落南，行出彰化車站，中晝十二點外ｅ日頭燒和燒和，今年以來頭擺致覺著春天ｅ喟絲仔，哇！即款滋味真好！
坐上駛往鹿港ｅ彰化客運，敲手機仔予長松，伊拄仔到西螺，透過無形ｅ電話線，我聽見伊ｅ囝南圳咧講話ｅ聲，真感動！逐冬ｅ文學聚會，伊攏會chua7某囝來參加，我想，台語文學即條路茲呢仔孤單，若無怹牽手宛玲ｅ体諒佮全力支持，孤單ｅ路途恐驚只偆孤單。
耀乾兄ｅ手機仔無開，嘸知即陣伊駛到佗位？我量約仔知影，除去我委託伊替我位南鯤鯓紮來ｅ十本《台語詩新人選》，當咧車後斗秋凊，車頂猶有三位朋友，宗源先、定邦兄佮刁持位美國賓州茉里鄉轉來台語文學營演講，八冬來嘸捌見過面ｅ民祥兄，今仔日伊聽講即個有意義ｅ文學聚會，欲置澤萊老師ｅ第二故鄉鹿港來展開，無論如何嘛愛來加添淡薄仔春光。
八冬前(1996)ｅ二月春天，日頭光照置南鯤鯓ｅ大埕，仝款燒和燒和，我以一隻初出江湖菜鳥仔ｅ屈勢，欲來文學盛會展翅學飛，置「喙講父母話、手寫台灣文」ｅ標語下底，我見著濟濟台語文學ｅ前輩，彼時，我心內有誠大ｅ感動；民祥兄膨皮ｅ福相、春風ｅ笑容，一直椆咧我腦海內，1999年3月我寫＜春天踏跤到＞台語詩，捌提起佮民祥兄ｅ即段緣；誠拍損，人講『台語短篇小說之王』ｅ陳雷兄，彼擺有代誌無去，到旦猶無緣當面向伊致意，2002年得著『南瀛文學創作獎』ｅ台語詩＜面會陳雷＞，淡薄仔思慕罩咧心肝頭。
彼屆同齊坐踮台仔跤做學員ｅ為文，離開美麗島鄉七冬了後，現此時轉來成大台灣文學系擔當助理教授，嘸過，今仔日伊無來鹿港小鎮參逐家結即段文學緣；央敏兄嘛袂凍來，即個坎站伊當咧南鯤鯓演講，講伊安怎替台語文學頭一部史詩《胭脂淚》轉臍ｅ故事；佳哉，新世紀才成做台語文學花園園丁ｅ廷宣佮美親攏齊到位，這是我上歡喜ｅ代誌，我佮耀乾兄會使講頓(dng3)胸坎掛保證，映望怹兩人成做台語文學未來ｅ映望。
今仔日(2004.1.31)是『台灣新本土社』第四屆年會，置發起人宋澤萊老師怹兜無偌遠ｅ十宜樓人文餐廳舉辦，眾人繼續陷害第三任社長春凰姊連任一冬，繼續做一位閒閒無代誌ｅ社長，擔頭原在予長松來擔，阿嘸過，好戲置後壁面，長松隨宣佈《台灣ｅ文藝》新ｅ編輯群由伊本人、耀乾兄參我組成，每一季輪流擔當執行主編，旦！艱苦兼罪罫，欲做產婆嘛著愛逐家敖大腹肚，汝知知我知知，過去成冬來，台語文學ｅ產量佮品質，攏嚴重歉收，這是欲如何是好？聽講即回出錢ｅ出版社正經欲潦落去，廣告有影刊甲不只仔顯目；拜託列位文學寫手嘸通閣匿起來睏，冬天ｅ跤跡逗逗仔消失無影，春風微微仔咧唚汝咱ｅ面。
世紀尾2000年熱人八月，落南參加『第二十二屆鹽分地帶文藝營』進前，有一日欲暗仔接著宋澤萊老師ｅ電話，這是伊第二擺敲電話予我，頭擺是三冬前伊主編ｅ《台灣新文學》欲刊登台語詩＜詩寫浪淘沙＞，敲電話來鼓勵我；即回伊講欲呼一陣少年仔組織新ｅ文學社團，以自本《台灣新文學》ｅ寫手做班底，另外召集近年來浮出台語文壇ｅ新手，欲置新世紀為台灣ｅ文藝復興好好仔撦拚一下；九月初九置台中照陽兄借來ｅ場所，召開籌備會，彼工日頭光真猛，逐家位台中車站行兩三里路，無顧大粒汗細粒汗，一行數十名，內底有文壇ｅ前輩，佮阮即陣新鳥仔；會中投票選照陽兄做第一任社長，嘛決定勤岸兄提議ｅ《台灣ｅ文藝》，成做新刊物ｅ名稱，長松志願擔當義工總編輯。
