彼工透早七點，張日昌ùi台北車頭坐慢車起行，kho̍k欲kah兩點鐘，誠無簡單佇九點跤兜kho̍k到大甲車頭。這日拄好咱人3月23媽祖生，張日昌行出大甲車頭的時，街仔路人群挨挨陣陣，信眾一個續一個，kā本底無偌闊的街路塞kah隘擠擠，迎鬧熱的陣頭無時閒，鼓吹聲歕kah ta-ta-ti-ta-ta、鑼鼓聲tong-tong-long-tong-tshiang響無停，媽祖坐踮鑾轎頂，予體格武頓的轎夫扛前退後搖搖晃晃，晃kah三月的春天袂輸熱情的姑娘仔咧跳Waltz。遮的影像張日昌自細漢看到大漢，熟似kah有偆。不而過，伊無欲參人鬥鬧熱，這畷回鄉伊干單一個目的，就是欲佮伊的阿母告別。這時，天拄咧落霎霎仔雨，張日昌無紮雨傘，只好kā身軀頂彼領薄厘絲的外衫，扭懸起來嵌咧頭殼頂遮雨。雖是講伊行佇人kheh人的群眾內底，不而過，伊真清楚知影，彼兩個剃五分仔頭、穿phú色siat-tsuh、烏色西裝褲的爪耙仔，一畷路ùi伊台北徐州路的徛家綴來到遮，綴kah牢牢牢，一點仔都無走閃；伊知影這兩個mooh壁鬼，這陣佇離伊成十公尺遠的所在咧kā跟蹤，伊無kā in拍青驚，nǹg過人陣，大伐大伐行向舊厝。
三冬來，夆監視、跟蹤的日子，對張日昌來講，檢采早就是伊生活的全部。
五冬前，張日昌佮台大法律系同事吳國泰，因為對國民黨久長以來威權統治看袂做咧，共謀作伙動筆「台灣人覺醒宣言」。佇成萬字宣言內面，in控訴國民黨統治台灣二十冬來，無自由、民主、人權，尚且攬抱一個中國的神主牌仔，毋那佇國際上行袂出去，最後甚至所有台灣人攏愛成做陪葬品。In主張總統佮國會攏愛全面由台灣人民直選，這款行為袂輸公開咧佮蔣介石嗆tù、出力搧伊的腹肚邊。彼當陣，張日昌佮吳國泰攏是台大法律系教授，尚且張日昌閣兼系主任，in兩人成做高級知識份子，當該然知影代誌若出破，輕者關kah頭毛嘴鬚白，重者恐驚會夆送去塗州賣鴨卵。
代起先，張日昌、吳國泰欲動筆寫宣言進前，先kā內容參詳好勢，續落雙頭分開寫，煞尾才由張日昌潤筆定稿。佇書寫宣言的過程裡，in為著防備漏洩風聲，連家己的牽手嘛毋敢予in知影。所致，逐暝in攏佇某囝睏ka-tsūe了後，孤身獨影坐踮暗sàm的燈泡仔跤，一筆一劃若像咧寫遺書的心情仝款，前前後後欲規半月日才tshiâu-tshik好勢。
這段期間，張日昌暗暗仔探聽佗位有較在穩可靠的印板店，誠無簡單ùi in大細siān-ê榮仔的嘴裡，問著艋舺剝皮寮巷仔內這間無tshāi khân-páng的印板店。這日早起，貯半碗糜扒無兩嘴，伊就kā牽手純真講今仔日學校有要緊的代誌，無量早出門袂使。踏出戶碇，張日昌tann頭看著拄欲nǹg出雲ang的日頭，伊kā siat-tsuh的頷領抾予齊整，大伐大伐行出巷仔口，拽一台計程仔，直透駛到艋舺剝皮寮。到印板店的時才七點半較加，頭家猶未來開店門。張日昌只好先提拄才佇路口買的《徵信新聞報》出來掀掀看看咧，一直等到七點五十五分，中年人款勢的頭家財仔才將鐵thuah門扭開。
