肖龍年一歌詩
你今斟酌聽，聽寡唱，唱出肖龍年一歌詩。孔道台夠任未幾時，庫銀夭未夠，身邊兜並無半文錢倘使用。
隨叫：「小軍，吩咐你」，小軍聽一見，雄雄行入去，双腳疊齊跪落去
「毋知孔道台為著啥咪代誌？從頭講出寡知影！」
孔道台掠話就應伊：「寡今夠任未幾時，庫銀夭未夠，身邊兜並無半文錢倘使用
，未知小軍怎主意？」
小軍掠話就應伊：「現時帳下周維申(衣申)，伊郎真忠義」。
孔道台掠話就應伊：「現時帳下周維申，今日未轉咿，緊緊報告夫人得知影」
小軍奉令隨就去，不敢久延遲。去夠，報告夫人就知影：「寡是奉令來夠這，愛請夫人相商議。毋知夫人怎主意？」夫人掠話隨就去。
問卜：「相公喚寡妾身有啥咪代誌？從頭講出寡知影。」
相公掠話就應伊：「寡呾沒講，夫人你勿知影，寡呾今日夠任未幾時，庫銀夭未夠，思此，教你夫人呾知影。」
夫人掠話就應伊：「欠用庫銀，不使相公你掛意。」
＜只牌、丑、旦＞
相公聽說起，何必煩惱做啥咪？雖是相公欲轉咿，庫銀未夠，何用相公掛心機。軍中義人盡都有，是周維申，忠義人。何不令依去主意？何用相公掛心機。免得煩惱愁屢添。
＜只牌完備＞
相公聽著笑微微，呵咾夫人好主意。請你入內，緊著轉來為是。「待我吩咐左右去叫伊，叫周維申來參議。」寡呾令人外館去。小軍奉令隨就去，不敢久延遲。去到外館未幾時，報過周將軍就知影。
小軍奉令來夠這，「老爺請你周將軍去相見。」周維申聽著笑微微，隨給小軍說知影：「老爺有令請寡，寡就去。」去夠，見著老爺雄雄跪落去。「未知老爺請寡啥咪代誌？」
孔道台掠話隨應伊：「寡呾今日夠任未幾時，庫銀夭未夠，身邊兜並無半文錢倘使用，請託周將軍來參議！歸盤辦事好計智，未知周將軍心內怎主意？」
周將軍聽著笑微微：「庫銀未夠，不使老爺你掛意，欠用庫銀，總著對這三郊來打起。」
孔道台聽著笑微微，呵咾周將軍好心意：「你呾讚寡只代誌，朝庭國法乎你周將軍去料理。若是三郊錢銀齎來夠，感你公恩大如天。若是風調仝雨順，國泰民安太平年。我才為你入朝來奏主，大官小官封乎你。」
「老爺緊緊請入內，未知三郊一事怎安排？」
清早起來，天光時。周維申心內一時有主意。「文房四寶撒來寡寫字，奉老爺朱令去齎錢。」周維申奉令隨就去，不敢久延遲。將這三郊來齎起：齎欲庫銀兩百四，大橄店齎百二，小橄店齎七八十，婊子間齎兩百，煙土行齎三百，布店齎七十，雜細店愛齎六十四，衫仔行齎百六，米粉間齎四十，橄仔店齎三十，磁仔店齎十六，糕仔店齎十二，若是店頭齎完備，將者市場來齎起：肉店齎二箍，魚架齎箍二，賣菜齎兩百，飯桌仔齎三百，糶米齎百五，賣番薯齎五十，擔柴齎三十，換錢糧爐夫齎兩仙，檳榔桌齎一百，賣肉骨齎六仙，扛轎齎十六，擔屎齎十錢，做乞食取六文。出入城：查某郎齎十文，查甫郎齎十二，錢銀齎完備，合共一萬八千四，若是開毋到空，行過路齎來添。緊緊報過老爺得知影。
