Uma規日頭殼gông-tshia-tshia，心肝穎仔無停咧滾絞，這兩日踮電視內面看著的影像，袂輸佇伊腦海內咧做大水，暝日溢來溢去無時停。秀林村是伊自細漢徛起的故鄉，遐有伊上親的親人佮逐日好嘴相借問的厝邊頭尾。這畷回鄉的路途，伊的跤步不止仔沈重，若毋是雄kài-kài、橫掃遍野的Morakot風颱起致，伊的目屎嘛袂親像湍流的溪仔水流袂離。
彼工，雄狂的Morakot親像《鄉史補記》內面的tsing-piàng賊，歹銃銃對南台灣一直搧，袂輸欲kā散甲予鬼仔掠去、遐的可憐人的田園厝宅拆食落腹。外地人檢采較毋知，秀林村就是踮佇高雄縣美麗鄉的東北爿，這個地頭有較iap僻淡薄，戶口設踮遮的較斂（liám）千五人，常在蹛佇遮的人口量其約仔才成千人跤兜，你若有閒罔去庄仔頭kā踅一輾，罕罕仔才看會著三兩個少年男女出現佇庄裡，佇這踏，老人佮囡仔疕佔較大面。這也莫怪，自從這個Siraya庄頭接受所謂現代文明了後，古早一寡傳統文化一日一日失去，世傳世的種作模式早就無法度維持日常生活，使致少年家無出去都市手面趁食袂使。面對時代潮流無情的戲弄，Uma相像袂當走閃，為著生活，十外冬來伊攏蹛佇日時繁華光炎、暗時霓虹閃熾的台北城，成做一隻飛離故鄉、路途迢遠的Siraya渡鳥。
Uma這十外冬來，踮佇台北街頭巷尾的PUB佮西餐廳做駐唱歌手，特別是佇PUB唱歌，逐日面裡攏著畫紅漆青，身軀頂穿的就準毋是綾羅紡絲，嘛袂使傷過頭凊采，欲佇這款娛樂場所的舞台頂賺食，除了歌藝愛有二步七仔，不sám時為著應付遐的興流豬哥瀾的查甫觀眾，嘛著心肝掠坦横、目睭瞌一蕊，kā胸前làu較低咧，予兩粒C-cup的奶仔加減走出來佮人客相借問一下。Uma的皮膚是烏裡帶咖啡的色緻，烏甜媠啊烏甜媠，兩蕊目睭tîng-sûn、活靈靈閣假那會講話的款勢，身懸165公分，袂輸少女腰束奶phok的體態，伊只要徛佇眾人面頭前，絕對是上界顯目的model。就因為按呢，儘管伊無成作電視頂遐的fans規山坪、身價億來億去的紅歌星；不而過，對庄跤散鄉人出身、生性樂觀的Uma來講，伊已經誠滿足囉。
佇iap僻的秀林村裡，Uma是in彼沿上gâu讀冊的囡仔。伊毋nā讀秀林國民小學的時，逐年成績攏提全校頭名，甚至後來去鄉裡讀美麗國民中學的時，伊嘛無輸人。散赤人無悲觀、失志的權利，儘管Uma phīng別個囡仔較gâu讀冊，不而過厝裡干單三分薄田種竹筍、生薑，老爸、老母愛晟養四個囡仔，成作大漢查某囝的Uma讀到國中卒業就愛出外鬥趁錢。
Uma自細漢gâu讀冊以外，歌藝佮屈勢嘛是一粒一的。伊欲綴芎蕉鎮勝利歌劇團四界公演的前一暝，in老母佇伊的房間仔內kā伊鬥款衫仔褲，ná流目屎ná對伊講：「Uma，你愛諒情阿爸佮阿母，阮知影你是庄仔內上gâu讀冊的囡仔，毋過你嘛知影咱的手內裡，咱兜生食都無夠矣，欲哪有法度曝干？此去，你著較giám硬咧，出外不比佇厝裡，凡事著愛較吞忍咧。知否？」Ná講ná用伊規世人做穡、粗耙耙的雙手挲Uma的嘴phé。
