人生若夢。即句話置我白汫無味ｅ生活中捌得著印證。
二月初，我去南鯤鯓參加文學營ｅ一段因緣往事，就是一個奇巧閣真實ｅ夢。
咱人過年進前，下港ｅ日頭猶原燒和燒和，逐工探頭相借問。五工四暝ｅ文學營置南鯤鯓代天府鬧熱展開，即個以探討母語文學做主体ｅ文學營，已經相連續辦十屆。文學營ｅ第三日安排參觀ｅ行程，即工早起欲去七股看烏面撓杯。
咱南台灣七股地區，置曾文溪口偎近內海ｅ所在，逐年冬天西伯利亞ｅ寒流酸風冷利ｅ時，攏有幾仔百隻ｅ烏面撓杯飛過沙埔、飛過溪河、飛過大海，飛過萬里路途，飛來即踏揣岫歇寒。透過世界生態團体ｅ調查，證實即踏是全世界上濟烏面撓杯逐冬歇寒ｅ所在，茲是怹ｅ寶地。
文學營租三台遊覽車，將百外名學員載來曾文溪口烏面撓杯ｅ安歇地，生態學會派來ｅ三位導覽員早就排好架勢，迎接阮即陣位台灣各所在來ｅ人客。
落車了後，總幹事宣佈一點鐘後置停車ｅ所在會合。我隨手提一本素描簿佮鉛筆，一個人行向內海仔，踮一塊平坦ｅ石頭頂坐落來，長到肩胛頭ｅ頭鬃互早春ｅ海風吹亂去，我隨手用樹奶將頭鬃綁好勢。tann頭相著一隻孤單ｅ烏面撓杯徛置二十公尺外，我坐恬恬嘸敢給拍青驚，夯起畫筆將眼前ｅ景緻一筆一筆畫落來。我畫烏面撓杯長長ｅ烏嘴管，置水面撓來撓去ｅ古錐款，畫牠展翅翩來翩去ｅ模樣。
等我將烏面撓杯ｅ屈勢畫好，就近閣飛偎來兩隻怹ｅ同伴，怹假若一點仔都嘸驚我即位無人請家己來ｅ不速之客。
我拄欲飲一嘴茶，一陣冷風帶來寒意。面頭前突然間罩濛，濛霧中一位老阿伯仔向我行來，斟酌給看，老大人滿面鬍鬚，白髮蒼蒼，兩蕊目睭有神，身懸大概180公分，干單160公分、45公斤ｅ我，徛起來拄好到伊肩胛頭。位老阿伯ｅ面露仔看起來，無成咱台灣在地人，嘸過，阿伯講ｅ台灣話誠溜掠。
「小姑娘仔，妳孤一人置茲畫烏面撓杯？」
「阿伯，我綴文學營來茲參觀，順續將眼前ｅ光景畫落來。」我續手給拄才畫ｅ圖提互看。
「照安呢看起來，妳對文學誠有趣味囉。」
「我自細漢看真濟故事冊，高中了後讀袂少現代詩佮小說，我一直攏真恰意文學。」我用自信ｅ口氣回答。
「阿伯，你咁捌文學？」我給反問。
「文學若欲捌，嘴鬚就好拍結。」阿伯一面講一面撚伊ｅ長嘴鬚。
「我小說寫歸世人，到尾智覺文學無法度互我敨(thau2)放，最後我行入宗教、哲學ｅ世界走揣解答。」講到茲，阿伯目睭展大蕊。
原來阿伯是一位作家，我為拄才ｅ無禮歹勢面反紅。
「阿伯，請問貴姓大名？」
阿伯繼續撚伊ｅ嘴鬚，笑笑無應話。
「阿伯，嘸知你徛家置佗位？」
「烏面撓杯ｅ故鄉。」
我一時捎無貓仔毛。
「小姑娘，即套冊送妳。」阿伯位伊摜ｅ kha-bang2提出四大本暗藍冊皮ｅ冊。
接過手，封面ｅ字是外國字，嘸過，看起來無成英文。想欲進一步問阿伯，一目睨，已經看無伊ｅ形影。
