告訴我 每天都要讓自己大笑三聲．．．．有益身體健康唷！！！！

14,417愛的鼓勵 40訂閱站台

日月如梭，又擱到年尾廿九暝囉。

 

自咱人廿四送神了後，家家戶戶就開始摒掃清潔。厝內面鼎鍋仔、碗公、碗攏愛提出來洗，通好廿九暝煮腥臊。

 

厝內愛摒掃連門窗內外攏愛洗過，不過現在攏是鋁門窗介好洗，會記得較早細漢的時陣，是蹛木造的日本宿舍。

 

門窗攏愛用菜瓜脆佮米糠丸攄甲大粒汗細粒汗，有東時擱攄袂清去，煞尾攏攄甲窗仔框起毛起毛。

 

現在攏是鋁門窗介好洗，尤其是紗窗的部份那貧憚洗，歸氣攏換新的。

 

尤其現在工具材料攏袂貴擱流行DIY，家己攏會曉處理免去請人真方便，開幾圓仔就新冬冬啊。

 

會記得有一年，阮迄咧銀行上班的水某，上班到廿八則停睏。

 

下班轉來到厝已經暗時八點外，迄陣大家攏佇客廳泡茶開講。

 

到甲九點外伊雄雄走落來樓腳共我講，三樓的紗窗伊攏洗好啊，但是鬥袂轉去。

 

我聽一下茫一半，明明我中晝已經洗好囉，伊那會擱洗一擺煞咧擱鬥袂轉去？

 

阮姊仔講去共看一咧道知．．．

 

真正看一咧道知，呣干但是知影爾，我看一咧強強欲倒頭栽。

 

迄時陣免量我家己就知影，血壓至少有百八以上！

 

阮迄咧水某將紗窗頂面紗仔的押條仔，穩仔詳細一條一條挖起來，紗仔一塊塊拆落來，攄甲清氣仔清氣。

 

押條攏抽起來，當然嘛鬥袂轉去！

 

這聲欲安那？半暝穩乎蠓仔叮甲吱吱叫，凡勢歸箍人攏扛去都會。

 

趕緊走去五金行剪紗仔擱買押條仔，攏繃好的時已經半暝十二點外。

 

阮迄咧水某竟然講：「欲知嘛免洗甲赫艱苦，換新的顛倒水擱省洗！」

 

夠這陣伊猶擱袂清楚，紗窗到底是欲安那洗！

 

氣著提一罐SILICON共迄咧押條攏共糊起來，看伊後擺欲安那擱拆紗仔落來洗！

 

刊載於「海翁台語文學雜誌」第62期（2007.02），p.75。