彼時才16歲的Uma，雖然目箍紅紅、目睭皮ham-ham，伊煞反倒轉安慰in老母：「阿母，無去學校讀冊哪有啥物要緊？會當kā厝裡鬥趁錢真好阿，若愛讀冊，後擺我有錢才去冊店買轉來家己讀就好矣，你毋免替我煩惱，我會保重家己。」講煞，兩母仔囝閣攬作伙哭一睏。彼暝，佇Uma的目睭內，秀林村的月娘看起來煞特別清明，伊暗靜仔對家己講：「我一定欲成功倒轉來。」
隔轉工透早，Uma的老母罕得加菜，早頓食飽，Uma隨出門趕一日干單早暗各一畷的客運車班。看ùi車窗外，是十外冬來逐工目睭擘金攏看會著、熟似甲有偆的故鄉景緻。Uma心內咧想，以早逐工相對相攏無啥物特別的感覺，這陣欲離開矣，才知影故鄉一枝草一點露的可貴。身軀身予塗沙粉嵌幾落沿、看起來古lok sok古的客運車，佇庄跤坎坎坷坷的黃塗路khok啊khok，khok欲成點鐘，路邊開始出現規遍的芎蕉園，Uma知影芎蕉鎮到矣。
Uma去芎蕉鎮勝利歌劇團了後，號藝名美麗。伊南北二路綴團四界唱歌公演，前後七冬較加，無論是炎天赤日頭抑是透風落雨，做外場表演的歌劇團袂當揀空課路，只要出錢的頭家喚in去表演，毋管山邊、海口，小鎮抑是夜都市，攏著隨傳隨到、毋敢延遷。Uma kā遮的綴團上山落海表演的日子，當做人生的磨練，毋捌喝過一聲艱苦。伊逐月日一領著月給，家己留淡薄仔所費，偆的攏隨去公演地頭的郵便局寄轉去厝裡予老爸、老母相添。
一直到彼擺佇台北大稻埕霞海城隍廟邊公演，拄著彼時STAR PUB開業無幾工，當咧走揣歌手的陳桑。
「美麗小姐，我ùi遮經過，聽著你的歌聲感覺誠特別，所以就tshāi踮舞台跤，聽你相連續kā三塊歌唱煞。」Uma歌唱煞，行落台跤，陳桑早就將名誌提咧手裡，對Uma tìm一下頭，ná tu名誌ná開嘴，面裡的笑容予四箍輾轉的燈火照甲光炎無比。
Uma tshūa陳桑行到舞台邊的榕樹跤，陳桑續落講：「美麗小姐，假使你若無棄嫌阮這間小店，我想欲邀請你來店裡做駐唱歌手，毋知你敢願意？」
Uma目睭展大蕊掠陳桑看一下，笑頭笑面講：「多謝陳桑予我這個機會，既然陳桑無相棄嫌，我願意試看覓。」佇外頭走闖遮濟冬，Uma雖然毋捌喝忝，總是tsit-má無簡單踏著較好的地位，伊實在毋願予這個機會ùi家己的指頭仔縫溜辿。
「想袂到你做代誌遮呢a-sa-li，這是合約書，內面所有待遇、福利攏寫甲一清二楚。」陳桑ùi皮箱裡提一份合約書予Uma，「你先提轉去看予詳細，若無啥物問題，咱明仔載才正式簽約。」越頭當欲離開的陳桑，行兩步路閣翻頭對Uma講：「著啦，有一項代誌愛先品予明，恁歌劇團檢采攏唱台語歌較濟；毋過，佇PUB需要唱西洋歌佮華語歌，應當無問題honn？」
「陳桑，請你放心。」Uma笑笑kā陳桑tìm頭。
彼暝公演了，參同事佇城隍廟邊宵夜食煞，轉去大稻埕不止仔有古早味的旅館房間，Uma佇眠床頂反過來反過去，毋知按怎仙睏都睏袂去，thuah開窗仔看出外面，看著15暝的月娘懸懸掛佇城隍廟的天頂，袂輸咧對伊嘴笑目笑，就親像伊16歲欲離開厝前一暝秀林村的月娘相像，遐呢清明。
Uma自細漢就知影家己有兩個名，厝裡參庄裡的人攏喚伊Siraya名Uma，去到學校讀冊逐家就喚伊漢名劉秀麗。猶咧讀秀林國民小學三年仔的時，乖巧gâu讀冊的Uma捌開嘴問過老母：「阿母，是按怎我會有兩個名？」
