「森」情小品文 ...

323愛的鼓勵 505訂閱站台

冇抱有任何期望，往往就會有意外收獲…

國貨公司有層專賣陶瓷，最正的地方就係睇啱喜歡的，你就可以將他搬（買）到家中…一向覺得西方陶瓷予人感覺比較高尚，通常比較名貴，但國內陶瓷就比較貼近民間，而當中的題材也很生活化，從陶瓷裡就可以看出，當時的民間風俗、歷史、宗教、生活、哲理…所以識得欣賞的就會覺得相當有趣味性～

又到森老伯拋吓書包的時間：記得（唔係上網摷料架！）國內的陶瓷都有啲地方比較有名，包括石灣以及景德鎮，記得石灣多數以陶像為主（有名的石灣公仔），而景德鎮就以瓷器為主，以做各種生活器皿（即係碗碗碟碟，花樽等）！…

陶瓷多數以民間生活為主題，通常都會以農村小孩，小動物為多～

呢種陶瓷就係有名的交趾陶，未真正見過真身，見到真正的顏色相當鮮艷，多以做瑞獸（龍、麒麟、龍龜等等）為主…大約三、四吋高的交趾陶都唔平，而且手感都好有重量架！



陶瓷點都唔少得充滿禪味的主題，可愛的小和尚就能道出人世間的哲理來！唔知你又領悟到多少？！

同場都聽到有人講，呢度幾多嘢睇！…我都認同～而家好少公司可以成層賣陶瓷，有些藝術陶像仲有成個人咁高～我就買了一件懷舊工藝品…不過就算唔買東西當觀賞都好值得…

仲有…初時以為唔畀影相，當我拍攝的時候，後面就見到一位公司售貨員，佢又冇遏止唔可以影，而且又可隨意親手觸摸陶瓷的質地呢…既然咁友善！所以點都要幫佢推一推啦～

另一層賣畫具，不過當日畫具就唔太多見，宣紙、國畫顏料等當然唔少得，而最吸引就是這些畫冊，因為是臨摹範本，即是大師級水準的畫作，有佢做工具書，應該容易學到一手好畫，話明工筆畫，點都唔少得花鳥畫…

仲有工筆動物畫，想知一幅畫作怎樣形成，內裡有講…

老虎，野狼的猛獸唔會畫得面目猙獰，工筆作品總有種自然和諧感…

唔錯！行公司之餘又可以欣賞吓藝術！唔講係行緊公司，仲以為去咗陶藝展覽館…哈哈