春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　小學六年彼冬。雙十節，老師喚伊參加縣政府辦的慶祝活動，規定逐个人手裡愛攑一面小國旗。

　　轉去厝裡共老母討錢，老母干焦幌頭，目屎無聲無說津落來。

　　彼日落大雨，伊攑一枝烏雨傘去校門口集合。老師看伊無紮小國旗，共揌一下喙phé，罵一聲「番仔」。

　　伊那哭那踅翻頭。路裡，雨傘予大風搧甲斷骨。到厝，老母佮伊攬咧做伙哭。

　　十八歲生日，老母對生鉎的鐵盒仔裡提出一張反黃的紙。

　　伊佇頂面看著種族欄寫一字「熟」，老母共伊講咱是Siraya，族名號做Uma。

　　老母過身進前，佇病床頂共伊講阿公是二二八受難者。

　　了後，伊投入Siraya佮二二八的調查研究。

　　昨暝。佇夢中，伊看著一面車輪旗仔，佇大雨裡搖來幌去，紅色血水一直滴落來，四箍輾轉攏是烏雨傘。

 

──2015.10.10寫佇赤崁南門仔

    2016.4《台文戰線》第42號