告訴我 每天都要讓自己大笑三聲．．．．有益身體健康唷！！！！

14,417愛的鼓勵 40訂閱站台

 

彼一工來細妹仔因兜泡茶話虎膦。

 

滾水沖落茶芳傳來的時陣，規身軀的細胞嘛一粒一粒綴咧興奮起來。

 

「這是大禹嶺的嗎？」

 

細妹仔講：「這是慈濟茶，頂回你送來的彼一泡啦！」

 

茶啉落喉話門開，我講：「哈！我來講一个『心照不宣』的笑話予逐家參考一下。」

 

舊年阮小妹「轉妹家」的時陣帶轉來半斤「大禹嶺」的高山茶，茶真正是好茶，不過彼支鐵罐仔卻比茶更加迷人。象牙白又閣淡薄仔偏黃的漆面，面頂嘛呣不知佗一位名家的狂草書法，寫著「太禹奇珍」四字，真有古味佮雅意。

 

「毋是『大禹』嗎？哪會寫作『太禹』呢？」

 

「反正茶好管伊是『大禹』抑是『太禹』！」

 

就按呢一禮拜未到，半斤茶攏泡成茶湯入腹肚消化去矣，紲落去發生了茶罐仔的爭奪戰。

 

阮嫷某講：「這个茶罐仔予我裝寡茶心去辦公室泡吧？」

 

「免啦！算錢予人遐無閒哪有時間泡茶？這支細支的氣密罐予你，這支『太禹』較嫷，留咧厝內招待客人的時陣比較較有『味』。」

 

就安呢，第二工「太禹」茶罐就出現佇我的辦公室囉。

 

茶鈷提在半空中，細妹一面倒茶湯一面講：「這嘛算笑話喔？」

 

「當然嘛毋是！這只不過是前提而已！不過先講一个題外故事才閣講紲落去！」

 

會記細漢彼陣無，庄內飼大豬彼咧豬哥旺的細漢新婦阿春仔，有一工透早去溪仔邊洗衫。阿春仔跔佇溪邊的石頭頂搦衫褲，手骨彼个玉環碰著溪石仔是「匡啷！匡啷！」叫，迄个聲音聽起來清脆響喨呀！

 

看著溪邊三姑六婆好奇的眼光，阿春淡薄仔歹勢將玉環剝落來囥咧另外一塊溪石頂。閒話閣較濟不管偌精彩，衫褲總是有洗好的時陣，當阿春仔起身欲離開時，阿狗嫂仔出聲講：「某人啊！你的玉環毋通袂記．．．」

 

阿春仔面紅紅講：「無要緊啦．．佮賣什細的阿婆買的．．假的啦毋值錢啦．．」

 

「假的？那有可能！恁王家是有錢人哪有可能掛假呢？拄才彼匡啷聲偌鏗賴喨呀干焦聽聲嘛知是好物．．厝內有錢嘛愛較珍惜一寡．．．」

 

眾人十喙九尻穿阿春仔一个面是紅支支，趕緊提起玉環轉身離開。

 

「聽有無？有錢人掛假貨啥人會相信？像我無田園厝宅準講掛一粒露螺，鬼嘛毋相信是真的！好！現在進入笑話的主要內容。」

 

當真有古意的「太禹」茶罐仔出現佇我的辦公室，當然其中嘛裝差不多半斤的慈濟茶，慈濟茶半斤才三百箍。彼工對校本部參加會議轉來順手蹛一罐礦泉水，順手囥一寡慈濟茶葉入去，紲落擲入去冰箱的冷凍庫。

 

下晡下班的時陣，規支礦泉水已經結凍。將結凍的礦泉水徙入去冷藏庫，心內底想明仔載下晡就有一瓶冷泡茶好啉。

 

第二工一上班，趕緊拍開冰箱一看，矸仔內猶閣有冰角咧浮，到了中晝食飯進前，猶是閣有冰角咧浮。

 

三點外小羅來維修電腦，煞予伊看著彼支「太禹茶罐」，真正驚奇講：「這真正是大禹嶺的茶葉？」

 

「耶．．你講呢？」打開茶罐仔予伊看其中的茶葉。

 

這下好勢，小羅鼻了閣鼻看了閣看，最後講：「倒一寡予我轉去泡好無？」看他神態是真正誠懇，心內底想這只是半斤三百的茶葉，你老兄感動甲這種程度，到底你是按怎看講這就是大禹嶺的茶葉呢？

 

「大禹嶺的茶葉產量少，彼種甘甜佮咱啉慣勢的凍頂烏龍完全無仝款．．．」唉哉！仝款是「太禹」當「大禹」的「烏龍」小老弟！一定是受了「太禹茶罐」的迷惑．．．。

 

「明知是稀世珍品也敢開喙討，老大我嘛毋是小氣貪吝俗人，但卻是無想欲予你，因為毋知影你泡茶功夫是按怎的程度？不過看你如此的誠意求『茶』，先予你一泡啉看覓，若會當感動才講吧！」

 

小羅提出冰箱內彼罐冷泡茶，此時矸仔內的冰角已經無存在，茶葉嘛完全伸展開來。小羅倒了一紙杯仔，才啜了幾喙突然間喙開開講：「這．．這．．大禹嶺的冷泡茶竟然．．．竟然是遮爾甘甜．．．我從來毋捌啉過．．．」

 

想看覓，這一幕若出現在《中華一番》或《烘焙王》的卡通內面，會是按怎誇張的畫面呢？

 

「按怎？這毋是茶葉的問題，而是『冷泡』的工夫，佮茶葉無關啦！」

 

「毋是！除非是大禹嶺的茶葉，若無絕對泡袂出這款的茶湯．．．這罐予我．．．」啉了「太禹」冷泡茶馮京當馬涼的小羅猶是執著咧「大禹嶺」頂。

 

「呵呵呵！無問題！佮意著予你，彼杯啉完閣啉一杯白滾水看覓！」

 

啉過白滾水的小羅，真正是爽甲強欲飛就天去，工具也無收就開著車走矣！

 

細妹仔佮因尫目瞅展甲大大蕊講：「真的？講譀古啦？」

 

真的？假的？泡茶話虎濫嘛，呵呵呵！

 

刊載於「海翁台語文學雜誌」第109期（2011.09），p.70。