總統女士
0.就職宣言
各位鄉親序大、各位女士、各位先生，今仔日本人會當徛（khiā）踮遮佮 逐家講話，心肝內十二萬分的感恩。代先，欲感謝這成（tsiânn）冬來，鄉親對文婷無私的鼓勵佮相挺（thīn），予我有閣較（khah）大的喟（khùi）力，勇敢面對一路行來所搪（tn̄g）著的考驗佮難關。會記得斯當時我拄宣布欲參加總統大選的時，無論黨內外濟濟人士攏無看好，主要媒體嘛攏給（kā）我潑冷水較濟，減采因為我佇政治方面的資歷併（phīng）其他候選人較淺，所致造成寢（tshím）開始眾人梟（hiâu）疑我的治國能力。毋過，經過這段期間我的頂真拍拚佮謙卑學習，終其尾得著逐家的肯定，予我有機會為全國鄉親服務。佇遮，我欲感謝黨內初選前輩杜春滿女士的相讓，嘛欲感謝總統大選對手唐惠三先生的指教。
咱攏知影，台灣佇世界上是一個真誠（tsiânn）特別的所在。佇17世紀近代文明猶未入來台灣進前，遮至少已經存在幾落千冬原住民的自然文化。自從荷蘭人佮西班牙人拍開台灣的門窗以後，三、四百冬來，這塊土地經歷幾落擺外來政權的統治。唯（ùi）好的一面來看，遮的外來政權帶來嶄（tsám）然無仝的制度，透濫佇咱的生活內面，豐富咱的文化；毋過，唯嫫（bái）的方面來講，外來政權侵佔咱的土地、破害咱的環境、搶奪咱的資源、奴隸咱的人民，種種烏魯木齊的歹代無所不至，予咱一直陷入惡的輪迴裡。好佳哉，久年來經過濟濟前輩無私的奉獻佮犧牲，咱台灣近年來總算開始實施民主政治，不而過，所有政治人物攏該當摸心肝想看覓（māi），咱做了敢（kám）有夠？對人民鄉親的身苦病疼敢有不時囥（khǹg）咧心肝內？
事實上，咱台灣人自古以來就是一個勤儉拍拚的民族，嘛是一個相當有生命力的民族。就準講經歷過遮呢濟外來政權的蹍（thún）踏，遮呢濟天災地變無情的打擊，咱嘛是展現「蕃薯毋驚落塗爛，只求枝葉代代湠」的精神，一直勇健向前行。講著天災地變，咱台灣佮離咱無偌遠的厝邊日本相像，攏是踮佇厚風颱、敖（gâu）地動的所在徛起。這是天地所設，毋是弟子做孽，會使講是自然界對咱這兩個民族嚴厲的考驗。無偌久進前，日本發生驚天動地的大地動，續落來引起大海漲佮核能外漏事件。雖然，怹（in）遭受遐呢慘重的大災難，毋過怹的人民展現出守規則、有疼心的高度文化，值得全世界的普羅大眾佮台灣人向怹學習。
各位敬愛的鄉親，文婷受逐家委託擔當總統的職務，定著會盡我個人的本份佮規個政府團隊的喟力，拍拚為鄉親創造閣較美好的未來。特別佇經濟方面，上界要緊的代誌是愛顧人民大眾的腹肚，為逐家創造閣較濟的工作機會佮優質的工作環境。另外，佇拚經濟的時陣，咱嘛愛相像致重環境保護的空課（khùe），永過發展經濟過頭損（sńg）斷環境的現象，老早就無合世界潮流佮人類的需求。閣來，為著欲予鄉親生活自在、安居樂業，咱的國家安全絕對愛盡全力做予好勢。咱無欲積極發展攻擊性的毁滅武器，毋過，當咱遭受外敵無情攻擊的時，咱絕對愛有反擊的能力。總講一句，政府是為服務人民的需要來存在，咱的團隊會事事項項徛佇人民的角度來設想，嘛向望各位鄉親給咱嚴格的監督。
這是一個新時代的開始，文婷願意以上界謙卑的心，向人民頭家請教、學習。祈望透過逐家作伙拍拚，未來咱的國家台灣，會當年年月月攏有進展，擺脫永過濟濟無理的制限，早日成做世界上受人尊重的進步國家。
1.杜春滿的悲歡人生
1945年終戰進前無偌久，杜春滿出世佇竹山街一戶散鄉人家庭。伊是這個家庭第三個查某囝，出世的時，頂頭已經有兩個阿姊佮兩個阿兄。老爸李來發佇戰爭尾期予日本官廳徵召去南洋做軍伕，到甲春滿出世的時攏猶無消無息。老母林鳳嬌一個查某人掣（tshūa）四個細囝閣揹（phāinn）一圈（khian）肚，逐日天拍潽（phú）光就愛出門做山穡，唯天光做到天暗，勉強予一陣囡仔有湆（ám）糜仔通啉，這款日子一直到甲欲生進前才停睏。減采操勞過頭，鳳嬌生春滿了後，煞無奶水通予食，辜不二衷只好飼伊食米仔麩。