老母真溫柔kā彼陣有pinn頭鬃尾仔的Uma頭殼挲挲咧，講：「憨囡仔，Uma是咱Siraya祖先傳落來的名，ah若秀麗是號來欲予官廳佮讀冊用的。」
坐佇梳粧台頭前的Uma，沿那kā為著舞台頂表演畫的粧拭掉，沿那回想細漢時的代誌。愛讀冊的Uma，並無因為16歲出外走唱，就將讀冊這層代誌放予袂記得；不而過，綴勝利歌劇團走唱彼幾冬，全台灣南北二路四界走闖，逐日舞甲無晝無暗，干單會當揣làng縫去就近的冊店，買兩本仔愛看的冊小止飢一下；來STAR PUB成冬了後，Uma無論唱歌的技藝抑是受人客歡迎的程度攏較在穩矣，彼暝下班領月給的時，伊歡頭喜面kā陳桑要求：「陳桑，我佇遮唱歌tsit-má有較穩定，麻煩你後月日起，暗時6點到10點期間莫排我的班，我想欲去讀高中補校。」
「美麗，你佇咱店裡誠受人客肯定，既然你遮呢求上進欲閣讀寡冊，我無理由毋允准，我干單提醒你一項：身體毋通舞傷忝。」陳桑予Uma一個鼓勵的眼神。「這是你的月給。」Uma接過手，踏著輕鬆的跤步轉去伊稅的宿舍。
Uma離開校園8冬了後，佇24歲彼年九月，秋風微微月光暝，騎一台50cc的Su-ku-tah去讀靜修女中高中部補校。無論透風落雨，補校三年期間，Uma毋捌欠席半擺，去學校的時，伊攏無畫粧點胭脂，身軀穿的是夜市仔買的牛仔褲佮T-shirt，一直到甲卒業，先生參同窗無半人知影伊是PUB的駐唱歌手。上界可貴的是，伊連難得的歇睏時仔，嘛罕咧出門tshit-thô、踅媠姑娘仔上愛去shopping的百貨公司，三冬卒業Uma提著全班頭名的校長賞。彼暝，伊流落久年毋捌流過的珍貴珠淚。
三冬後，Uma 30歲的時，ùi STAR PUB換到詩情西餐廳做駐唱歌手。佇遮出入的人客毋nā phīng PUB加較單純，尚且大部分看起來假那是知識階層的款勢。伊踮遮無需要親像佇PUB唱歌面裡畫紅漆青，頭毛定定siat-toh變款；伊只要穿一軀淑女款的洋裝長裙，長過肩胛頭的直絲頭毛，面裡畫薄粧，坐踮鋼琴頭前，綴溫柔的樂音演唱人客點的歌，he歌聲可比ùi山谷裡傳轉來的回音，予人客聽甲袂輸啉一甌whisky遐呢迷醉。
Uma來詩情西餐廳較無一月日，便若拜六暝伊駐唱的時間，9點猶未到就有一位穿插pih紮、斯文款的查甫人客，固定坐踮伊唱歌的頭到倒手爿彼位，這位人客聽歌的性癖檢采佮人較無像，來遮的人客若毋是點西洋歌就是華語歌，誠罕咧有人點台語歌；獨獨伊較無仝，總是來有三、四畷矣，逐回點的全然正港台語歌，ùi老歌〈思慕的人〉、〈黃昏的故鄉〉，點到新歌〈家後〉、〈海波浪〉，Uma對伊留落特別的印象。逐回伊攏干單點一塊歌，無加嘛無減，伊量約佇10點半跤兜，kā點歌單親手交去坐踮鋼琴頭前的Uma手裡，續手予伊1000箍Tsit-puh，Uma每擺嘛攏會回應伊sweet的笑容。有時陣，Uma佇唱伊點的歌彼時，會有意無意用溫柔的眼神看ùi倒手爿，看伊深窩的目睭假那佇佗位捌看過，感覺熟似面熟似面。一直到彼擺，斯文人客點〈愛你的批紙〉，煞佇歌單下底làng白的所在寫：「美麗小姐，毋知敢有這個榮幸參你開講？煞場了後，我佇路口咖啡廳等你。 思慕的人筆」