等財仔kā鐵門thuah好勢，張日昌綴咧踏入店裡，好禮仔kā財仔千吩咐萬交待，講這份資料印好了後，絕對袂使漏洩出去，伊願意予in一般行情重倍的價數，雙方約束三工後的欲暗仔交貨。時到日到，張日昌佮吳國泰倩一台計程仔作伙去印板店載貨，為著驚予厝裡的人操煩，in kā兩大箱的「台灣人覺醒宣言」載到西門町一間踮佇巷仔內的細間旅社，當tang in兩人咧參詳欲按怎kā遮的宣傳單順序分出去的時，警備總部人員接著密報來撞房間門，現拄現抄著猶閣燒燙燙、連一張都猶未分出去的「台灣人覺醒宣言」。這聲，張日昌才致覺，印板店頭家為著有額的奬金出賣in，予警總人員押出旅社門嘴的時，張日昌心肝內暗靜仔喝出：「敢講這就是人性？」
張日昌的老母雲仔，坐踮tshāi佇簾tsînn跤的椅橑頂，一針一線咧紩年久月深已經離線tsūe的衫褲。歲頭食到六十外的雲仔，目睭猶原金tang-tang、無較輸少年家仔，穿針、引線項項攏家己來，毋免勞煩序細。天裡猶咧落叮叮噹噹、規早起無時停的霎霎仔雨，衫紩一睏，雲仔tann頭，拄好看著頭殼頂嵌外衫遮雨的日昌出現佇伊面頭前，出嘴喚：「日昌仔，你今仔日哪有閒通轉來？食到大人大種矣，阿袂曉紮雨傘，囥咧hoo湳。你看你沃kah規身軀。」雲仔那講那跨過戶碇，提一條面巾仔出來，予日昌拭焦沃kah澹漉漉的頭毛。
「阿母，我想講已經誠久無轉來看你矣，今仔日拄好咱大甲媽祖生、鬧熱擺，一透早我才臨時臨要決定欲轉來一畷，所致，袂赴先kā你通知一聲。早起出門雄雄狂狂，尚且台北好天無落雨，我遂袂記得紮雨傘。」張日昌那拭澹溼的頭毛那佮老母講話。
「是講日昌仔，你最近看起來有較瘦淡薄。」雲仔那講那用伊的雙手頂頂下下摸日昌的身軀，話語裡含帶成做一位老母對囝兒的毋甘。
「阿母，你免煩惱，我過了誠好。」日昌用伊的手蹄仔la̍k老母的手蹄仔。
雲仔清楚知影這是日昌驚伊厚操煩，出嘴安慰伊的搭心話。
五冬前，日昌因為「台灣人覺醒宣言」案件受掠關監，落尾，蔣政權受國際壓力佇兩冬後kā伊特赦。自彼陣起，統治者就一日二十四點鐘差派幾落個跤手輪流監視伊、kā伊顧牢牢。就連這陣伊轉來故鄉看老母，嘛猶閣派兩個生鉎面的ng-ng-iap-iap咧厝外監視。這一切，雲仔攏看在眼內，毋過伊嘛無任何法度通好替伊排解，想著遮的代誌，雲仔定定匿踮房間仔底目屎四湳垂。
其實，雲仔毋知的是，這擺母仔囝見面，檢采是in這世人最後一擺作伙的機會。日昌毋敢予老母知影，佇伊的心肝內有一個脫出台灣的計畫當咧進行。
四十冬後，張日昌佇伊回憶錄《失蹤》新冊發表會的會場，用感性的口氣講出伊心肝內上深的疼：「彼日，我真清楚會記得是咱人3月23媽祖生，我最後一擺轉去大甲看阮老母，我毋敢予伊老大人知影我欲脫出台灣的代誌。我強忍含佇目墘的目屎，毋敢hoo滴落來，因為我驚阮老母若知影這一切來艱苦心，我泛勢會行袂開跤……」講到遮，張日昌已經哭kah規個面全目屎，感動濟濟現場的讀者，特別是佮伊頂下歲仔彼沿的老大人。