李來發的小妹李月娥嫁予佇台中做生理的杜文良，雖然是戰爭期，日子嘛過了嶄然仔快活。文良、月娥兩翁仔某上大的缺陷，是怹結婚幾落冬月娥的腹肚猶原無動無靜。彼時，拄好阿嫂鳳嬌生第三查某囝，月娥轉去竹山給探頭，看伊一個查某人跋落囝兒坑、日子袂得過，好心提一寡錢銀給鬥相仝。月娥見著彼個出世無幾工、烏焦瘦的查某嬰仔鼻目嘴仔活靈靈，除了天生的同情心以外，嘛感覺誠合伊的緣。伊開嘴給鳳嬌講：「阿嫂，妳厝裡已經有四個囡仔，阮阿兄閣毋知東時才會轉來，對妳一個查某人來講，擔頭有影較重淡薄。妳嘛真知，我佮文良結婚遮濟冬，攏無生甲一男半女，這個查某嬰仔有合我的緣，假使妳若予我抱轉去育（io），阮翁仔某絕對會給伊惜命命。」
「阿姑仔，我頂日仔才咧想，這個查某嬰仔實在足歹命，這款時陣來出世佇阮兜。這碼（tsit-má），有恁翁仔某欲給晟養，註該伊會併伊彼幾個阿兄、阿姊較好命，有影誠勞力哦。」鳳嬌含著目屎，用無啥元氣的喟絲仔向月娥說多謝。
「阿嫂，家己人哪著說勞力。妳拄仔生囝煞，愛好好仔做月內，身體才袂拍歹。我予妳遐的錢該當有夠用，千萬毋通趕狂欲去做穡。若閣有啥物需要鬥相仝的所在，做妳講免細膩。」月娥安搭鳳嬌軟弱的心。
月娥唯竹山給查某嬰仔揹（āinn）轉去台中了後，文良看著囡仔規個人心花齊（tsiâu）開，便若伊踮佇厝裡的時，就給查某嬰仔攬牢（tiâu）牢，袂輸欲佮家後相爭抱囡仔，月娥看翁婿遐呢惜阿兄的查某囝，心肝底暗暗仔歡喜。嬰仔抱轉來隔轉日，文良就給伊號名春滿，綴伊的姓喚（hiàm）做杜春滿。過兩工仔，兩翁仔某就給春滿抱去戶政事務所造家甲、報出生。自這個查某囡仔來怹兜了後，規個家庭的氣氛併頂過加誠鬧熱，文良佮月娥對春滿嘛誠甘開錢，毋那予伊食好穿好，佇教育方面閣較致重。
春滿這個囡仔自細漢就不止仔有伊家己的主見，事事項項免人差教就會曉主動去做。特別佇讀冊這方面，一點仔都毋免序大人煩惱，伊自讀小學起，仝班考試罕得有人考贏伊，小學讀六年領著的賞狀，給厝裡客廳的壁頂貼甲滇（tīnn）滿滿。初中佮高中攏以優秀的成績考牢台中女中，佇女中前後六年期間，春滿毋那學校課業無輸人，甚至不時去圖書館讀課外冊，定定讀甲圖書館欲關門猶毋甘離開。伊看冊的範圍不止仔闊，有歷史、文學、哲學、政治各方面，伊豐富的智識底蒂佇這段時期拍甲不止仔在。
18歲高中卒業，序大人問伊大學按算欲讀啥物科系？杜春滿連考慮都無，直接應講：「我想欲讀台大政治系。」彼個年代，查某囡仔讀政治系是相當罕有的代誌。文良、月娥兩翁仔某的思想，自底就併大多數序大人較開化，怹聽春滿安呢講，並無直接反對，干單講：「妳愛想予清楚，後擺才袂後悔。」
唯彼冬起，台大政治系分做政治理論、國際關係佮公共行政三組。落尾，春滿猶原堅持家己的想法，佇彼冬熱人以懸分考牢台大政治系國際關係組。國際關係組主要的目標是為欲培養外交方面的人才，春滿的個性在來不止仔活骨，閣再加上伊的英文能力一流，的確適合讀這個學門。
原底杜春滿按算大學卒業了後，欲申請美國芝加哥大學政治學系碩士班。不而過，因為一層意外事故，煞拍破伊全盤的計畫。
大學四年的時，伊佮一陣校內各科系的精英份子組織讀冊會，讀一寡西方思想方面的經典。欲研究這方面的學問，濟少攏嘛會沐（bak）著馬克思佮恩格斯的物件，彼個時代，大國黨猶深深浸踮佇中國拍輸走贏的暗影，使致統治當局對共產黨佮社會主義的物件全然排斥、過頭驚惶。永過，因為組織讀冊會受掠關監的紀錄不計其數，不而過，無論啥物時代，便若有理想性的知識份子，總是會想欲為怹存在的社會走揣出路。杜春滿這陣青年知識份子想欲改革社會的結局，就是予抓耙仔出賣。落尾，所有讀冊會成員攏被判刑，獨獨出賣怹的抓耙仔全身抽退。杜春滿被統治當局當做刑法100條內亂罪預備犯，夆（hông）判三冬有期徒刑。
佇彼個無致重人權的專制統治下，統治者的爪牙袂輸是中國明朝的東廠，啥物款惡毒酷刑的齣頭都做會出來，毋管硬軟注（tù）作伙來，用言語恐嚇若袂驚，續落來，各種予人料想袂到的傢俬頭仔就捎（sa）出來佮你輸贏。無論你是鐵拍的英雄，抑是碇骨的好漢，經過遐的無人性的爪牙鼠治，隨個啊隨個攏予怹舞甲tshu̍ah尿泄（siàm）屎。連閣較粗勇的查甫人予怹掠入白色恐怖的內籬仔都電甲毋成（tsiânn）人，親像杜春滿彼款軟芷（tsiánn）的查某人閣較免講。
