置初秋ｅ欲暗仔，我行入草山ｅ光景．．．
拄仔位260公車總站落車，欲去參加文欽兄大漢後生君翰ｅ婚宴，進前工文欽兄給我講ｅ路線，我無十分確定，減采若行嘸著路，會直接透對國家公園去，即個時陣嘸是遊賞國家公園ｅ好時機，猶是揣著路卡要緊，置步道口借問一位奧巴桑，伊給我講向步道直直行，就會看著陽明公園停車場，備辦婚宴ｅ所在，說一聲勞力了後，用散步ｅ心情，引chua7我孤單ｅ身影，沿路体驗一擺嘸捌有ｅ体驗，將家己佮草山ｅ光景透濫作伙。
頂月日風颱來彼工，過晝了後參長松去關渡拜訪文欽兄，這是前衛出版社徙來關渡了後，頭一擺踏跤到，猶會記得三冬前去信義路買冊，予文欽兄請中晝頓ｅ情景，即畷來主要是欲參詳長松出版台語小說集ｅ事項，明知影現此時出版台語文學冊，穩了無趁佔卡大面，文欽兄猶原疼惜人才，一下手就按算出兩本；我即個綴路ｅ嘛受致蔭，當文欽兄知影我逐工關踮厝裡飼蠓，隨出招我來前衛做編輯，這是我多年來求之不得ｅ美夢，路途迢遠嚇我袂倒，只驚無才情給人交仗ｅ空課路發落好勢，予前衛ｅ金字招牌拍損去；四五點仔，文欽兄欲趕轉風雨無停ｅ草山頂看顧某囝，我佮長松坐捷運返頭轉板橋，風雨連鞭大連鞭細，盈暗長松欲透暝趕轉高雄，阮兩人置暮色中行入風颱ｅ景緻。
兩工後我開始過坐捷運通車ｅ生活，逐日早仔位板橋新埔起行，到台北車站搬車，換坐淡水線置關渡落車，行三分鐘ｅ路程去前衛上班，黃昏若到六七點仔，閣再返頭坐原路ｅ捷運電車轉板橋，安呢日出日落；大屯山頂楓樹湖彼蕊《真美ｅ百合》，開甲芳芳嫷嫷，目睭巡過五百外頁字園幾落畷，「真美」坐飛凌機轉去加拿大外家參東方白最後面會，我ｅ腦海猶不時浮現楓樹湖純樸ｅ景緻，真美古錐ｅ樣相，忠狗Lucky ｅ活跳；雖然校對、編冊是我日常ｅ空課，嘸過，對文學敏感ｅ我，難免會沈迷其中，加上民視冬尾欲播出連續劇《浪淘沙》，即套東方白ｅ代表作亦著趕緊再版，有時陣會給真美佮雅信濫濫鬥陣，亦常再踮楓樹湖佮淡水女學之間踅玲瓏。
會記得知影前衛量約仔是90年代初，彼時我ｅ頭一本冊是黃明川導演ｅ電影《寶島大夢》，作家林文義踮彼齣電影內底演一位營長，當時，我根本嘸知影林文義是本土真出名ｅ散文寫手，即齣電影咧搬啥？坦白講，黃明川前衛ｅ藝術手法，嘸是我即個藝術涵養無夠ｅ少年家，會凍完全理解ｅ；1995年踏入台語文壇了後，透過前衛出版ｅ《台語詩六家選》、《駛向台灣ｅ航路》、《走找流浪的台灣》、《雅語雅文》等，予我ｅ視野加卡開闊，95年底96年初，央敏兄欲出版台語散文集《寒星照孤影》，交代我將囥咧冊前ｅ相片，提去前衛，置和平東路一段ｅ辦公室，頭擺佮戒嚴時代定定出冊夆查禁ｅ文欽兄相會。