清早起來，天光時。三郊啣恨周維申：「卵葩無道理，你呾怎可錢銀乎伊來清齎去！」三郊頭、五大姓，相招眾百姓來參議。「未知眾百姓心內怎主意？」眾百姓聽一見，真勿願。一時傳批佮謀反。百姓傳批隨就去，不可外人得知影。這事你來都完備，自伊孔道台、周維申來講起：「孔道台作官貪財利，謀依周維申去齎錢，合共齎有一萬八千四。」五條街，喝罷市，五大姓、眾百姓，心內主意。頭鬃拚力纏，手腕直直別，小刀仔胸前連栽五六枝。「毋著莫，欲著做必是。」有事三郊頭家擔起起。
清早起來，天光時。三郊頭、五大姓、眾百姓，一時有主意。八城門，貼告示，一時謀營隨就去，將這个奸臣來砰死，順嗦刺槍：啥咪郎好膽，刺乎死；毋膽，褲底沙沙滴。今仔日奸臣周維申，頭殼敢會打不見。
孔道台看見周維申，齎錢隨轉去，暢心佮歡喜，呵咾周維申：「嗸辦事，好計智！若是有日太平年，感你公恩大如天。」
周維申掠話隨應伊：「寡呾做你一手下，朝庭國法乎寡來料理。」孔道台聽著笑微微，辦買酒莚暢飲來吟詩。孔道台、周維申，暢飲吟詩未幾時，郎報反軍賊馬滿滿是，賊馬溜溜去溜溜行，行夠衫行口就安營，等待今夜三更時分才來行。眾兄弟等一下隨就去，掠欲周維申受凌馳。去夠，看見大門開離離：有郎就欲跩，有郎就欲拍，有郎欲拏錢，有郎欲拏物，有郎毋覷小，有郎斬店窗，有人夯椅條，有人夯皮箱，有郎捲衫褲，有郎夯棉被，有郎捲草席，有郎扛大櫃，有郎夯椅桌，有人捧香爐，有郎掀桶盤，有郎夯門枋，有人搬銅鐘。搬到內面空空毋半項，有一个囝仔兄，掺郎欲拏物，拏毋物，對新房仔內溜溜行溜溜去，去夠，看見一个屎桶紅記記，雄雄夯起來隨就去，郎郎問：「你囝仔兄，你呾夯這个屎桶值啥咪錢？」伊嗦一時見笑，緊緊抦落去，也有五百箍白記記，乎伊作工錢。
清早起來，天光時。眾百姓請欲三郊來參議，欲掠周為申，尋不見，就給依物件收了離。未知三郊心內怎主意？三郊聽一見，心內一時有主意，拏欲紙筆寫批時，一批寫來都完備。令會走朱傳批隨就去，走朱傳批著細膩，不可外人得知影。今夜傳批透夜去，報過戴萬生得知影。去夠，看見戴萬生，就給我批信獻乎伊。
戴萬生看一見，掠話就問伊：「看你會覓我名字？」小人掠話就應伊：「寡呾有聽阮本帥有說起，講你兄前有為記，正是戴萬歲你名字、戴萬歲你名字。」
戴萬生聽著笑微微，就給批信打開看一見，暢心佮歡喜。眾百姓、
五大姓、三郊頭，招伊謀出一代誌，戴萬生一時有主意，一時謀營甲擎旗，擎有黃旗青旗紅旗烏旗白旗滿滿是。擎起戴萬生伊名字。戴萬生一時謀出天地會(添弟會)，呼欲走朱去傳批，傳有頂到三省，矮到瑯嶠，頂淡水傳到下淡水，東西南北傳照知。
北毋嗸人作先生，就這庄中來此起主師。戴萬生大哥為元帥，埤仔頭領先鋒，阿里港響叮噹，阿猴去拍洞，東港去拍乒乓，石公坑真正奇，白牡丹作細姨，新埤頭煙吞卻，新庄作大某，七塊厝擋不可。
＜丑白不盡＞
大林浦有咱郎，有摧咱一萬八千四，塭仔牢頭就置論，赤竹就置咒，相思冤就置驚，林投湖就置論。苦楝腳、田草崙、莿蔥腳、空地仔，聽一見，暢心佮歡喜，相招就欲去。去夠田中央，前也厝，後也厝。
＜丑白、旦白、不盡白＞
頂後庄、矮後庄，問知影，相招就欲去。去夠埤單牢腳，遇著七老爺，招欲今夜時分才來行，行夠赴依戴萬生，可合營。
清早起來，天光時。戴萬生相招就相議，眾好漢聽一見，頭鬃拚力纏，手腕拚力別，就這傢俬喬齊備，隨時就欲去，旗后置伺候，大港三塊厝。