經歷過彼段假若地獄的生活，杜春滿出獄三、四十冬來，不時攏會陷眠做惡夢。伊上捷（tsia̍p）夢著的畫面是佇無半個人影的荒郊野外，伊規個人赤身露體倒踮草埔仔，兩尾青竹絲佇伊的大腿佮骱（kái）邊趖（sô）來趖去，伊想欲跁（peh）起來逃走煞袂振袂動，想欲喊喝煞叫袂出聲。另外一種夢境嘛定定擾亂伊的睏眠，伊夆褪光光關踮狗籠仔，雙手雙跤攏予狗鍊仔鍊牢咧，身軀頂予人抹甲全全蜜，幾落千隻狗蟻（hiā）佇頂面爬來爬去，予伊瘴（tsiūnn）甲擋袂牢。逐回杜春滿陷眠驚睜神，規身軀攏澹（tâm）漉漉，袂輸拄仔沃著一陣雄狂的西北雨仝款。
因為陷入白色恐怖的監牢，拍亂杜春滿自底的人生規劃。出獄了後，伊偎靠英文的專長踮幾落間補習班教囡仔來維持生活。因為親身受獨裁政權的危害、蹧躂（tsau-that），杜春滿認為若無給這款吮（suh）人血、喫（khè）人骨的政權揠（ián）倒，台灣人的春天永遠攏袂到位。所致，伊空課外的時間攏投入反對運動，後來愈潦愈深，規氣給頭路辭掉全心參與。佇黨外時期，伊捌替幾落位反對運動的先輩（siân-pái）參加省議員抑是縣市議員選舉助選，有成功、有失敗。落尾，發生美麗島事件，濟濟反對運動的頭人受掠關監。到彼個坎站，杜春滿看扮勢，伊家己無潦落參選袂使，後來伊捌選牢縣議員、省議員、立法委員、南投縣長，甚至佇小民黨唯一提著中央政權彼回，伊捌被派任做文建會主委佮內政部長。
這陣，杜春滿已經66歲，伊欲給參與總統選舉當做人生的最後一戰。
2.方文婷的奮鬥歷程
方文婷，1956年出世佇台南縣七股鄉鹽埕村。老爸方國安、老母王彩霞佮大多數的村民相像，因為日本時代「台灣製鹽株式會社」大量招募鹽工，怹攏是唯北門嶼搬徙來遮，成做七股鹽埕的鹽工。鹽工的生活普遍的（tik）無偌好過，文婷的老爸、老母攏總生六個囡仔，家境的艱難無輸予其他鹽工家庭，佇這款家庭大漢，逐家攏嘛是菜脯根仔罔咬鹹。
文婷佇兄弟姊妹裡排第四，頂面兩個阿兄、一個阿姊，下底一個小妹佮一個小弟。因為厝裡散赤，自讀小學起，文婷的兩個阿兄便若散學抑是歇睏時仔，就愛去鹽埕給老爸、老母鬥相仝耙鹽、曝鹽的空課；阿若文婷參怹阿姊，嘛會利用歇睏時仔，去鹽埕村南爿龍山村的海寮仔，夆倩（tshiànn）挖蚵仔給厝裡鬥趁淡薄仔所費，寢開始挖蚵仔彼陣，文婷因為細漢欠經驗，不時嘛予蚵鑽鑿（tsha̍k）甲大空細裂，不而過，細漢罔細漢，文婷血拭拭咧，繼續挖蚵仔，毋敢哼（hainn）甲半聲。
自細漢，厝裡其他兄弟姊妹若毋是頇慢讀冊、就是成績平平仔，獨獨這個文婷仔佮人無親像，伊唯讀小學起，每一學期期尾攏嘛領著學校的賞狀，會使講是鹽埕村第一敖（gâu）讀冊的囡仔。文婷的阿姊文秀佮大兄志雄攏干單讀到小學卒業，就無閣讀落去，大兄留咧厝裡繼續給爸母鬥相仝鹽埕的穡頭，阿姊去台南一間紡織會社食頭路。二兄志堅吊車尾考著初中，勉強讀到卒業，就綴（tùe）叔伯阿兄去市內學做水電。到甲文婷小學卒業彼冬，拄著政府開始實施九年國民義務教育，文婷赴著頭班車，照學區分配，會當毋免考試直接升起哩昭明國中。文婷佇國中讀冊期間，毋那三冬齊提著全班頭名，卒業的時，嘛排佇全校三名內。
國中卒業，文婷行到人生的十字路口。若照永過阿兄、阿姊的經驗，極加讀到初中就盡磅矣。厝裡散赤文婷毋是毋知，毋過，文婷敖讀冊毋那規家伙仔知，通庄仔內知，全學校嘛攏知。文婷的老爸國安，碰著敢欲予這個敖讀冊的查某囝繼續升學的難題，吐一聲長長的大喟，干單講：「咱文婷仔閹雞趁鳳飛，查某囡仔人遐敖讀冊，有啥物路用？」文婷的老母彩霞對嘴應講：「規氣給伊彼兩個佇市內食頭路的阿兄、阿姊，喚轉來厝裡作伙參詳。」
彩霞話講煞下一個禮拜時仔。文婷佇紡織會社做女工的阿姊文秀、學做水電的二兄志堅，攏唯市內轉來厝裡，參老爸、老母佮大兄志雄作伙參詳文婷的未來。文婷本人佮小妹文英、小弟志勝嘛攏在場。
「文婷，妳家己講看覓，妳有想欲閣繼續讀冊否？」老爸國安先踏話頭。
「阿爸，我誠想欲閣繼續讀冊，毋過……」文婷表態，毋過話講一半煞塞佇嚨喉空。
「毋過安怎，妳毋著講予清楚。」國安應。