2001年1月13下晡，台灣新本土社踮台南鄉城文教基金會正式成立，仝日《台灣ｅ文藝》宣佈創刊，同時發表數萬字ｅ『台灣新本土主義宣言』，內容包含十二篇宣言序文佮六十四條宣言，這是台灣文學史上嘸捌出現過ｅ大文獻，逐家敲鑼拍鼓歕鼓吹，欲踮文壇佮人徛起鬥鬧熱；經過長松參眾文學寫手一冬ｅ拍拚，前衛林文欽兄牙齒根咬咧，無惜老本出刊四本雜誌，分別以『台灣新世紀文藝誕生』、『母語文學再出發』、『台灣文學的大眾寫實』、『台語情詩專輯』做各期ｅ主題，評論參作家專訪暫且按下，干單用各種母語（台語、客語、華語）創作ｅ現代詩、散文、小說，就足足超過百五篇。
第二屆大會(2002年1月)踮台中金國飯店舉辦，進前工頭擺拜訪春天ｅ鹿港，和長松、振杉受宋澤萊老師熱情ｅ款待，嘸那食牛排，閣去埕園式ｅ真善美KTV唱歌撓(la7)曲，彼下早，置媽祖宮客房內底，台語情詩＜鹿港月影＞ｅ粗胚，予我捏好勢，到會場了後，《台灣ｅ文藝》第四期『台語情詩專輯』燒燙燙拄仔出爐，宋老師臨時興到地仔，鼓吹我唸＜百香綠茶＞，我面紅紅頭chih chih，隨徛起來講欲唸我上界感動ｅ情詩＜風雨暗暝ｅ光＞，了後，長松替我唸＜粉紅色ｅ電話聲＞，煞尾，我歹勢孤不終唸＜下晡兩點彼陣西北雨＞，予逐家鼻芳，是安怎我予文欽兄請煞中晝頓，會莩出即首情詩ｅ經過；彼屆，耀乾兄當選第二任社長。
翻轉年(2003年1月)，第三屆大會踮台南金華社區活動中心舉辦，開會通知文宣是我替耀乾兄代筆，凡勢是日子押了無拄好，若無，就是勁連兄又閣「放膽文章拚命酒」，目睭起煙lng7，給1看做3，差一屑仔就袂赴市；開會進前，耀乾兄臨時臨要叫我擔任司儀，雖罔膽(dam2)膽，猶原心肝掠坦橫潦落去，誰叫阮兩人袂輸死忠兼換帖兮；1995年雙跤初入江湖ｅ五月天，『台語文推展協會』成立彼當時，捌無幾字ｅ小弟，就敢置幾仔十人面頭前做司儀，現此時是咧驚啥物！即回，眾人推搡春凰姊做社長。
早前，因為小林善紀ｅ《台灣論》絞起一陣捲螺仔風，前衛出版社粒積淡薄仔銀兩通出《台灣ｅ文藝》，總是，一時風駛一時船，本土出版品ｅ寒冬常再冷sih sih，千金散盡了後，只偆無奈ｅ熱情；好幸，聽講因為宋老師ｅ交陪，旦仔成立無偌久ｅ印刻出版社，願意接續出版ｅ空課；阮抱著春天ｅ美夢，映望咱ｅ刊物卡成人，長松老早就將第五期『台語風景詩專輯』編好勢，嘸過，春夏秋冬踅一輪昶(tang3)，長松ｅ查某囝已經出世，《台灣ｅ文藝》煞可比野生ｅ菅芒，無人疼無人惜，置風雨中看無茫茫ｅ前景。
旦，「台灣ｅ文藝編輯室」正式成立，我嘛決定接編第八期『人權文學專輯』，即幾冬來，有《茄苳》、《島鄉》ｅ編輯經驗，閣有長松、耀乾兄、尚任、志銘兄ｅ友情助贊，我相信，我袂予逐家失望才是；置澹濕ｅ北地枋橋，今年燈光佮電火球仔四射，全國元宵燈會熱烈展開，我嘸知家己咁會赴會？今年頭一篇文章欲出世ｅ坎站，淡薄仔春光當咧參我面會。
－－2004.2.8寫置枋橋街
2004.4.10《菅芒花詩刊》革新號第三期
文章定位：
