹心毒行，閣卡嘸捌宰人放火，是安怎愛被判無形ｅ無期徒刑，成做永世袂凍超生ｅ良心監囚？
　　我想，只有問天！
　　奧巴桑若會曉未卜先知，彼工暗頭仔莫置天馬茶房門嘴排薰擔，歷史悲劇咁就袂烽火灼？泛勢天公、上帝嘛無才調排解。
　　二十冬來，民間正義人士佮良心學者搰力深掘，遮嵌台灣人心肝頭ｅ暗影，逗逗現出真相。二二八ｅ標頭無應該是奧巴桑ｅ原罪，閣卡無應該是所有良善台灣人久長ｅ惡夢。
　　舊年春天，媒体記者置荒郊野外ｅ塚仔埔揣著奧巴桑老去ｅ墓，年久月深墓草發蓊蓊，若無好禮仔揣，的確會永遠互墓草嵌椆，終歸尾無半人知。無偌久，一位旗號顯明ｅ統派媒体人，以奧巴桑做主角，拍一部紀錄片「尋找二二八的沈默母親」，紀錄即位數十冬來恬靜無聲ｅ平凡查某人。設使即位導演ｅ出發點良善，奧巴桑ｅ查某囝明珠置影片內面發聲，絕對有伊ｅ正當性。
　　伊講1947年2月27暗頭仔，彼葩火是伊來引灼ｅ。彼工伊位學寮轉來，到天馬茶房門嘴給老母鬥賣薰，十歲查某囡仔揹一kha貯薰ｅ匣(khe2)仔喝賣，碰著一個未納錢先提散薰起來pok ｅ阿山仔兵，就近一陣民眾咧鬥鬧熱。即時，阿山仔兵手伸入衲袋仔，邊仔ｅ人想講伊欲拔槍出來，一時人聲滾絞，阿山仔兵聽無台語，緊張、洶狂掠準眾人欲對伊不利，錢撣咧，青狂起跤走。無偌久，查私薰ｅ警察一行六七名，來到地將奧巴桑ｅ薰佮血汗錢攏提走，奧巴桑苦苦哀求放伊煞，揪lak8之間互槍柄摃破頭額，滿面全是血。
　　代誌ｅ經過就是安呢。明珠認為一切攏是言語袂通引起誤會，嘸是外省人欺負台灣人，將一切放水流，瀉落江洋大海，嘸通逐年攏捎出來練一擺。安呢，對怹老母無公平。
　　即部紀錄片ｅ觀點參咱民間ｅ認知正正倒摒，所致引起二二八受難者阮朝日ｅ查某囝阮美姝開記者會抗議。伊講進前訪問過奧巴桑ｅ查某囝林明珠，明珠表示當時伊無在場，即馬跳出來講彼日給怹老母鬥賣薰，全然是假造出來ｅ白賊話。阮美姝表示，二二八絕對嘸是純然言語袂通引起ｅ誤會，一切攏是外來政權ｅ殖民壓迫所造成ｅ。若嘸信，伊手頭lak8著誠濟證據。
　　歷史真相當該然干單一款版本，倒底是今年七十歲ｅ林明珠記智斷路，抑是八十歲ｅ阮美姝觀點歪tshuah8。只有天知、地知，猶閣有奧巴桑林江邁知。

──2007.1.15寫置埔姜頭