花開花謝＠星光.月光.日頭光｜PChome Online 個人新聞台

2003-05-26 09:53:42| 人氣529| 回應0 | 上一篇 | 下一篇

花開花謝

推薦 0 收藏 0 轉貼0 訂閱站台

窗外彼對粉紅仔色e 蝴蝶蘭，已經開1段真長e 時間，逐工伊攏妝sui sui，好親像2隻蝴蝶 teh 飛仔飛，hou阮e 生活濟濟歡喜，加添美麗。

昨暗阿姊敲電話來，ka 阮講大姨往生e 消息。想著大姨e 好，想著以後無法度擱看著大姨e面，無法度擱聽著伊e聲，阮歸暝無話，心悶。

今仔日透早，看著窗外彼對活跳跳e 蝴蝶蘭，煞變作2 chhop lian 去e 花蕊，1時真be 慣勢。伊用頭犁犁e 姿勢告別人世，若 m 甘來離開阮。lian 去e 花蕊m 願落地，是m 是思念昔日e 風華，m 甘離別？m 知按怎，阮提ti 手nih e鉸刀，煞鉸be 落去。

我1向m 是多愁善感e 人，煞雄雄想著紅樓夢內面黛玉葬花e 情景，「儂今葬花人笑痴，他年葬儂知是誰」，黛玉情深，m 甘看花蕊落地任人thun 踏e 狼狽，1瓣1瓣拾作堆，埋葬作伙。擱想著伊家己彼蕊苦命花，煞目屎流目屎滴，珠淚澹衫ki 。

我m 知蝴蝶蘭汰hiah 呢tu 好，揀這工離開阮？是巧合？抑是花仙子想beh hou阮啟示，安慰阮e 傷悲。

花開花謝，是自然界巧妙e安排，花謝是1種完成，完成伊美麗e 任務。m koh ，年年花開，開e 花已經m 是原來彼蕊，阮掩面吐大喟。

有生有死是造化e 安排，m koh，人離開了後，擱來e 已經 m 是原本彼個，情感ma 無相仝。才知影原來死亡hou人傷心難過，是被強迫接受kap 所愛e 人，從此切斷各種關連，無任何準備。若想著所愛e 人雄雄從此ti 世間消失，永遠無法度擱看著伊e人影，幾個人be 心痛，be 傷心落目屎？

大限啥物時陣來，無人料想會到，只有更加珍惜人kap 人e 緣份，好好對待身軀邊e 人，減少遺憾，我想。

2003.05.23

我要檢舉

台長： A-chiak