春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

──鳳飛飛現象佮台灣歌謠

 

　　鳳飛飛（林秋鸞，1953-2012），台灣演藝文化上界有代表性的人物。

　　伊佇大溪小鎮恬恬出世，嘛佇他鄉香港恬恬過往。

　　伊往生的消息，佇往生超過四十工才對外發布，引起台灣社會特別注目，熱度贏過Whitney Houston（惠妮休斯頓）過身的報導。

　　透過電視、報紙、網路遮的媒體大量報導，引起自囡仔、少年時代聽伊歌大漢的中年人濟濟回憶。除了特出有穿透力的歌藝以外，伊頂真、奮鬥的生命歷程佮樂觀、親和、溫暖的人格特質，予人無限數念嘛產生正面的能量。

 

　　往過，鳳飛飛予人的印象，大體上是華語歌壇的紅歌星。事實上，伊佇台灣攏總出版83塊曲盤，內中包含7塊台語曲盤：1977《心酸酸──台灣歌謠1》、《月夜嘆──台灣歌謠2》、1979《西北雨──台灣歌謠3》、1982《鑼聲若響──台灣歌謠4》、1992《想要彈同調1》、1995《思念的歌──想要彈同調2》、1997《想要彈同調精選輯》。

 

　　　心肝想要佮伊彈同調
　　　那知心頭又飄搖
　　　乎伊會知影著我　滿腹的心潮
　　　心肝悶　總想昧曉

　　　心肝想要佮伊彈同調
　　　那知心情茫渺渺
　　　我對伊啥款心情　怎昧明瞭
　　　卡講也講昧得了

　　　心肝想要佮伊彈同調
　　　不擱心情悶昧消
　　　乎伊會知影著我　心頭披博跳
　　　卡彈也是單思調

 

　　這首〈想要彈同調〉由日本時代出名的周添旺作詞、鄧雨賢作曲。不而過，被掩嵌58冬後，一直到甲1992年才頭擺由鳳飛飛灌錄曲盤。參鳳飛飛合作《想要彈同調1》這塊專輯的小野回想，彼當陣鳳飛飛全精神投入，四界走揣、閱讀台灣歌謠的資料，攏總收集兩百首跤兜的台灣歌謠，唯其中選出13首製作這塊優質的台灣歌謠集。《想要彈同調1》上界要緊的意義，是佇整理、傳承久長失散的台灣歌謠頂面的史料價值佮使命感，嘛因由這個緣故，鳳飛飛踮佇歌壇的層次，大大超越其他歌手。

　　

　　鳳飛飛正式出道的時，台灣早就進入電視時代，因為所謂「國語」政策的制限，使致佇電視節目頂面演唱台灣歌謠的空間被嚴重壓縮。毋過，自細漢受老母深深影響，意愛台灣歌謠的鳳飛飛，並無因為按呢就全然屈服。伊佇前後主持的《我愛週末》、《你愛週末》、《一道彩虹》、《飛上彩虹》等綜藝節目，攏會盡量揣機會演唱有鄉土感情的台灣歌謠。了後，進一步佇1982、1983、1985三冬，以特別節目的形式，踮所謂「光復節」製作《鳳懷鄉土情》，節目自頭至尾全然唱〈心酸酸〉、〈補破網〉、〈河邊春夢〉遮的台灣歌謠，嘛用台語紹介歌謠的背景佮歌詞內面所傳達的感情。其中，前兩冬連續得著金鐘獎最佳女歌星獎。

 

    少年時代捌佇歌廳佮鳳飛飛共事的康弘、黃西田，佇台視追思鳳飛飛的節目裡講出陳年的往事：34冬前，怹被警備總部檢舉，講怹三人佇台中登台的時講「黃色的」，事實上是無影的抹烏，真正的起蒂是警總的大官數想鳳飛飛，被拒絕了後見笑轉受氣，落尾，鳳飛飛被判三月日「歌監」。續落，黃西田嘛指出：佇頭一塊曲盤《祝你幸福》大紅進前，鳳飛飛以林茜的藝名佇圓環就近的歌廳演唱台灣歌謠，這嘛參斯當時其他有名的歌星攏演唱華語歌的情形全然無像款。

 

　　鳳飛飛出身散赤家庭，初中卒業，15歲起出外趁錢飼家。因由老母的嚴厲管教、保護佮個人高標準的自我要求，佇五花十色的演藝界無被污染，一直維持樸實的初心佮良善的腹腸。儘管伊20歲跤兜就蒸甲掠袂牢，無因為按呢來迷失家己，伊對外表露出充滿自信、毋過無一絲仔驕傲的態度，牽成濟濟同業、鼓勵袂少後輩，有大明星的地位，無激大明星的派頭，對待死忠歌迷若厝裡的親人。莫怪伊過身的消息一湠開，受社會各界數念佮媒體致重的程度，全然無輸予統治者。

 

　　2011年，原底鳳飛飛按算佇台灣各地舉辦台灣歌謠演唱會，因由身軀破病、聲帶受損的緣故暫時取消，濟濟歌迷毋願退票，等待演唱會天光見日彼一工。今，鳳飛飛飛起天頂做神，意愛演唱台灣歌謠的伊，凡勢當咧曠闊的天界自在演唱〈望春風〉、〈青春嶺〉、〈滿面春風〉遮的予人數念的台灣歌謠。

 

──2012.2.19早時，數念鳳飛飛。

       2012.3.29修訂