看著「思慕的人」這幾字，Uma嘴仔笑笑，袂輸看著久年無見的老朋友遐呢親切，自底就對伊有淡薄仔好感，想講熟似一下嘛無bái，煞場了後換一軀輕便的衫褲，Uma歡喜赴約。
「Uma，誠久無見面，你敢猶會記得我？」Uma一坐定，對方隨予伊一個surprise。
Uma掠伊看一下，面裡顯露hiau疑的眼神：「你哪會知影我號做Uma？」
對方tu一張名誌，Uma kā這張薄厘絲、頂面印人名、地址、電話番的紙ân-ân la̍k踮手裡。伊目睭的焦點相佇「潘文明」這三字中明印刷體的字頂懸，連睨都無睨一下，「潘文明」頂面一畷較細的楷體字「中央研究院民族所助理研究員」。
「敢會是伊？」Uma心內想的是十外冬前，美麗國民中學仝班佮伊平平gâu讀冊、蹛仝庄彼個漢名號做潘文明的Vare。
「劉秀麗」，佇美麗國中的學堂裡，導師kā國中三年最後一擺模擬考的成績單分予Uma。佇「名次」欄頂面出現「1」，看著這個熟似甲有偆的阿拉伯數字，Uma並無歡頭喜面，因為伊心內知知，無論伊得著偌濟擺頭名，終其尾攏會為著家境的緣故，無法度升學讀高中。坐踮Uma邊仔，身材瘦thio，參伊相像有兩蕊tîng-sûn大目睭的潘文明，彼擺模擬考猶原提著第二名。
卒業了後，潘文明因為家境較富裕，就去港都讀第一志願的高中，Uma被環境所逼去芎蕉鎮勝利歌劇團走唱。此去，兩人十外冬攏毋捌閣見過面。
「你是Vare？」Uma將伊的眼神ùi名誌頂面徙轉來坐伊對面的潘文明面裡。
潘文明kā雙手伸出來，輕輕仔la̍k著Uma的手蹄仔：「Uma，這十幾冬來，我不時攏會想起你，毋知你過了好否？Tsit-má總算予我閣拄著你，我實在足歡喜。」
潘文明深情的眼神看在Uma的眼內。伊予文明la̍k牢的雙手，量約十秒鐘才抽轉來，順續回應一個紅gê紅gê假那蘋果面的笑容。
彼暝，雙人講話投機，一直講到月斜西。文明kā伊自高中、大學、碩士、博士，這十外冬讀冊的經過，一點一滴講予Uma聽。Uma ná聽ná表露欣羨的眼神，苦袂得he就是伊本身的人生路程。Uma嘛kā伊自國中卒業綴勝利歌劇團四界走唱，了後拄著陳桑予伊邀請去STAR PUB駐唱，一直到來詩情西餐廳這十幾冬的鹹酸苦汫講予文明知影。文明ná聽Uma講起伊這段袂輸電視劇女主角的經過，面裡不時顯露毋甘、疼惜的表情。
自這日起，逐禮拜六暗時Uma佇詩情西餐廳下班了後，就是伊參文明固定約會的時間。這兩位來自下港迢遠、iap僻秀林村的青年男女，漸漸佇繁華都市裡成作一對深情的愛人仔。
彼冬咱人9月15，是秀林村平埔夜祭斷站三十冬了後，重新閣起鼓的日子。潘文明自做研究生開始，就投入平埔族研究佮文化復振運動，到這陣已經四、五冬的時間。伊出招平平是秀林子弟的Uma，佮伊作伙轉去故鄉，參與這項有特殊意義的文化傳承活動。Uma向西餐廳頭家請假三工，佮文明鬥陣坐自強號火車到港都車頭，了後ùi港都坐客運車到芎蕉鎮，才閣ùi芎蕉鎮搬車轉去秀林村。這一畷路，至少愛開七點外鐘，早起十點跤兜自台北車頭起行，到厝日頭已經欲落山。這暝，Uma踮佇自伊出外厝裡就kā保留到今、毋捌變款的房間裡，掀古早的舊相簿仔，ná掀ná滴落思鄉的目屎。伊好親像閣看著16歲、欲出外趁錢的前一暝，窗外彼粒清明秀麗的月娘，吊佇半天佮伊相對相。