彼暗，張日昌佇大甲祖厝參老母雲仔作伙食暗頓了，才坐火車倒轉去台北。路裡，ùi台北綴伊來大甲彼兩個警備總部派來的便衣爪耙仔，相像一路綴牢牢，一直綴到徐州路的徛家厝才準拄煞。張日昌轉到厝裡了後，伊知影佮親人離別的時日已經臨到目睭前，心肝底透濫各種鹹酸苦澀的情緒，腦海內袂輸一陣海波浪滾絞無停，連鞭湧起連鞭湧落，一時鬢邊siak-siak叫，伊為著予心情會當較平和，ùi椅仔頂徛起來，逗逗仔吸氣、吐氣、吸氣、吐氣……，過一搭久仔，規個人才恢復平靜的心緒。暗時十點跤兜，張日昌kā讀初中的查某囝惠萍佮讀小學的後生志堅喚來伊的冊房，伊叫in兩人偎壁徛挺挺，伊欲替in量身懸。
志堅的性癖在來較活骨，伊一時好玄，出嘴問日昌：「阿爸，你永過都毋捌kā阮量過身懸，盈暗哪會喚我佮阿姊來予你量身懸咧？」
日昌強忍心內離別的哀愁，用慈愛的眼神看伊的後生、查某囝，出手勻勻仔挲囡仔的頭殼：「憨囡仔，因為恁tsit-má當咧大，阿爸想欲逐年替恁量一擺身懸，thìng好紀錄恁成長的過程。」
身懸量了後的結果，惠萍162公分、志堅155公分。兩個囡仔量完身懸kā老爸講暗安，就隨轉去房間睏。In兩人走了後，日昌兩蕊目睭金金相壁頂粉筆畫的記號，袂輸欲kā這片紀錄囡仔成長過程的壁看hoo thàng過。這暝，張日昌失眠矣，倒咧眠床頂反來反去、仙睏都睏袂ka-tsūe，伊只好閣轉去冊房讀冊消耗時間。半暝三點伊入去囡仔房間替in蓋被，離開進前最後一擺看in幼秀的面容，伊分別佇兩個囡仔的額頭唚落愛的印記。閣轉去冊房，眠眠中仆踮冊桌仔頂睏去。透早五點thóng，天未拆ha̍h，張日昌趕緊起來，隨手整理一下仔，就捾一kha kha-báng貯簡單的行李，行出家門。
此去，張日昌佇他鄉外里飄浪二十外冬。落尾，國民黨政權解除烏名單，伊才會得回歸故鄉。
張日昌自大甲轉來，一路kā伊綴牢牢彼兩個爪耙仔，看伊沿路乖乖無變鬼變怪，自按呢防備的心有放較līng，彼暝無喚人接班繼續監視。隔轉工開始，輪流監視伊的統治者爪牙，攏無看見伊的形影出現佇目睭前，原底in掠準張日昌只是畏出門留踮厝裡，毋過經過成禮拜仝款無動無靜，in心內不得不起hiâu疑，致覺伊可能已經脫出台灣。警備總部四界調派跤手走揣伊的形蹤，毋過，就準講kā規個台北市、甚至全台灣反透透，嘛揣無一絲仔影跡。In kā張日昌的某囝、親晟、朋友、同事規綰人召去探問，無kah一個人知影伊到底走去佗位？甚至in嘛差派人去大甲探問張日昌的老母，到遮，雲仔才知影頂畷日昌轉來看伊，檢采就是欲暗暗仔佮伊相辭，雖然，心肝內毋甘這世人恐驚無緣閣參日昌見面，不而過，kā想較開化咧，日昌脫出台灣就毋免閣一日二十四點鐘受人監視，去到新天新地了後，定著會有新的發展，囝孫自有囝孫福。嘛因為按呢想，雲仔心肝底才得著淡薄仔安慰。