「文婷，做妳講無要緊，今仔日喚恁阿兄、阿姊轉來，就是欲逐家好好仔參詳妳的代誌。」老母彩霞出嘴安搭文婷的不安。
「阿母，我想欲省中佮師專攏去考，考了後才來做決定。」文婷講出家己的想法。
「文婷，考試的報名費我來替妳出。」自細漢佮文婷感情上界好的阿姊文秀講。
「阿姊，咱一人出一項報名費。」文婷的二兄志堅佮文秀相爭欲出報名費。
「我嘛贊成文婷兩項攏去考，車錢我來出。」文婷的大兄志雄講。
「文婷，妳三個阿兄、阿姊都安呢講矣，我嘛無理由擋妳莫考。既（kah）若欲考以上，就愛較綿爛拚，知否？」國安講。
「文婷，較拚勢咧。」彩霞講。
「阿爸、阿母、阿兄、阿姊，多謝恁。」文婷流落歡喜的目屎。
落尾，文婷省中佮師專攏有走去考，嘛攏懸分考牢。
本底，文婷的老爸、老母想講查某囡仔人若去讀師專，後過做老師免煩惱食穿，建議伊去讀台南師專。不而過，文婷給爸母兄姊講伊想欲讀台南女中，後日仔欲閣考大學。伊給厝裡的人講，去台南女中伊會拚勢讀冊領獎學金，嘛會給學校申請散工來做，通好加減補貼生活費。文秀嘛替小妹贊聲，講伊按算唯紡織會社宿舍搬出來佮小妹作伙稅厝蹛，兩姊妹仔挺（thìng）好互相照顧。
文婷讀台南女中頭一學期的註冊費，是伊國中母校上界疼惜伊的蘇老師替伊納的。
文秀唯宿舍搬出來佮文婷作伙稅厝蹛，加一條自底毋捌有的開銷，閣再講伊逐月日嘛著愛提寡錢轉去厝裡鬥相添，所致，自文婷佮伊蹛作伙了後，伊佇紡織會社的穡頭閣愈捷加班，毋那逐暝攏加班甲七晏（ùann）八晏，連禮拜時仔都罕得歇睏。文秀為家庭佮小妹所做的犧牲，文婷攏看在眼內，伊佇心內暗暗仔對家己講：「我愛較拚勢讀冊，後日仔若有出脫，才來報答阿姊的恩情。」有東時仔，文婷看阿姊加班到遐呢晏驚伊腹肚枵（iau），趁文秀轉來咧洗身軀的閬（làng）縫，會去灶跤切芹菜珠仔、敲一粒卵，煮一碗燒燙燙的湯麵予阿姊食。文秀唯浴間仔出來，看著小妹為伊煮彼碗燒燙燙的麵，心內不止仔感動，目屎含目墘。伊會閣去提一個碗，分phenn一寡麵予文婷作伙食，食飽兩姊妹仔才同齊去睏。
方文婷佇台南女中讀三冬冊，確實有影做到伊當初應允爸母兄姊的代誌。伊毋那每一學期攏領著獎學金，尚且透過導師鬥相仝佮訓導處的安排，予伊會當利用閬縫的時間去圖書館做散工。佇圖書館做散工，毋那會當加減趁寡生活費，嘛佇遐接觸袂少學堂無法度讀著的課外冊，這對拍開文婷的視野，嶄然仔有幫贊。
高中卒業彼冬，方文婷順利考牢台大外文系。唯下港去到台北大都市讀冊，文婷毋那接觸著唯南北二路來的五色人，佇外文系閣較會當接觸各種西方文學的新潮流佮新思想，遮的衝擊是伊過去18冬來毋捌有的經驗。文婷佇台北蹛學校的查某宿舍，另外憑伊台大外文系的看板（khân-páng），透過紹介食好鬥相報，家教的空課一個續一個接袂離。所致，佇台北讀大學彼四冬期間，文婷毋捌為錢項的代誌咧傷腦筋。
方文婷台大外文系卒業彼冬，參加教育部公費留學考試，考牢英國牛津大學英語文學系碩士班，佇牛津大學讀三冬冊，順利提著碩士學位。彼個年代，踮台灣提著碩士學位，就會當佇大學內面教冊，閣較免講文婷提著牛津大學的碩士。轉來台灣了後，文婷倒轉去母校台大外文系唯講師做起，經過幾落年拍拚浸佇學術研究內面，落尾順序升起哩副教授、教授。
另外一爿面，自讀大學起，方文婷對西方女性主義的發展就相當注目，特別是維吉尼亞．吳爾芙的《家己的房間》佮西蒙．波娃的《第二性》這兩本女性主義的經典，伊攏讀了不止仔通透。佇大學教冊以外，方文婷嘛開袂少喟力咧推搡（sak）女性主義，對台灣女性運動有相當大的貢獻。雖然，文婷對女性運動有誠大的貢獻，毋過，伊認為佇台灣欲提升女性的地位，干單偎靠社會運動猶無夠，必須愛運用政治的力量才會使。所致，落尾伊加入小民黨，捌兼任中央黨部婦女部主任。後來，佇小民黨唯一提著中央政權彼回，伊捌被派任做總統府副秘書長。最後，小民黨佇立法委員佮總統選舉相連續大失敗，黨內眾頭人無甲一個願意擔責任的坎站，方文婷因為佇大學教冊的年資已經夠額，伊規氣向學校辦退休，勇敢跳出來擔當黨主席的重擔。這幾冬來，因為伊的用心投入、搰力拍拚，小民黨的氣勢閣逗逗仔復原，有機會參大國黨捙拚。