第二工透早五點外，文明就kā Uma喚起床，欲招Uma佮伊作陣參與彼暗秀林夜祭的準備空課。六點thóng，in綴幾位庄民去山裡剉一枝直溜秀的刺竹，這枝刺竹是欲成作夜祭儀式裡的標頭——向竹的路用。In踮向竹的懸頂尾溜綁一大把稻草，佇竹身綁七把較細ku̍eh、坦橫的稻草，代表太祖七姊妹的意思。續落來，文明tshūa Uma去看人起公廨，這項穡頭通庄仔內大大細細攏參與有著，in代先kā竹仔剁予一節一節平長，了後編做三片竹仔壁，查某人kā茅仔草抾予一束一束，交予查甫人hàinn起厝尾頂，將厝尾頂規個嵌茅仔草，嵌甲密啁啁。公廨內面正中央tshāi一枝竹仔柱thàng到天篷，雙爿邊的塗跤兜有囥一甕酒佮一甕水。公廨的頂面有插七枝竹仔刀，這是往過秀林人拍獵用的傢俬，同時嘛代表太祖七姊妹。偎出口的所在有tshāi兩粒大石頭，是欲予庄民跪咧中央跋杯，嘛thìng好準做石椅hông坐。另外，有一陣婦仁人無閒tshih-tshah咧準備米酒、檳榔、薰、雞酒、紅圓仔遮的秀林夜祭袂當欠缺的祭品。
彼暝，佇歡樂的氣氛裡，Uma、文明佮濟濟庄民，聚集佇公廨頭前參與夜祭的活動，尪姨tshūa頭祭拜祖靈了後，開始進行規個活動裡上界重要的節目──牽戲。參與牽戲的民眾逐家頭戴圓仔花編的花環、手牽手，牽成一個大圓箍仔，以Siraya語唱歌lā曲，眾人踏著四步一個循環的舞步，一直到翻點煞戲，Uma才佮文明手牽手轉厝歇睏。這暝是Uma自捌代誌到今，心情上界樂暢的時刻，伊為秀林夜祭感動、嘛為Siraya文化流落珍貴的珠淚。
隔轉工佇厝裡食過早頓，Uma就佮文明相招作伙轉去台北。這回佮兩日前轉來故鄉的情形拄好倒反，in代先ùi秀林村坐客運到芎蕉鎮，了後閣ùi芎蕉鎮搬車到港都，才閣佇港都車頭坐自強號火車上北。到台北的時天色近黃昏，下課、下班的人群挨挨陣陣，規個台北車頭一時袂輸是一座大菜市仔絞絞滾。In雙人早就枵甲腹肚咕咕叫，出車站了後，行去佮就近懸樓拄天的景緻嶄然仔無仝、巷仔內低厝仔滿滿是的塔城街，食大碗閣滿墘的牛肉麵。
Ùi秀林村轉來台北了後，Uma佮文明猶原參往過仝款，繼續in原底的空課，嘛相像in逐禮拜的約會。不而過，經過這擺回鄉了後的文化刺激，Uma的心肝穎仔已經種落堅定的文化復振種籽。
一個秋風冷利的拜六暝，Uma參文明坐佇庶常行跤到的咖啡廳啉燒咈咈的卡布奇諾咖啡，Uma佇燒絡的氣氛下底出嘴問文明：「Vare，頂回轉去秀林村了後，我就有誠深的感受，嘛有誠懸的意願想欲投入族群文化復振的空課，毋過，我毋知欲按怎落手，你敢會當予我建議？」
「Uma，其實我早就想欲佮你參詳這方面的代誌，毋過，因為驚你空課無閒閣愛分心來做遮的事工，身體會袂堪哩。所以就暫且按下，想袂到你今仔日會先開嘴討論遮的問題。」文明用深情的眼神看Uma，用溫柔的口氣對伊講出關心的話語。
「這幾冬，阮小弟、小妹相連續出社會趁錢，厝裡的環境已經改善誠濟，我嘛加減有儉寡錢；而且，我上班的時間攏佇暗時，日時會當撥淡薄仔時間做族群復振的空課。」Uma的口氣不止仔堅定。
「看起來，你的意志真堅定。美麗小姐，我代表Siraya的鄉親向你致意。」文明的口氣帶淡薄仔詼諧，ná講ná徛起來kā Uma行禮。