發現張日昌脫出台灣了後，負責一日二十四點鐘監視伊的警備總部，頂頂下下袂輸得著ma-la-li-a仝款拍寒拍熱，驚發落無好勢頂頭會重重怪罪落來。所致，in真慎重佇博愛路的警備總部保安處召開秘密會議，檢討張日昌到底是利用啥物管道脫出台灣？會議由肩胛頭掛一粒星的處長周少將主持，參加的人員有副處長傅上校、組長李中校、組員成參謀等人。
會議一起鼓，生做人懸漢大、目睭仁細kah袂輸鳥鼠仔目的周處長，規個面腔luah落來，聲嗽無通kah偌好：「各位同仁，這擺張日昌脫出台灣的代誌，聽講大頭家誠受氣，徛佇咱的立場會使講是滿面全豆花，若舞了無好勢，咱幾個人的烏紗帽恐驚會夆剝落來，恁隨個啊隨個講看覓，張日昌到底是有啥物飛天鑽地的本領？」周處長話講煞，用伊彼兩蕊鳥鼠仔目kā在座其他的人掃一遍，才閣khiat番仔火kā薰點灼。
牽一枝烏框目鏡、面肉幼白書生款、體格中扮的副處長，奸臣仔笑對逐家講：「各位，我認為這擺的事件，若毋是美國當局佇張日昌的尻脊後予伊靠勢，憑伊一個手無縛雞之力的讀冊人，哪有遐呢簡單就脫出台灣？」副處長用手thuh一下仔目鏡，續落講：「我若臆了無毋著，張日昌檢采是受美軍掩護，ùi台中清泉崗機場偷走出去。」
皮肉烏lu-lu、漢草武頓武頓的李組長，續接副處長的後面發言：「我有詳細kā想過，張日昌敢會經過化粧，提假護照ùi松山機場大扮大扮行出去？」
一直注神聽長官講話的成參謀，佇李組長分拆了後無隨續接發表意見。周處長按耐袂牢，土公仔性隨夯起來，指名成參謀講話：「成參謀，你對這件代誌有啥物看法？講來予逐家鼻芳一下。」成參謀停睏幾秒鐘了後講：「我咧想，張日昌真有可能買收船頭家坐桶仔出去，伊可能坐桶仔脫逃的地點有南寮漁港、布袋港抑是安平港，內中以安平港的可能性上界懸。」
等候三個下跤手人講完家己的意見，周處長kā伊手裡的薰ku̍eh仔ù hoo熄，清兩下仔嚨喉，收束伊的結論：「恁所提出的意見攏真有可能性，毋過，咱欲寫予大頭家看的檢討報告佮發予媒體的消息千萬袂使凊采，愛掠重點來講，這層代誌就交予傅副處長來打tiap一下。散會。」
成禮拜了後，參加這場保安處秘密會議的四位警總幹部，攏受大頭家記過、調職處罰，不而過，處長的職務暫且由副處長傅上校代理。一月日後，斯當時的大報《中央日報》、《台灣新生報》佮《徵信新聞報》，刊出前台大法律系主任張日昌，因為從事獨立運動、預謀推翻政府失敗，脫出台灣的消息。特別佇分拆張日昌脫逃的原因頂面，三份新聞紙不止仔合齊，攏寫講上有可能的原因是張日昌背後有美國予伊靠勢。