現此時，方文婷55歲，這世人毋捌親身參選的伊，經過久長的思考，決心欲潦落後一屆總統選舉。
3.兩個查某人的戰爭
這回總統選舉，是小民黨不止仔有拚面的一擺。
現任總統唐惠三執政這幾冬來，因為積極開放的政策，施政步步攏偏偎中國，造成台灣袂少製造業的工場徙去彼爿（pîng）設廠，使致手面趁食的中下階層失業率一冬比一冬較懸，濟濟人民早就活甲艱苦罪罫。毋那每一角勢街頭巷尾的遊民愈來愈濟，內中出現袂少永過罕得有的少年家仔，閣較悽慘的是生活袂得過的老爸、老母掣囝兒序細自殺的新聞，三、兩工仔就踮報紙頂面演出一擺。發生遮的講會了袂盡世間悲苦的代誌，社會大眾的感受上界深，嘛定著會給這筆數（siàu）算佇執政的大國黨佮唐惠三身軀頂。
這擺總統選舉小民黨的黨內初選，寢頭仔濟濟媒體佮支持者攏看好捌做過市議員、立法委員、縣市長佮內閣部長的楊崑山，認為伊的聲勢不止仔懸，若由伊掛頭牌佮穩當得著大國黨提名的唐惠三捙拚，贏面相當大，就連所謂統派媒體做的民意調查，小民黨內上界有可能拍敗唐惠三的人選嘛是楊崑山。不而過，佇楊崑山通台灣島行透透，士農工商四界拜會，黨內外攏掠準伊隨時會發表參選聲明的情形下，伊煞顛倒予眾人的目鏡摔甲碎糊糊。
佇黨內初選開始登記的前一日欲暗仔，伊的幕僚臨時臨要用簡訊通知各媒體記者，講彼暗七點楊崑山欲佇圓山仔大飯店召開記者會。接著通知的媒體攏盡全力調派記者去圓山仔大飯店，幾間較大間的電視台甚至派出SNG車現場實況轉播。一陣記者拚到位，隨人手裡攏提著一份新聞稿，有的記者看著頂面的標頭「楊崑山退選聲明」，差一屑（sut）仔頭殼烏暗眩（hîn），叫是目睭看重誕（tîng-tânn）去。
七點一到，身穿殕（phú）色西裝的楊崑山出現佇記者會現場，發表短短五分鐘的退選聲明：「各位全國的鄉親序大，各位媒體記者朋友逐家暗安。本人楊崑山佇遮欲正式宣布退出總統選舉小民黨的黨內初選。減采各位會感覺誠怪奇，想講崑山仔你毋是已經準備誠久，嘛有相當的人氣，是安怎雄雄喝退選就退選。到底受著啥物款壓力，抑是提著啥物人的好處？我佇遮欲慎重向各位保證，崑山仔參與政治二、三十冬來，上界驕傲的代誌就是清廉袂烏紗。閣再講，我佮各位仝款嘛是世俗人，若講我無想欲做總統彼（he）是騙人的。既若安呢，是安怎我欲退出總統初選？原因誠簡單，小民黨本底就無親像大國黨遐呢好額，有濟濟黨產通好拍派，尚且頂屆總統初選逐家刣甲流血流滴，使致大選的時輸甲褪褲。崑山仔相信，本人退選了後，只要逐家真心團結，作伙支持出線的候選人，這回咱提著政權的機會相當大。恁若問講：以後你有啥物拍算？崑山仔向各位報告：我會繼續行台灣路，為台灣的環保佮公益拍拚。」楊崑山聲明講煞，隨離開記者會現場，留落飄撇的形影。
楊崑山宣布退出黨內初選的隔轉日。
早起十點，捌受白色恐怖迫害，夆關踮內籬仔三冬的杜春滿，由一陣黨內老輩陪伴，到小民黨中央黨部登記，正式宣告參與總統選舉黨內初選。登記了，杜春滿發表簡單的參選聲明：「各位鄉親、各位女士、各位先生，今仔日杜春滿佇遮正式宣告投入總統選舉黨內初選。逐家攏知影，春滿這一生絕大部分的時間，攏投入台灣民主改革的空課，雖然毋敢講有偌大的成就，總是佇我行過的一步一跤印裡，有咱台灣人鬥陣拍拚的血汗踮內面生湠。過去所受的苦難往往會成做咱重頭生的喟力，這擺是春滿一生中最後一遍參與選舉，我會照品照行。設使初選的結局，鄉親同胞認為我無合時代的潮流，袂當掣領台灣人民行向開闊的新天地。我會誠心祝福出線的同志，並且佇對方需要的時陣，盡我個人淡薄仔喟力，助伊完成最後的勝利。」
彼日下晡兩點，小民黨新生代政治人物，現任的黨主席方文婷，佇一陣各行各業的少年家助贊之下，正式請假投入黨內初選。伊登記了後，相像發表參選聲明：「各位鄉親序大、各位黨內先進、各位媒體先生女士，我方文婷佇這個所在正式宣布投入總統大選黨內初選的行列。對參與政治這項事工來講，佮濟濟前輩相比併，文婷會使講是一位新手，對過去台灣的民主運動嘛無啥物貢獻。不而過，每一個時代攏需要無仝款的人才來建設國家、掣領社會大眾行向閣較美好的未來。這是一個新時代，袂當閣用舊時代的思維來治理咱的國家。減采恁會問我：妳是一位政治界的新人，阮憑啥物相信妳若做總統，會當為台灣人帶來幸福。雖然，文婷過去較罕得參與政治活動，毋過，這幾冬來我擔當反對黨主席，綴前輩的跤步認真拍拚，所得著的小小成果，相信各位攏看在眼內。所致，我踮遮誠心懇求各位鄉親、黨內先進支持我代表小民黨參與總統大選。嘛向望佮其他參選先進和平競爭，作伙團結對外，爭取最後的勝利。」
