告訴我 每天都要讓自己大笑三聲．．．．有益身體健康唷！！！！

14,415愛的鼓勵 40訂閱站台

細漢迄陣會記得有一工，阿爸唯庄跤鋸一支竹節轉來，講這欲作錢筒仔。阿爸將錢筒仔釘咧壁頂，擱講：「唯這嘛慢慢仔儉，到甲欲讀大學時著有夠啊。」

 

迄咧時陣見若討錢攏是一角銀的時代，生食都無夠擱想欲曝干？有啥人想欲落錢筒呢？

 

到了國中每工愛騎幾落公里的鐵馬去學校，開學了後阿爸互我十箍銀。當然十箍銀毋是所費，阿爸從來毋捌互我錢。阿爸講錢匟咧身軀，萬一鐵馬若破輪欲補卡方便。

 

破輪？奚當然嘛毋是每工會發生的代誌！

 

後來抾著一个真水的小紙盒仔，佇紙盒仔蓋面頂切出一个橫孔，當作錢筒喙儉迄十箍銀。

 

足久足久，紙盒仔裡面干但是迄十箍銀爾爾。

 

到了國中二年阿爸有時陣會互我十箍，但是猶擱吩咐愛簏錢筒仔。迄咧時陣紙盒仔總算開始入數了。但是，這陣鐵馬好親像生目睭開目的款，不時去碾著釘仔。

 

迄工身驅無帶錢，牽著破胎的鐵馬行足久才轉來到厝。

 

開始拍開紙盒每工攏帶錢，落尾紙盒內的錢攏用了了，兩條輪胎也補甲袂補得。

 

到了讀高中愛擱騎卡遠的路，禮拜六中晝嘛袂赴轉去食中晝，阿爸開始互我「零用錢」，但是只有十箍銀有夠食一碗乾麵爾爾。

 

有一工發現卡早迄隻錢筒仔猶擱釘佇壁頂，開始每工若提著十箍著簏入去，心內暗暗咧想若到年底，就有幾百箍會當開。

 

有一工同學相招，講禮拜六中晝放學了後欲去看電影。

 

以前糖廠的中山堂攏會放電影，雖然票價無貴但是規支片攏是鉸甲亂七八遭，而且迄咧座位嘛真歹坐。

 

去市內大戲院看電影從來毋捌試過呢！可是，看電影是愛錢的呀！重點是無迄咧膽開喙共阿爸討錢講欲看電影。

 

錢筒仔裡面有錢呀！家己簏的當然家己會當開呀！

 

可是此時此刻，煞毋敢為著欲看電影好膽去破錢筒仔．．．。

 

電影強烈的吸引力啟發了賊頭賊腦的智慧。

 

哈！趁阿母佇咧灶跤無閒，提一支螺絲絞，唯礁去的錢筒仔下面捅兩三下，礁去的竹節真緊就捅出一個孔。

 

只是，錢那會一直落出來呢？

 

迄頂高中帽仔已經裝袂少矣，錢猶擱鏗鏘叫直直落出來．．．原來無簏赫濟呀！天啊！這．．．到底猶擱有誰咧簏這隻錢筒仔啦？

 

看著阿母正手提煎匙咧看我，會害啦！阿爸若轉來這頓穩粗飽兮！

 

刊載於「海翁台語文學雜誌」第64期（2007.04），p.35。