島內的新聞刊出張日昌脫出台灣的消息隔轉工，瑞典的《國內郵報》就踮頭版大篇幅報導張日昌已經佇兩禮拜前安全來到瑞典，接受政治庇護。續落來，幾份國際大媒體，親像美國的《紐約時報》、英國的《泰晤士報》、法國的《世界報》嘛報導張日昌安全脫出台灣的消息。不而過，遮的報紙攏無報講張日昌到底利用佗一款管道脫出台灣。蔣政權當局知影張日昌成功佇瑞典徛起的消息，氣kah頭殼強欲蒸煙，規腹肚火無地消敨。毋過，彼當時瑞典早就參蔣政權斷交、尚且in已經接受張日昌政治庇護的緣故，統治當局想欲引渡張日昌回轉台灣，恐驚phīng登天閣較困難。
張日昌厝裡這爿面。伊的牽手純真佇翁婿離開家門彼一日，伊的第六感就kā家己講，日昌檢采已經脫逃矣。總是，伊真正毋知影日昌到底闖去天邊抑是走到海角，一直等到親目睭看著媒體報導，伊才確定這一切毋是眠夢。瑞典，對純真來講，只是一個離開台灣萬里遠的北國，永過干單捌聽過伊的名，透世人毋捌想講有一日會踏跤到；這陣，伊的翁婿遂因為閃避政治迫害的緣故，去到這個離伊萬里遠的冰雪北國。「伊佇遐毋知食有飽、穿有燒否？」因為極其掛心日昌踮佇他鄉外里的處境，純真的心緒一時tik遂茫茫渺渺，親像佇大海裡飄流的小帆船，毋知欲駛向何方？佇掛心日昌的同時，純真腦海內的記智，一時仔隨陷入二十冬前in初熟似彼時的景緻。
斯當時，張日昌拄仔ùi台大法律系卒業無偌久，陳純真才19歲當咧讀師範學院藝術系。透過純真表姊林如玉牽線，兩個人佇彼個閉思的年代頭一擺面對面。純真猶會記得，he是一個初春的下晡時，表姊kā in約踮西門町彼時猶誠罕有的咖啡廳。如玉紹介in雙方熟似了後，就藉口厝裡有代誌先行開跤。
日昌為著無愛予干單偆in兩人的現場氣氛堅凍，展現紳士的飄撇風度代先開嘴：「陳小姐，真歡喜熟似你。我的故鄉踮佇大甲，阮老爸一世人咧小學教冊做先生。毋知你是佗位的人？」
純真回應日昌一個春天款的笑容：「張先生，我是麻豆出身的人，阮阿爸佇故鄉開診所做醫生。」
「按呢講起來，咱兩個人的家庭背景攏誠單純。陳小姐，」純真拍斷日昌猶未講煞的話語：「你喚我純真就會使，日昌兄，我敢會使按呢稱呼你？」
「當然嘛會使，不而過，事實講咱兩人增差無幾歲，你喚我日昌就好，彼字『兄』thìng好kā省起來？」日昌用伊紳士的笑容回應純真。
彼個春日的下晡，雙人初見面、心花開，就佇咖啡芳、輕鬆的氣氛佮互相的好感裡留落美麗的印記。續落來，雙人便若有閒的時陣，就會相招鬥陣出外行行咧，戲園、咖啡廳、新公園，甚至較郊外的碧潭、草山，攏留下in愛的跤跡。日昌參純真佇平凡的日子裡穩定交往，雙人的感情一日深過一日。三冬後，純真師範學院卒業欲夆派去初中教冊彼個歇熱，日昌碩士的學位嘛拄好提著無偌久，留踮台大法律系做講師。兩個熱戀中的愛人仔，佇眾親朋戚友的祝福裡，踮日昌大甲的祖厝備辦婚禮，簡單請十塊桌。兩冬後，頭璋仔惠萍出世……
「阿母……嗯…阿母……」
當tang純真想著惠萍出世，猶陷入初初做人老母彼款甜蜜氣氛的時，無意中予惠萍摻著哭聲的呼喚拍醒。純真tann頭一下看，才致覺已經欲暗，惠萍ùi初中散學轉來。惠萍一入門欲哭欲啼，冊揹仔袂赴囥落，就闖偎來kā純真攬咧，仆踮伊的肩胛頭tshinn-tshinn-tshn̄g-tshn̄g。