佇杜春滿、方文婷先後登記參與總統選舉小民黨黨內初選了後，一直到甲登記截止日，攏無其他的黨內人士閣再登記。對小民黨來講，總統初選這局成做兩個查某人的戰爭，也就是講無論最後由杜春滿抑是方文婷出線，註定這屆代表小民黨參與總統選舉的人選確定是女性。講較白咧，設使未來代表小民黨參與總統選舉的人選，會當得著多數人民的支持，拍敗大國黨爭取連任的唐惠三，安呢，台灣將會歷史性出現頭一位女總統。
雖然講是兩個查某人的戰爭，毋過唯杜春滿佮方文婷的參選聲明來看，會當講攏不止仔平和，一絲仔火藥味都無。因為怹雙方攏清楚認捌一項事實，面對大國黨這個財產億來億去的大怪獸，尚且對手閣是現任的執政者，團結都無的確有贏面矣，若閣親像頂回仝款，佇黨內初選就刣甲血湤（sai）湤，安呢毋那提早束手投降，閣較對不起久年以來一路相挺的台灣鄉親。
這回小民黨總統選舉黨內初選的規則佮永過無相像，經過黨內各派系佮重要頭人開會協調，通過全然以民意調查的方式來決定代表黨的總統候選人。雖然寢頭仔杜春滿佮伊的支持者並無贊同這款初選方式，不而過，當當（tng tang）伊決定參與黨內初選彼時起，就給本底的成見暫且放下，接受多數人的共識。佇杜春滿登記初選了後佮黨內電話民調開始彼段期間，事實上伊有差派幕僚私底下做幾落擺民調。唯彼幾擺民調的統計資料看起來，伊的支持度猶差方文婷有一節仔，佮唐惠三相比併，嘛無偌濟贏面。所致，佇黨內電話民調進前，杜春滿公開宣告退讓，成全方文婷成做小民黨總統候選人。
方文婷唯電視頂面看著杜春滿公開退讓的新聞，感動政治前輩無私的腹腸，隔轉工隨佮競選幹部作伙去杜春滿的辦公室拜會，順續好禮邀請杜春滿擔當伊競選總部的總幹事。杜春滿感受著方文婷的誠意，無第二句話隨抌（tìm）頭答應。
4.小民黨揠倒大國黨
因為杜春滿相讓，使致方文婷佇黨內初選輕鬆得著代表權，會當代表小民黨參選下一屆總統大選，直接挑戰欲爭取連任的唐惠三。
方文婷真知，擔當伊競選總部總幹事的杜春滿嘛真知，欲參與這項全國性的大選，以小民黨有限的資源欲揠（ián）倒大國黨的確無遐呢簡單。杜春滿佇頭一擺幹部會議裡，提出伊心目中會當拍敗唐惠三的計智：「咱的資源雖然無法度參大國黨相比併，毋過，這碼是網路時代，咱若好好仔運用網路的傳播力量，毋那省本多利，閣會當吸引濟濟頭擺有投票權的少年家。咱除了愛趕緊設立競選blog佮加入Facebook以外，嘛會當組織小婷鐵馬隊，無定著會當小兵立大功。」
聽杜春滿給伊的計智講了，方文婷隨接落表示伊的看法：「春滿姊的想法真合現此時的時代潮流，咱有需要隨時成立網路部，」方文婷目睭相唯在場青年幹部葉秋香的方向，「秋香，以後網路方面的事務就勞煩妳來負責。若有拄著啥物困難抑是需要支援的情形，直接給春滿姊抑是我本人反應。」葉秋香面仔笑笑給方文婷抌一下頭。「另外，關係小婷鐵馬隊的部份，請春滿姊詳細講予逐家知。」
「各位，我會建議組織小婷鐵馬隊，頭一個原因是咱的地方組織無親像大國黨遐呢嚴密，隨時喝欲有人就有人，喝欲有錢就有錢，毋過咱會當透過青年志工，十個人一組，佇各所在、各鄉里，甚至各社團宣揚咱的理念。第二個原因是我認為騎鐵馬助選，併用其他交通工具較有法度深入街頭巷尾，直接佮選民跋感情。第三，騎鐵馬毋那會當同時推搡環保概念，嘛挺好兼顧運動健身的功能。」杜春滿誠有自信講出伊欲組小婷鐵馬隊的想法。
「春滿姊給小婷鐵馬隊的idea講了誠詳細，嘛不止仔有道理。安呢，鐵馬隊的組織空課就勞煩智勇去發落。」方文婷指派洪智勇組織鐵馬隊的任務。
