告訴我 每天都要讓自己大笑三聲．．．．有益身體健康唷！！！！

14,417愛的鼓勵 40訂閱站台

 

因為某一種因緣，有機會來到屏東萬巒國小。

這間小學佇日據時代起建，目前已經有超過百年的歷史。

校舍已經真真舊，但是猶閣保留著巴洛克建築風格的走廊。行佇老式走廊內底，使人有一種行入歷史的感覺。

走廊的門廳兩爿邊攏有設置公告版，內面有學生的書法作品，嘛有學生為著慶祝百年校慶所寫的文章，以及學生對鄉土人文見識所寫的作品，當然嘛包括美術作品。

萬巒鄉是一个客庄，大部份的人攏講客話，但是因為時代的變遷，新的一代嘛是有人袂曉講標準的客話。

公告版內面有貼著幾落篇客話的俗語，有的真趣味，有的是看攏無。

「食飯時節官都無恁大」，想起來這應該是咧講「吃飯皇帝大」。

「鹹菜形麼人都合得」這句我猶原看有伊的意思，一般吃飯配鹹菜真好落飯，所以任何人攏會合喙，有時陣閣加幾落碗。

紲咧啥是「五熬六撐」研究半晡全無頭緒，問現場的客人朋友嘛攏幌頭毋知影。

這句「發糜花吃狗肉，爛做爛醫。」閣較心適，「爛做爛醫」譜譜仔看有，爛當然是做爛醫，但是彼个食狗肉的發糜花倒底是啥種花？

報兩个客人老師來看，兩个人治遐唸甲哩哩嘮嘮，閣參詳一睏才講：「這句話的意思是，食狗肉的人身體若好，愈食愈好，身體若無好，愈食愈倒。」

原來佮花一點關係攏無！

若共翻做台語真簡單，「狗肉扶起無扶倒」。

各種語言攏有伊的文化背景，認真較體會其實攏有伊美麗的所在。

真像這一句「金錢有來往，感情會打斷」沒錯！時常嘛聽人講「借歸借請歸請，有借一定愛還」請佮借那分袂清楚，終其尾一定拍歹感情。

尾仔這一句上趣味，免解說也會當看出彼个自在的心境。

「伯公樹下十八花，朝朝起來望水花，沒米煮，煮泥沙，沒床睡，睡天下，沒皮蓋，竹葉遮，沒菜食，食樹芽。」

「海翁台語文學雜誌」第90期（2009.06），p.62。