「阿母…人無想欲去學校讀冊矣啦…」惠萍那哭那講。
「憨囡仔，到底佇學校發生啥物代誌？毋著緊kā阿母講。你誠無簡單才入去讀金華女中，哪會當講無愛讀就無愛讀。」純真雄雄予惠萍的話語tshuah一趒，著急kah那搭惠萍的尻脊骿那kā問因端。
惠萍那哭那kā老母講伊彼日佇學校所發生的代誌。
惠萍是這間徛佇台北市新生南路、原底由市立女中改名金華女中的二年仔學生，伊是初中改制國中以後第二屆入學的。雖是講實施九年國民教育了後，讀國中毋免閣參加聯考，不而過，因為金華女中原底是第一志願的學校，所致，想欲kā囡仔送來這間學校讀冊的序大人猶原塞倒街。申請欲來這踏讀冊的人數，超出學校會當容允的數目傷過頭濟，因為教育部規定袂使閣佮永過相像，用考試的方式揀選學生，學校辜不二衷只好採取抽khau仔的方法，來決定佗幾位學生會當入學。惠萍會當入來金華女中讀冊，全然是老爸張日昌代替伊抽khau仔的結果。
這工早起第四節課，是惠萍彼班導師王翠華上的歷史課。下課進前五分鐘，課程進度講煞了後，王老師就喚惠萍徛起來，當所有同學的面無客氣對伊講：「張惠萍，你敢會當kā老師講，是按怎恁老爸欲反背國家，偷走去外國？」
惠萍干單是一個14歲囡仔，對大人世界的代誌全然無了解。料袂到會予老師叫起來問，除了一時gāng去以外，只會當目屎四湳垂，有影真無ta-ûa。He短短的五分鐘，對惠萍來講，袂輸是一世紀遐呢長。中晝下課鐘仔一下tân，無khùa食便當，惠萍就孤一人走去教室外口彼欉榕樹跤目屎準飯吞。踮遐，遠遠猶聽會著教室內面幾位同學咧tshi-tshi-tshū-tshū：「老師拄仔講的敢是誠實的？」「按呢，張惠萍in阿爸毋就是匪諜囉！」「我捌看過張阿伯呢，實在予人料想袂到。」遮的話語就親像魔音穿腦，嘛好比規百枝針咧kā捼，袂輸欲kā一個無辜的查某囡仔追殺到天邊海角。規下晡上課，惠萍就假若一仙有體無魂的柴頭尪仔，實在講，老師踮講台頂講的話語，伊連一句嘛聽無入耳。散學的鐘聲響起，伊隨闖出教室，那走那哭一路拚轉來徐州路的厝裡。
純真知影惠萍的委屈了後，嘛綴伊目屎流、目屎滴，kā伊攬愈ân，兩母仔囝攬咧哭一睏，純真才開嘴對惠萍講：「惠萍，你聽阿母講，恁阿爸是一位正人君子，絕對毋是親像in所講的按呢。有一寡代誌，等候你大漢了後自然就會當理解。人咧做、天咧看，咱愛較giám硬咧，毋通遮呢簡單就夆揠揠倒。」惠萍聽老母講煞了後，哭聲嘛逗逗停睏，伊暗靜仔對家己講：「以後我袂因為阿爸的代誌閣再啼啼哭哭。」此去，惠萍phīng以往閣較拚勢讀冊，雖然因為老爸予蔣政權列做頭號烏名單，使致伊一世人袂當出國，不而過，伊一路ùi北一女、台大一直讀到提著經濟學博士，落尾踮大學教冊。講起來並無卸張日昌、陳純真翁仔某的面底皮。