佇大國黨這爿面，怹靠勢黨產濟、本錢粗，猶原按算運用永過彼套掖錢、綁柱仔跤的模式來競選總統。唐惠三本人除了是現任總統，嘛兼任大國黨黨主席，伊的競選總部總幹事佮伊頭一回選總統的時相像，由伊的死忠兼換帖、大國黨秘書長丁耀聰擔任。唐惠三的競選總部成立彼工，大肆機邀請中央政府濟濟大粒攄（lu）的政府官員、大國黨執政的縣市長、各財團的負責人等等腳（kioh）數，現場看起來金光閃閃，各媒體記者的閃光燈熾袂離。彼日中晝，成立大會了，現場備辦歐式自助餐會，袂輸欲夆食免驚的仝款。
隔轉工，丁耀聰佇大國黨中央黨部召集各縣市黨部主任委員開輔選會議。會議一開始，丁耀聰先踏話頭：「各位縣市黨部主委，這擺總統大選對咱大國黨的重要性，相信免我加講逐家攏知。雖然咱佇北部一直攏佔贏面，毋過咱贏對手的葩數逗逗仔咧接近；阿若講著南部，天就強欲烏一爿，這幾冬來咱輸甲差不多欲褪褲。請各位講看覓，恁有啥物好辦法？」
台南市黨部黃主委發言：「秘書長，我咧想咱中央這幾冬來過頭重視北部，黨的高層平素時仔罕得來下港行踏，到甲欲選舉的時，才來給民眾討選票，安呢，南部的鄉親會感覺咱一點仔都無咧重視怹。我建議，黨中央愛較捷安排唐總統落來南部佮民眾直接面對面盤撋（núa），嘛愛加撥寡經費予地方黨部、黨內的立委、議員佮柱仔跤，安呢嘛較好辦代誌。」黃主委給正手大頭拇佮二指（tsáinn）偎作伙，比箍箍的手勢。
高雄市黨部主委、屏東縣黨部主委、嘉義縣黨部主委佇台南市黨部黃主委講煞了後，攏接續發言給伊贊聲。
小民黨方文婷陣營佇杜春滿捍（hūann）盤之下，一開始就展現佮大國黨嶄然仔無仝的競選模式。怹無親像唐惠三陣營仝款，佇全國各地給競選旗仔插甲颺（iānn）颺飛、滿滿是，顛倒透過小婷鐵馬隊一步一跤印行入大街小巷，宣揚怹的競選理念。減采因為這款佮傳統競選模式無仝的運作，無法度隨時引起媒體效應，所致，佇寢開始競選彼幾月日，唯各單位所做的民調看起來，方文婷大體上猶輸唐惠三有一節仔。不而過，時間愈來愈逼近了後，全國各地接觸著小婷鐵馬隊的人愈來愈濟，因為贊同怹的理念，自願加入鐵馬隊的民眾嘛愈絞愈大陣；另外一爿面，透過網路佇空中無界限的傳播方式，逗逗仔影響一寡原底無關心政治的少年人。開始競選量約半冬跤兜，已經有袂少民調顯示，方文婷佮唐惠三的支持度有來有去，雙方袂輸佇誤差範圍內面咧扭（giú）大索相像。
若照永過的經驗，小民黨支持者的表態率一向併大國黨的支持者低誠濟，既若雙方民調佇誤差範圍內咧扭大索，這款現象就表示講：佇正式投票的時陣，唐惠三輸予方文婷的可能性不止仔大。一般的（tik），佇總統這款全國上界大場的選戰裡，執政黨只要多數的施政得著人民的支持，欲爭取連任會當講若像咧桌頂抳（ni）柑。毋過，偏偏仔唐惠三頭一屆任期裡的所做所為予人看破跤手，親像伊大細項代誌攏偏偎中國這項，就予袂少人氣甲頭殼蒸（tshìng）煙，閣較傷重的是，這幾冬的失業率直直衝懸，特別是手面趁食的中下階層，猶閣有初出社會的少年家仔，無頭路的滿四界，你叫遮的人票哪頓（tǹg）會落去？
到遮來，大國黨唐惠三陣營嚴重感受連任的危機，嘛驚一個無細膩，誠無簡單拍落來的江山就愛讓予對敵。唐惠三本人因為安呢，煩惱甲頭毛白幾落枝，為著上鏡頭好看，伊差派下跤手人請美容師替伊給頭毛染予烏森（sìm）森。另外，唐惠三嘛利用執政的優勢佮資源，四界掖錢踮各大媒體做置入性行銷，強迫全國民眾便若拍開電視、展開報紙，自然的（tik）就愛接受伊這款變相的廣告。閣再講，伊嘛利用總統的職權，逐工坐專機台灣頭台灣尾溜溜去，四界拜會伊的柱仔跤，從事競選的行為。
這擺總統選舉，方文婷陣營主攻環境保護佮社會福利議題。佇環境保護方面，最近這幾冬來，濟濟台灣人對過去損斷土地的行為漸漸覺醒，環保概念提昇袂少，嘛實際落實佇日常生活裡。特別頂回日本大地動引起核能外漏的危機，予台灣人對大國黨一再為核能發電辯解的行為感覺不止仔倒彈，這拄好使致反對核電廠繼續運轉的小民黨得著閣較濟民眾的支持。另外，自底小民黨的支持者就是中下階層的人民佔多數，一直以來遮的人佇經濟頂面攏是弱勢者，閣再加上唐惠三執政這幾冬來，干單一寡財團趁錢趁甲油洗洗，弱勢者猶原是怹選舉時騙票的對象，濟濟人早就為頂回投票予唐惠三感覺後悔。佇這款情形下，方文婷陣營積極推搡發展社會福利的政策，自然的（tik）受弱勢者支持佮歡迎。
