24h購物| | PChome| 登入
2016-09-29 17:23:07| 人氣836| 回應8 | 上一篇 | 下一篇

森家瑣事（兩則）…

推薦 0 收藏 0 轉貼0 訂閱站台

停電、停水、停廁水…

哈哈哈…好彩唔係同一時間發生啫！！

晚上寫嘢的時候，全屋開著的電器突然熄了，當然燈都熄埋啦～漆黑一片，森諗：停電？！…大廈又冇貼告示喎？！過咗好幾秒後又突然光番～可能係電路問題啫，既然都冇嘢就費事深究…一般情況的停電大廈都有通知！不過通常都係閒日上班時間才會停電，嗰段時間對住戶影響最少卦！其實耐唔耐都會停吓水、電、廁水，電就比較少…對於現代港人嚟講已經變成曳曳豬…縱壞晒！！是但冇一樣都唔習慣！森伯又未經歷過「樓下閂水喉」的制水時刻，所以都未必領略到冇水用的苦況，冇銀紙使嗰啲水就經歷得多…><

三樣比較，應該冇廁水影響最唔大！最多倒夜……諗諗吓都未必頂得到太耐～～～所以有時講咩過簡約簡樸的生活，對用慣嘆慣的都市人都未必咁易～

 

寵物小精靈…

唔知大家對呢個捉精靈game的熱情退減未？！我自己就完全冇玩過…只因真實版的寵物小精靈仲刺激……有日清晨時份拎毛巾的時候，忽然有隻小小的身影竄過，森諗曱甴應該冇咁快，似是四腳蛇嘞～後來開燈一睇見到四腳蛇竄到梘盒旁…搬嚟咁耐四腳蛇都係第一次見！照計新型大廈應該冇四腳蛇之類…當晚再見到佢！於是就捉個正著KO埋佢！哈哈哈～只係掉咗出窗啫…跟住第二朝在廚房，再見到第二條四腳蛇…森諗唔係呀！咁多！！！因為佢停止不動，所以有機會望望四腳蛇的真面目，當望真又唔係覺得太驚…始終四腳蛇行動快速，便竄走了，可能四腳蛇係益蟲，近排啲曱甴仔又好似冇乜喎……


當時來不及攞個相機影相，唯有在這裡畫張插圖加少少創意做張圖吧～

昨日睇報紙先知愛民邨都有鼠患，照計老鼠真係驚百倍，估唔到今時今日仲會有鼠患，當中的居民應該幾頭痕…

我要檢舉
#生活日誌#停電停水#蛇蟲鼠蟻#屋企瑣事
台長： 森源

您可能對以下文章有興趣

人氣(836) | 回應(8)| 推薦 (0)| 收藏 (0)
全站分類: 心情日記(隨筆、日記、心情手札)

我要回應
基爾
無電和無水都麻煩....咁有冇check過係咪自己電掣有問題定全幢大廈都係咁?
可能真係你屋企多小蟑螂,有足夠食物所以有咁多四腳蛇來搵食XXD
2016-09-29 18:06:25
版主回應
當然喇~~無電無水頭號唔方便…其實前晚停咗好少時間咋！相信唔係大問題，可能大廈的電路引起～如果停得耐就擔心…

唔好講到好似檐蛇患咁，暫時只係見過兩條咁多啫！未見檐蛇前都已經冇乜曱甴仔…
2016-09-30 09:40:40
ykk
森夜冇電, 會另森驚膽震！好彩都係虛驚一場。
2016-09-29 22:48:30
版主回應
咁又冇乜森驚膽震，停電時間好短，打個嘿嗤就有返電…哈哈！除非太耐都冇就驚…
2016-09-30 09:41:19
搞一爺
我度每三年都檢查電力系統一次，閂大掣睇時果5個鐘會冇電畀水泵同升機降，咁就4斷，斷電、斷水、斷咸水、斷升降機，個雪櫃嘅食物要清曬佢，最慘係夏天連風扇都冇熱到溶解，要逃離家園。

