告訴我 每天都要讓自己大笑三聲．．．．有益身體健康唷！！！！

14,422愛的鼓勵 40訂閱站台

 

阮阿母講：「行大路將來才有好頭路！」

 

阮查某囡佇高雄長庚出世的，唯病院欲轉來的時，經過鳳屏路佮屏東大橋，真正是行大路。

                                          

後來後生佇屏東美國仔病院出世，迄陣阮已經搬來新社區，厝少路大條。欲出院的時陣擱經過新開的自由路西路，一路攏行大路轉來到厝。

 

那真正行大路將來道有好頭路，按呢我兩個囝將來著免煩惱囉。

 

只不過兩個攏是我開車去載的，這款呣知有準算無？

 

人生的路途無法度親像大馬路迄一般直擱闊，著是親像高速公路雖然直擱闊，嘛定定發生窒車的情形。

 

人講有時星光有是月光，但是著是有人一生坎坎坷坷，敢講伊出世迄時陣，伊的序大人無抱伊行大路？

 

嘛有人一生平順輝煌騰達，紲咧擱富貴連三代。

 

那講行大路著有好頭路是真的，按呢這好額連三代的人，凡勢是佇大路上出世的嘛無的確！

 

路愈大條車愈濟，欲走緊嘛愛考慮安全問題，人生若欲成功平時著愛打拼，擱愛會曉把握機會。

 

但是重要是機會那來的時陣，敢有能力去把握才是重點的所在。

 

阮老爸自阮細漢道定定共阮講：「平時無論是讀冊抑是做代誌，攏愛認真打拚充實自己，因為機會是有準備的人的。」

 

無論你出世走偌濟大路，日後那無認真打拚，準講有機會可以富貴連三代，我看嘛無能力去掌握迄機會。

 

甘願做牛免驚無犛通拖，認命無認輸田土骨力翻，終其尾遍地攏是黃金出在你拖。

 

刊載於「海翁台語文學雜誌」第54期（2006.06），p.76。