總統選舉的氣氛綴投票日逼近愈來愈熱。雖然逐四界風聲謗影，喊講唐惠三陣營的柱仔跤咧買票，不而過，各地檢署檢察官攏以查無實際證據回應眾人的梟疑。仝時，小婷鐵馬隊的成員除了拚勢宣揚方文婷的理念以外，嘛佇街頭巷尾積極收集對手買票的證據。
總統選舉投票日佇三月天上尾彼個拜六舉辦。因為雙方攏透過支持者大動員，閣再講彼日大好天，所致，逐所在投票所排隊欲頓票的人是排甲塞塞滇，投票所的工作人員連欲食一嘴仔便當都揣無閬縫。所有投票的動作佇下晡四點做一個收束，續落來隨展開開票的空課。佇開票的過程裡，透過各電視台實況轉播，雙方支持者的心情綴咧起起落落，若報著北部投票所開票的情形，大體上是唐惠三佔贏，鏡頭若徙到南部投票所，方文婷的得票率絕大多數攏懸過對手；這款起起落落的情形一直到甲暗頭仔六點，票箱已經開超過90%，雙方的票數猶佇成萬票跤兜浮浮沈沈，這款緊張刺激的氣氛，使致雙方陣營佮支持者的心臟攏強欲趒（tiô）出來；煞尾遐的票數有一大部分攏佇中部，頂回總統選舉唐惠三佇中部大贏對手的狀況，這擺毋那無閣重演，顛倒佇幾落位大票倉輸予方文婷，離開票愈接近尾聲，方文婷贏唐惠三的票數愈絞愈濟；最後，六點三十二分所有票數齊開了，現任總統大國黨唐惠三輸予挑戰者小民黨方文婷十萬一千外票，投票率82.4%。
5.奸鬼的秘密會議
唐惠三佇總統選舉開票結果輸予方文婷了後，並無出現佇競選總部佮大國黨中央黨部，干單透過競選總部總幹事丁耀聰對外發表「祝福競選對手，尊重選舉結果」的簡單講話。
一禮拜後的暗頭仔，唐惠三官宅的埕斗停四、五台烏頭仔車，唯外面看入去，會當看著二樓的燈火通光，佇遐當咧進行一場秘密會議。官宅的門嘴佮欲入去一樓大廳的外面攏有侍衛咧顧守，佇遐食頭路的下跤手人攏已經下班，干單留總管踮現場僎（tshûan）茶水佮點心，發落甲差不多，唐惠三給總管使一個目尾，伊隨行落樓跤恬恬仔離開現場。
這場官宅的秘密會議由唐惠三親身主持，參加的人員有副總統林清波、行政院長胡正道、總統府秘書長鄧國慶佮大國黨秘書長丁耀聰。會議一開始，在來予媒體塑造成做溫純個性的唐惠三激一個面腔、頓椅頓桌，「各位，恁誰會當給我講，咱所做的民調毋是講百面贏的，是安怎閣會輸予對手超過十萬票？」
「唐總統，咱做的民調資料顯示咱確實會贏，毋過，」丁耀聰掠唐惠三看一下，續咧講：「一向小民黨支持者表態的比率就併咱較低，民調的數字難免會有增差。上界主要的原因，咱這回佇中部輸甲拖屎連，可能是因為台中市蕭市長頂回選舉差一屑（sut）仔輸予對手，當選了後閣捷捷出包，莫怪會輸遐呢濟票。」
胡正道接續丁耀聰的話尾：「這個蕭市長做代誌無半撇，干單會曉佇媒體面頭前弄嘴花，」唐惠三聽著這句話，面裡的表情嶄然仔歹看，「話講倒轉來，伊是民選的地方首長，咱嘛無才調給伊揪落台。」
「就準講這碼會當給伊揪落台，嘛無法度挽回咱已經失去的票聲。這陣離總統交接偆無到兩月日，續落來咱應當來討論交接的事項。」唐惠三講。
「唐總統，我建議政府交接小組的召集人由鄧秘書長擔任。」行政院長胡正道驚去承著這項歹空的穡頭，先下手為強，給責任搡予總統府秘書長鄧國慶。
「鄧秘書長，關係承接政府交接的空課，你有啥物意見？」唐惠三問鄧國慶。
鄧國慶先給胡正道凝（gîn）一下，續落講：「報告總統，本人誠榮幸佇擔任政府工作最後的時刻，會當承接這項重要的空課，續落來，我會趕緊召集各單位首長佮幕僚組織相關的小組，隨時向總統報告進度，給政府交接的空課辦予好勢。」鄧國慶正面回應唐惠三。
「林副總統，閣無偌久你就愛參我作陣退出政壇，毋知你有啥物話欲講？」一直坐佇邊仔恬靜無聲，佮唐惠三作伙競選連任失敗的林清波，予唐惠三點名講話。
「唐總統，這擺競選失敗，我個人感覺真對不住你，是我拍拚無夠。另外一方面，這四冬來會當佮總統共事，是我這一生中上界美好的回憶。我個人按算退休了後欲參與公益活動，毋過，唐總統你猶閣少年，應該繼續留落來掣領大國黨。」佇政壇浮沈四十外冬的林清波，真知影刀切豆腐雙面光的道理。
文章定位：