＜丑白、旦白、不盡白＞
大慘倒退噜，熊獅佮人馬毋幾百，聽一見，牛稠埔趙仔辦，真正興、真正興，想欲入大哥，可頒令。赤山崙真和合、真和合，有換旗、毋換刀，勿敢出真名字，今夜時分才來去，戴萬生即時三月初好日子，傳有批照通知，眾好漢入內領令旗，相招就欲行，行到矮圍秀臼城，遇著三棚亂彈戲，一棚扮作郭子儀，一棚扮作郭華買胭脂。
清早起來，天光時，天光時。戴萬生點兵，人馬總萬千，議欲二十名郎可頒令，會合邱志高，欲領兵，有兩千。
邱元涼領兵有兩千，發令就起行，簡天保、簡天生，兩人領兵有四千，點兵就起行，赴欲今夜可合營。會合王仔程、王定法，兩人領兵有四千；會合張文老、林進達，兩人領兵有四千；會合商法海、蔡阿發，兩人領兵有四千；會合蔡義吉、林阿三，兩人領兵有四千；會合許丁為、許丁保，兩人領兵有四千；會合許丁貴、許丁完，兩人領兵有四千十六名；眾兄弟領兵三萬二，點出就起行。行到今夜三更時分，欲打彰化城。欲打彰化想毋久，一時發兵先打葫蘆墩。眾兄弟去夠未幾時，看見大門開離離，也有郎隨咧走，也有郎隨咧閃，也有郎隨咧逃，城外郎看一見，暢心佮歡喜，城內殺總理，四拐五曹，六拐共九曹，四郭尋總毋。富戶郎隨咧走，作官郎隨咧溜，店頭郎驚佮面憂，掠著馬老爺順嗦挫嘴鬏。有郎尋過來，有郎尋過去。有人欲刣郎，有郎愛拏物，有郎愛挐銀，有人愛拏錢，有郎隨置趖，有人隨置躍。戴萬生一時收軍就起行，隨時就安營，候欲三月十八日，欲攻彰化城。
王得曾呷飯三千股，陳元德講伊守城虎，楊目丁毋錢得大股，許保成豬屎魯，洪花好尹某，大腳程是伊也踏頭某，牽豬哥，賴豬母。
＜丑白、旦白、不盡白＞
邱志高、黃志畝，透夜就起行，行過牛肚腸，遇著番人潘米定。看一見，就問伊，隨教林仔郝來參議，相招今夜三郎來走監。總著是，走夠郭大風家中安身去，郭大風勿敢乎伊取，佮伊搏性命。總著行，今夜三郎走出城。走出城外牛稠埔，遇著一个六大老，參伊嚴仔辦真正好，佮伊一咧喝，贈伊白銀三百圓。齎過手，毋甘呷，毋甘用，毋甘作身穿，隨時夠頂司去領令。令旗領落來，遇著戴潮春查路刣道台。一咧刣，兩咧刣，天地多未平，孔道台頭殼做兩爿，「今日做有這事，正是周維申你今做得，今日割肉刣頭真合該。」周維申、孔道台刣一死，眾人暢心佮歡喜。周本縣、夏大老死了罪過，隨時點兵攻彰化。
清早起來，天光時，天地有乖意。清天白日雨淋漓，眾好漢勿敢去。一營平埔番勿驚死，透雨去。去夠身拍路、矮竹圍、田中央、五江水、塭牢腳，盡落簡家庄。
＜丑白、旦白、不盡白＞
隨時就起行，行到赴欲元帥可合營。候欲三月十八日，欲攻彰化城。眾兄弟看一見，大門開離離。夠呾連得五六枝，大銃小銃滿滿是，銃子拍著腳腿邊，拍著馬老爺毋身屍。
＜丑白、旦白、不盡白＞
八城門，破一開，異民、將、勇死死大畚堆。
清早起來，天光時，混濁不分男佮女，觀見水清老盤魚。戴萬生出來就講起，伊呾連拍三陣過，未知啥咪郎倘收尾？
掠恁呾：「眾兄弟就起行，隨時欲回營，勸奉眾兄弟，咱小錢銀就去趁，思去思前，共處意完備。」
文章定位：