「潘教授，以後就愛勞煩你多多指教，費心kā阮差教。」Uma學文明的口氣佮動作。講煞，雙人kā啡咖杯仔phâng起來，杯kho̍p杯，發出響亮的音聲。
續落來，文明kā伊身軀邊所有佮平埔族相關的文獻、資料，一本一本借予Uma讀。Uma佇空課外誠認真讀遮的寶貴的資料，若有毋捌的所在，伊會先落記號，才佇約會的時陣kā文明請教。Uma幾月日後kā遮的資料全然讀煞，文明順這個勢鼓吹Uma：「Uma，既然你對族群文化遮呢深情閣有使命感，我想，至無嘛愛閣提一個大學學歷，對咱欲做的空課嘛加減有幫贊。」
「Vare，毋過我已經三十外歲，閣佮人去讀大學敢袂hông笑？」Uma小可膽膽。
「Uma，你毋通袂記得你二十外歲才讀高中，毋nā無hông笑，閣顛倒提頭名卒業。」文明kā Uma注一枝強心針。
「若按呢，你看我該當讀佗一間大學、啥物科系較適合？」Uma展笑容。
「你會當去讀台北郊區C大的民族學系，遐的確會當學著你所需要的物件。」文明用肯定的口氣回應，「上重要的是，我有踮遐兼課。」
自Uma決定欲閣讀大學彼日起，除了上班佮文明約會，偆的絕大部分時間攏用來準備大學入學考試。伊確實有讀冊的才情，準備半冬跤兜，就予伊順利考牢C大的民族學系。佇大學這四冬內面，Uma參過去相像拚勢讀冊，尚且伊樂觀的天性真緊就感染予班裡遐的少年同窗，伊的人緣浮，逐家毋nā誠愛佮伊鬥陣，嘛自然ti̍k 掠伊當做大姊頭仔看待。
快樂的時間總是親像雲過月，一目睨仔就ùi咱的指頭仔縫溜辿。舊年六月，35歲的Uma順利自C大民族學系卒業，戴學士帽仔彼日，身軀邊除了鬥陣四冬的同窗以外，年久月深一路予伊鼓勵、支持的愛人仔文明，自頭陪伴到尾。卒業進前一月日，Uma綴文明參與有史以來上界大場的「平埔正名」街頭抗議運動，文明擔任活動的執行長，Uma成作活動組長，彼工氣溫超過30度，全台灣認同平埔族正名的鄉親五千外人，聚集佇凱達格蘭大道頂面，in用響亮的聲嗽喝出堅定的口號，以勇敢的熱情唱出平埔正名的歌曲。
八月初八，雄狂的Morakot風颱橫掃南台灣，Uma的故鄉美麗鄉秀林村災情第一慘重，伊的老爸、老母嘛佇這擺來無張持的風災裡，予水崩山的塗湍流活埋過身。風災發生隔轉工，Uma、文明佮濟濟踮佇外地食頭路的青年男女，分別ùi南北二路趕倒轉來秀林村，in就親像孤鳥回岫仝款，為親人的過身目屎流無停，一禮拜後，逐家kā目屎拭焦，聚集參詳組織秀林村Morakot風災自救會。Uma自願擔任自救會會長的職務，伊決意kā台北的頭路辭掉，欲轉來離開將近二十冬的故鄉拍拚，參與重建的事工。文明猶原繼續伊佇中央研究院的空課，拄著歇睏日伊隨轉來秀林村佮Uma作伙拍拚。Uma佮文明的心內攏誠清楚，秀林村重建的路途猶閣不止仔遙遠。
今年八月初八，Morakot風災一週年，Uma佮文明身穿Siraya傳統服裝、頭戴圓仔花編的花環，佇五里埔新砌的秀林村公廨，備辦Siraya傳統儀式的結婚典禮，到場鬧熱的鄉親有兩百外人。彼工，原住民電視台嘛有來全程採訪、報導。
──2010.9.2寫佇赤崁南門仔
2010.10《台文戰線》第20號
文章定位：