即時，濛霧逗逗散去。
三隻烏面撓杯置我面頭前展翅飛過。
文學營集合ｅ嗶仔聲踮耳孔邊響起，五分鐘後我互遊覽車載離開七股內海。
彼暝，我踮南鯤鯓ｅ客房睏甲真落眠。
夢中，我看見老阿伯參一陣烏面撓杯作夥飛向北爿。
即個奇巧閣真實ｅ夢，確實捌存在過，不時踮我ｅ頭殼底轉踅。
五月。我位台北落南考研究所，一時互成大校園ｅ鳳凰樹花迷醉，早時ｅ日光透過樹縫射落來，樹葉一片、兩片綴風絲仔逗逗飛落，置空氣中成做一幅光景畫。我知影，我愛著即座透濫古都氣味ｅ校園。
秋日下晡，期中考試煞，招同窗作陣騎自轉車去台灣文學館參觀，彼踏當咧展覽露西亞三位大文學家ｅ文物。歐洲馬薩式ｅ建築風格siann5我ｅ目光。聽講茲永過是日本時代ｅ台南州廳。
阮誠好運，2點55分到位，拄好搪著3點開始ｅ導覽，踮半點統鐘ｅ導覽時間裡，我一直綴置彼位身材中範，短頭毛、細蕊目睭、滿面笑神ｅ中年婦仁人身軀邊，注神聽伊精彩ｅ導覽。透過伊ｅ喙嫷佮豐富ｅ手勢，阮一點一滴進入三位文學家ｅ內心世界。
老實講，露西亞三大文學家我卡偏愛托爾斯泰，因為我置大學ｅ暑假讀過伊ｅ《安娜．卡列尼娜》，足足讀三日，愈讀愈有味。當然，我嘛期待讀普希金ｅ《尤金．歐涅金》佮蕭洛霍夫ｅ《靜靜的頓河》。托爾斯泰ｅ身軀頂有一種使人平和、溫暖ｅ感覺。下底是我記智內底導覽小姐對伊ｅ素描。
托爾斯泰，1828年8月28置晴園出世，成做露西亞ｅ貴族，自細漢父母雙亡。
伊是一位人道主義者，一生上重要ｅ作品是大河小說《戰爭佮和平》。即部小說，是以1812年法蘭西拿破崙引tshua7大軍進攻露西亞莫斯科ｅ歷史做時代背景，加添男女主角ｅ三角戀愛，使得歸部小說成做有血有目屎ｅ偉大作品。
咱面頭前看ｅ攏是伊親手所寫ｅ原稿，不過，聽講伊ｅ筆跡干單伊ｅ牽手看有，所以，每擺文章欲發表進前，攏愛怹太太替伊重抄一遍，這嘛是夫妻恩愛ｅ一種表現。
托爾斯泰晚年離家出走，置冰天雪地ｅ一個小車站過身，享年82歲。
伊体格高戕(tshiang5)大漢，182公分ｅ身懸，就親像伊ｅ文學懸度。
這一切無論是夢抑現實，對我來講攏無要緊。
參觀露西亞文學展了後，我揣著線索。
我想，老阿伯就是我上敬重ｅ大文學家托爾斯泰，伊送我彼四本厚厚ｅ冊，應當是以露西亞文舖排，使伊名聲透世界ｅ《戰爭佮和平》。
阿若「烏面撓杯ｅ故鄉」就是指寒人冰天雪地ｅ露西亞。
感恩上帝！賜我熟似即位北方來ｅ貴客。
敨(thau2)開心內ｅ梟(hiau)疑，我趕緊坐暝車拚轉厝欲揣出彼四本厚厚ｅ冊。
嘸過，無論我安怎摒、安怎hiau，揣無就是揣無。
咁講，舊去ｅ《戰爭佮和平》就親像彼陣烏面撓杯仝款，已經置熱天飛轉去西伯利亞囉！
──2006.12.31寫置埔姜頭
文章定位：