落尾，前衛ｅ冊愈買愈濟，位遐我接觸台灣文學ｅ經典作品，一日一日滋養我永早過頭貧血ｅ文化內涵，《田園之秋》內面，陳冠學將屏東庄跤恬靜ｅ景緻寫甲活靈靈，早起時ｅ鳥仔聲好親像就置耳孔邊轉踅，無輸美國文學家Henry David Thoreau(梭羅)，蹛置Walden Pond(華爾騰湖)邊隱居所寫ｅ《湖濱散記》；《笠山農場》可比將日本時代農民的生活歙相舖排出來，美濃ｅ美景宛然置目睭前，鍾理和拍破自古以來仝姓袂使結婚ｅ禁忌，台灣文學史恐驚會記伊一筆；呂則之以故鄉澎湖作背景ｅ三部小說《海煙》、《荒地》、《憨神的秋天》，行出海洋文學ｅ新天地，比90年代以《討海人》成名ｅ廖鴻基卡早幾落年，茲兮開闊ｅ海洋小說，使人想起法國印象派大師Pierre Loti(畢爾．羅逖)彼部偉大ｅ海洋文學《冰島漁夫》；葉石濤化身《台灣男子簡阿淘》，寫50年代智識份子牽連白色恐怖ｅ故事，《西拉雅末裔潘銀花》平埔siraya族查某人ｅ形像，袂輸猶活踮二十世紀尾ｅ台灣土地頂懸．．．
宋澤萊三本代表作《打牛湳村系列》、《等待燈籠花開時》、《蓬萊誌異》，分別以寫實、浪漫、自然主義，為我拍開文學ｅ門窗；《廢墟台灣》以未來小說ｅ形式，預言三十冬後台灣社會遭受核能災難ｅ情景，咱若無加倍疼惜即塊土地，凡勢宋澤萊未來除去文學家，閣會加戴一頂預言家ｅ桂冠；《血色蝙蝠降臨的城市》運用魔幻寫實ｅ筆法，天頂出現一粒流血ｅ月娘，車站頭頂滿天密婆颺颺飛，使人驚破膽ｅ畫面，鄙相台灣ｅ烏金政治；《熱帶魔界》原在將魔幻寫實運用甲親像桌頂抳柑，空中出現幽靈列車ｅ境界，恐驚一世人連眠夢著ｅ機會都無，另外，小說中描寫下港林邊一帶美麗海岸線ｅ景緻，淡薄仔沖散予人神經緊張ｅ氣氛；即兩部台灣難得有ｅ魔幻寫實小說ｅ成就，超越魔幻寫實開基地拉丁美洲ｅ濟濟作家，就準講參得著1982年諾貝爾文學獎ｅ Marquez(馬奎斯)相比併，嘛有卡贏無卡輸；收錄置1987年《弱小民族》即本冊內面ｅ＜抗暴的打貓市＞，是一篇用三萬字跤兜所寫ｅ台語小說，因為使用先鋒前衛文學流派意識流ｅ技巧，予一寡看台文無目地的文人，嘸敢閣凊采摳洗台文無法度寫現代小說。
1995年初出江湖ｅ青年小說家胡長松，《柴山少年安魂曲》、《骷髏酒吧》徛在伊踮文壇ｅ地位，即兩部小說不但有真讚ｅ文學技巧，上重要是伊描寫高雄特出ｅ風土人文，罩一沿厚厚ｅ南台灣氣味，成做南方文學ｅ特色；伊不但有天生ｅ文學才情，置無閒ｅ空課佮照顧兩位幼兒ｅ lang3縫，拚勢吸收世界進步ｅ文學技巧，是我愛好好仔學習ｅ對象；上可取ｅ，受宋澤萊老師鼓舞，胡長松致覺著母語文學是台灣文學ｅ生死門，自2000年開始，伊轉向台語文學創作，到旦完成五、六十首台語詩，舊年入選《台語詩新人選》，台語小說十五、六篇，亦就是文欽兄答應欲出彼兩本；看著四冬來ｅ文學至友長松欲出台語小說集《燈塔下》、《槍聲》，我想，我ｅ歡喜袂輸人。
君翰喜宴ｅ舞台頂，文欽兄咧唱＜快樂的出帆＞，快樂ｅ氣氛感染現場每一位來賓，彼暝文欽兄減采歡喜甲睏袂去。
逐家相招行入台灣文學ｅ光景，閣再一擺快樂出帆！
－－2004.9.26寫置枋橋街
2004.11.1《台灣教會公報》2749期
文章定位：
