春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

 
　　阿嘉，幾年來，若歸鄉南國，攏會聽著你的笑聲；在南鯤鯓、佳里、府城，在淡水、關渡，咱攏有相見。

　　二月廿五茉里鄉的早起，已經是台灣暗時，坐落辦公桌仔，拍開電腦，先查電子批。今仔早起有十統張，影著一張是方耀乾的，掃著顯示一半的標題：「同志阿嘉已經…」，我知影唔是好消息。批文一讀，疼通穿過心肝頭。下班轉來，唯茉里鄉拍一通國際電話去佳里興，互你的好朋友：黃勁連。透早互我挖起來，伊講起，伊歸暝傷心，食鎮靜劑，猶是睏無甚落眠；唯伊嘴裡，才知影你是感冒入馬偕病院急診。誠意外，你煞佇加護病房裡，來離開阮，我誠是唔甘。

※          ※          ※

　　今，欲佗位揣你？

　　在遙遠的北美，佇茉里鄉，想你，想你，………，你在那裡？

　　阿嘉，祝你路途平安，穩穩仔行。

※          ※          ※

　　真早道捌有一位陳恆嘉，雖然猶未見過面，總是知影你是有名的小說家，前衛的《台灣作家全集》裡，道有一本《陳恆嘉集》。咱是何時初次相見，已經歹記。可能是1994年，欲往草山的前頭段：嶺頭山莊，彼年前衛出版社佇遐辦台灣文藝營，我轉來講課。頭殼裡，另外，有咱佇南鯤鯓的影相。咱佇蚵仔寮一間餐廰飲酒喝拳的樂暢，在場有參我共款唯美洲轉來的崔根源，另外是蔣為文、林央敏，佮其他文友，彼大概是2005年二月初的台語文學營。我嘛用過你整理的資料：日治時代的台灣語文。南鯤鯓看你彼款嘴角特殊的、微微仔、斯文斯文的笑意，互我印象深刻。讀過你寫的台灣歌謠的「形式美學」，互我濟濟啟示。

　　阿嘉，2006年春四月梅雨天，咱佇關渡佫見過，彼時，你佇前衛總編輯，我去拜訪林文欽社長。當時有劉大元作伙來，咱四個人佇藝術大學的一間餐廳破讀。最後一擺是2007年九月，佇安平劍獅埕中秋晚會，出版社老板蔡金安招待的，南北文友滿埕。彼暝月光下，你參邦鎮搶脈酷；霜滿頭、伴酒意、你歌聲綿綿；金安眾劍獅，耳仔伏伏恬恬聽。晚會結束，勁連駛伊的龜仔車，載咱兩人趖過西港仔曾文溪；沿著溪北徙過磚仔井寮，月娘斟酌咱歸路；平安送你去麻豆，上統聯遊覽車互你透暝轉去台北；料想未夠，我參你，煞是さようなら！Goodbye！

　　2008年九月，我佫轉來，嘛是中秋暝，文友作伙來阮善化食日本料理。可惜，你人佇台中，無法度來，餐中，勁連拍電話加你講起；咱用伊的手機仔，有講著一寡話語，溫暖在心頭，你知我知，相約再相會。今，待何時？

※          ※          ※

　　幾工來，時時想：今，欲佗位揣阿嘉？

※          ※          ※

　　你創作，佫修博士學位，飼某囝，奔波，南來北往教學，桃李滿山坪。你離開進前幾工，我有寫一首三行詩〈美〉：若那流星畫空長／少憾歸天地／人生苦短猶堪美。人生有幸如此是恆佳！所以啊，我免特意來去揣你，台灣文學的長天裡，恆嘉，你留落來的美痕條條，條條美痕裡道有你。

※          ※          ※

　　你的小說：〈剝〉、〈仙草冰〉、〈畫自像〉…道是條條美痕。

　　你六十歳佫上成功大學修博士學位，嘛是一條可嘉的美痕。

　　你彼款特殊的微笑，我所掠著的，是一條恆久的美痕。

　　你落霜的頭殼，鶴髮八千，條條是智慧的美痕。

　　你的教學誠成功，三千桃李刻出美痕條條。

　　你做人謙虛誠懇親切，誠是美痕一條。

　　－－－－－－－－－－－－－－

　　－－－－－－－－－－－－

　　恆嘉，今夜，－－－－

　　三月三，月眉意，掛天邊；天上人間，美痕條迢：迢條痕美。

 

　　胡民祥寫佇茉里鄉

　　2009-3-3之夜