這陣，佇張日昌回憶錄《失蹤》新冊發表會的會場，張惠萍就坐踮老爸的身軀邊。伊少年時經歷過人生的鹹酸苦澀、歲月的滄桑，毋過，伊一點仔都無怨嘆，伊認為這一切攏是上帝對伊的試煉，好佳哉有老母的鼓勵、扶持，才會當造就伊美麗的人生。現此時，伊已經是一位五十外歲的奧巴桑，佇大學教冊，有一個美滿的家庭。佇伊的心肝底，早早就諒情老爸斯當年無講無tànn離開家門的苦楚，自伊大漢捌代誌以後，伊不時對家己講，彼個離伊萬里遠的阿爸，是一位值得伊一世人驕傲的偉大人物。「今仔日，實在誠歡喜，尚且懷抱感恩的心情，來遮參加阮阿爸回憶錄的新冊發表會，」講到遮，惠萍用倒手kā目鏡提落來，正手提手巾仔拭滿面的目屎，停睏幾秒鐘續咧講：「少年的時袂當體諒，掠準阿爸無愛阮，才會孤一人走去外國。到尾後才知影阮阿爸為大局放捨親情的偉大。」講煞，惠萍掠身軀邊的日昌看一下，兩爸仔囝攬ân-ân，沉醉佇親情的溫暖裡。這一幕親情的溫暖，感動現場採訪的濟濟記者，一時閃光燈熾無停，噗仔聲強欲衝破厝蓋。
新冊發表會煞尾，相連續二、三十位讀者手提張日昌的回憶錄，行到會場頭前請伊簽名。內中絕大多數攏是歲頭較有的老大人，三、五個仔中年人參一、半個仔大學生款的青年人。簽名煞，遮的讀者逗逗仔散場，當tang惠萍牽日昌的手徛起來欲離開的時，原底坐踮會場後壁面，一位看起來六、七十歲、牽一枝烏仁目鏡、頭戴野球帽仔、穿一領phú色jián-bah的老大人，行來面頭前喚in小停跤。
這位老大人當張日昌的面，kā伊彼枝烏仁目鏡ùi面裡提落來，順續向伊行一個禮：「張教授，你敢猶閣會記得我？」
食到八十外的張日昌，面對面相咧五秒鐘，腦海內同時回想：「這個人我敢捌伊？」一時想袂伸車，好禮仔kā問：「這位先生，請問你是？」
「張教授，我是斯當年警備總部的李嘉生。」雖然老大人烏肉底，不而過，看會出來伊佇講這句話的時，烏色的面裡略仔反紅。
聽著老大人的話語，張日昌先gāng兩秒鐘，續落用平和的聲調回應：「李組長，你哪會來遮？」
「張教授，我知影四十冬前所做的一切，對你佮你的家庭造成誠大的傷害。我今仔日來遮，是欲當面向你懺悔。」講了，老大人用伊的手ńg拭目屎。
張日昌用伊皺phè-phè的手，搭兩、三下老大人的肩胛頭，安搭伊講：「代誌已經過遐呢久，咱嘛食到七老八老，猶咧餾過了時煞了代的古早事欲ni̍h？」續手提一本回憶錄，送予面頭前這位四十冬毋捌見過面的老大人。
老大人原底掠準張日昌會大大kā伊責備，想袂到對方毋那無對伊歹聲嗽，反倒轉來閣送伊冊。手裡提這本燒燙燙拄出爐的新冊，心內想起舊時代彼齣悲劇。提著冊的坎站，老大人的確毋知，等伊讀完手裡這本《失蹤》了後，伊將會發現：四十冬前佇警總保安處彼擺秘密會議裡，伊對張日昌脫出台灣的分拆上界偎近事實。
張日昌kā冊交予老大人了後，就一爿thuh枴仔、一爿由查某囝惠萍牽咧，行出會場。天色漸漸暗，這時，台北的天裡佈滿紅霞。
──2010.10.22寫佇赤崁南門仔
2011.1《台文戰線》第21號
文章定位：