都有近叁拾年冇喺屋企見過檐蛇同老鼠，好幸福呀！不過，試過工人姐姐送大禮，帶埋木蝨一齊來，捐血成身痕癢又冇覺好瞓，攪到我成頭煙，用咗2種方法都冇效，最終出動化學武器對付佢班畫伏夜出嘅嘩鬼至得，仲要連續噴殺2年，因為蛋蛋唔怕我嘅武器，第二年初夏又孵化，真係好似 《異形》揾人寄居咁恐怖架，如果有日森伯時運低碰到呢班嘩鬼我可以過番2招畀你。祝你時時都好運啦！
2016-09-29 22:49:00
版主回應
咁都起碼有通知，可以預先做定準備功夫…以前停電多數影響升降機，不過現在分開電源，就算大廈停電，升降機都照常運作，始終怕有緊急事情要用到升降機嘛～逃離家園……咁你咪有藉口同另一半講唔番嚟瞓～哈哈哈！講笑啫，我諗你會同佢一齊住吓酒店，乘機當渡假…

其實以現在的衛生條件，屋企有老鼠就好唔尋常～不過木蝨、跳蝨真係幾得人驚，就算早前講美國人（咁先進）都有蝨患…至怕就係野火燒不盡，春風吹又生！始終環境潮濕有蝨都唔奇，原來要搞咁耐先至清走啲蝨架？！咁你下次請工人姐姐駛唔駛隔離幾個星期先準入屋呀？！……真係惹咗蝨都幾頭痕，希望唔好遇上…
2016-09-30 09:41:52
ohtria
咦?我資深過你喎. 我有印象細個時有制水,唔可以日日沖涼呢.
2016-09-30 05:12:18
版主回應
同資唔資深都冇乜關係，直到現在都間唔中會停吓水，不過好快就恢復番～可以如常洗白白…
2016-09-30 09:46:20
stella luk
停電影響最大，冇冷氣不重要，冇洗衣機一定不可以了！
2016-09-30 08:50:13
版主回應
冇洗衣機反而重要?!!........通常洗衣機唔會日日開~~
總之對用慣的港人來講, 好似冇乜都唔得~~
2016-09-30 09:46:51
狂小子Time Is Changing
我琴日都係，停電停水停鹹水，勁唔方便！
2016-10-02 01:02:20
版主回應
咁咪名符其實百冇…我哋通常只冇一樣，三樣停晒真係好唔得……
係喎，你啲鹹水喉攪掂未呢？
2016-10-03 10:41:55
ka ka
如果忽然冇水同電都好煩！
我試過冬天冲冲吓涼個煤氣爐壞咗無熱水，為有用冰冷的凍水冲涼，都幾滋味架！哈哈！
人地喺你屋企本來成雙成嚉的生活緊…
你做乜拆散人地呀！
唉！攪到那隻壁虎來了我的家。
2016-10-05 09:06:50
版主回應
又好少斷水斷電,多數只係停一樣...對我來講應該冇水最煩~~
咁又真係幾慘凍的經歷喎!!如果畀我會用屋企啲飲用熱水蘸滿條毛巾抹晒啲梘泡算嘞~~~

係架!!可能對檐蛇係一對情侶都唔定,一隻唔見咗另一隻出去搵佢...（森伯呢個老人家幾時都係諗多咗～哈哈哈）

其實壁虎係益蟲，有時不需要吓吓趕盡殺絕，有佢哋可能屋企少啲蚊蟲曱甴..
2016-10-05 09:34:05
ka ka
自從果次之後，我就諗住計劃曰曰冲凍水涼，夏天還可以，但，冬天真係好難，習慣了很難改！
講真架！我屋企最近也有璧虎出現呀！
2016-10-05 10:05:47
版主回應
沖凍水涼夏天會幾舒服…若果冬天真係頂唔順架~~不過久而久之體魄會幾好,唔怕凍之餘仲少啲病…不過老人家森伯真係試唔到…

咁啱?!!...我都係最近先見, 你住起我隔離??!!!...哈哈
2016-10-05 11:27:50
否 是 (若未登入"個人新聞台帳號"則看不到回覆唷!)
* 請輸入識別碼：
請輸入圖片中算式的結果(可能為0) 
(有*為必填)
TOP
詳全文