圖片說明：臺灣糖業公司屏東總廠，宿舍區內的糞掃桶。
這个時代有人摒糞掃桶做資源回收，資源回收變做黃金，黃金變做愛心，起病院救助眾生離開病苦。
現在愛心閣化清流，護持沒血腥暴力的清淨媒體，使清流繞地球淨化人心，以求社會祥和天下無災難。
有一跤糞掃桶親象聊齋故事中彼跤聚寶盆，會生出金銀財寶迄一般。聊齋故事中的聚寶盆，囥放入金則生出閣較濟的金，那囥銀就生出銀。
這佮以愛心做資源回收再變黃金，是完全無仝款的兩回事！
在三十外年前，透早攏有人騎著跤腳踏車載豆腐入來糖廠叫：「豆腐～油炸～～」會記彼陣，阮攏紮一塊盤仔出去買，燒燙燙白泡泡閣幼綿綿的豆腐。
迄咧時代無塑膠袋仔，菜市買菜家己帶菜籃仔，魚肉用芋仔葉佮芎蕉葉來包，彼陣嘛無資源回收這个名詞。
彼陣，摒糞埽桶是乞食佮車糞埽工人的代誌。
三十外年前是糖業公司上興旺的時代，廠來樹木真濟道路整齊，每一戶庭院門口攏有一座安文土控的糞埽桶，每工早晚攏有車糞埽的工人來清糞掃桶。
因為樹木濟所以糞埽大部份攏是樹葉爾爾，上加是刣魚仔或者是刣雞仔的腹內，但是佇彼咧『生吃都無不夠阿擱想買曝干』的時代，罕得何時有通刣雞仔鳥，魚仔腹內嘛真少。
彼咧時代，糖廠內面大大細細「長」級的職員攏是大陸過來的，臺灣話袂曉講而且甘蔗秧仔愛插壠頂抑是壠底嘛無了解，但是「長」攏是因咧做閣做甲真有派頭。
其實臺灣人勻那有二个長會當做，而且這二位無臺灣人絕對無冇法度。
一位是農場課長，一位是農務課長，包括內面的機耕股、灌溉股，這攏愛臺灣人蔗有法度面對，農場種甘蔗採收甘蔗的農場工。
究竟彼陣無外省人底做農場工。
雖然愛臺灣人來才有法度但是，這是一个肥缺毋是有能力著坐會著，你有能力別人嘛有能力幻勢閣比你較好。
迄咧時代若欲愛升等一定愛穿運動鞋，暗時愛閣行後尾門，那無只有看人歡喜升等，較好的能力猶原愛囥咧家己的被櫥抑是菜櫥仔予臭酸。
過年過節一定愛送禮予遐的外省仔長，若無永遠免想會大漢佮出人頭地。
送禮閣袂當烏白送，清彩雞仔鴨仔活跳跳無人欲，上無愛刣便便最好閣煮予好食，拄好食飯時間送到位，因為彼陣也無人厝來有冰箱，食無了會當冰。
那送煙腸一定愛黑橋牌仔，彼是百貨公司的禮盒，一定愛大新百貨公司的包裝佮外袋仔，那無送是白送的。
那遇著彼種食喫甲的拓喙齒的長官，看無佮意當場退回的嘛是有。
人講台灣人放尿攪砂袂做伙，若遇著迄種祖公仔三代燒好香加上自己運動鞋牌子好，後尾門行有透得著好地位的臺灣人，做長了後外省人的氣口猶原學佮足起工。
過年過節遐的農場工頭，相關的廠商攏會叫人送禮盒入內宿舍區，隨戶仔發送。
彼陣阮老爸是一个小職員當然無人會送，不過阮攏咧想講，送禮入來的廠商若走毋著間，送對阮兜來毋欲偌好，但是彼種代誌從來毋捌發生過。
因為阮老爸職等無懸閣貧惰送禮，甚至袂愛穿運動鞋行後尾門，因此等數一直攏無懸。就是因為等數無懸，所以閣遮的工人蓋接近，不時作伙食薰開講尻川後罵皇帝，所以捌對我講過一个聚寶盆的故事。
彼咧時陣拄好中秋節，照常遐的廠商、工頭攏叫人送月餅入來予遐大大細細的「長」，「細長」擱愛送乎「大長」，送來送去有冬時仔，一盒月餅踅一大輾閣轉來原位。
這無要緊，這會當講這个中間有人惜福，以禮送禮省去買。但是也會當講，有人看彼盒月餅無佮意，規氣共送出去。
上討債的是，有人因為太濟吃袂去，連拍開攏無就掞落糞埽桶較規氣嘛是有。
彼陣民間一般無人咧買有包裝的月餅，遐的車糞埽的工人不時中秋節攏會當佇「長仔」因兜的糞埽桶，抾著規盒好好的月餅佮甲煙腸。
因此那年節時，車糞埽的工人攏足骨力，一日早幾落擺，加走一擺過節厝內嘮真腥臊。
干但按呢，按呢就叫作「聚寶盆」那有啥稀奇？
當然毋是遮簡單！離奇是，有人月餅內面坮炸彈！炸彈？免驚這種炸彈頂面有印孫中山或者是蔣中正！
因為有這種孫中山或者是蔣中正的炸彈，車糞埽的工人毋才有興趣一日走幾落擺！
所以較骨力仔摒糞埽桶，糞埽真正是會變黃金，應該講是抾著現金毋是變黃金！
有人買送錢毋敢直接，因此藏佇月餅禮盒內，偏偏這盒月餅去予人掞落糞埽桶，煞去好著遐的車糞埽的工人。
後來有人講出來了後，這些「長仔」因兜的糞埽桶，不時攏有人咧摒，擱摒加真齊勻佮清氣。
民國七十九年左右，個人想欲去農林廳某一个研究單位上班，我治遮上班的學長真好意佮我去拜訪所長。
這位所長嘛是我的學長，伊的家後是阮老爸仝一个單位的同事。
去見所長彼陣，所長真緊張對我講：「現在學校拄好畢業的學生蓋濟，你那會無提前來講，彼時陣那有盡快來講，就無人競爭我嘛較好安排，這陣．．．我考慮看覓．．」
所長查過我進前佇遮擔任助理的資料，彼咧時陣糖廠迄爿拄好有電話來關心，所以所長叫我轉去等兩工仔會乎我消息。
欲離開萬豐的時陣，我的學長對我講：「轉去了後另外揣發展，遮免閣再想！臺灣人那會曉講國語閣做「長」，永遠袂照顧台灣人！」
「按那講？」「你用國語講彼兩句話就會當了解！」
「佗兩句？」
「．．『你那會無提前來講，你彼時陣那有盡快來講．．』．．」
原來如此！
這兩句翻做國語就是「你怎沒有『提錢』來講，你那時如有『金塊』來講．．」
可見，所長今仔日的地為是因為，『提前去講』佮有『盡快去講』所得來的！
(2003.02.24)
刊載於「海翁台語文學雜誌」第80期（2008.08），p.61。
