921大地動，是全台灣人e5 1場惡夢。Hit 年1999年，我家己1e5 人toa3 ti7 竹東，9月21日hit 1工我chiann5 暗睏，睏到半暝，1陣天搖地hainn3 ，ka7 我搖醒，我倒 ti7 2樓e5 眠床頂，聽著1樓灶腳khi- khi- khok-khok e5 聲，看頭殼頂hit pha 電火hainn3 來hainn3 去 ka2-na2 giong7-beh 摔落來。「搖kah chiah-nih8 大，m7 是滾sng2 笑」我心內起煩惱，m7 知厝內面e5 人有要緊無？taN震央m7 知ti7 叨位？將會造成啥物災情？我gia5 手電a2 ka7 厝內滿si3-ke3 巡巡leh ，佳哉無啥物損失。我聽著外面1台1台車發動、hiong5-hiong5-kong5-kong5 駛離社區e5 聲，空氣中充滿不安e5 騷動。想欲kap 厝裡e5 人聯絡，chiah 發現電話、手機a2 通訊全斷，hiong5-hiong5 有1個想法浮現腦海，「若真正有1工天崩地lih8 ，咱會凍走去叨匿？」
921對台灣造成chiann 大e5 災害，1暝之間大樓倒去，1暝之間奪走真che7 人e5 性命，南投是主要e5 災區，阮故鄉雲林ti7 南投e5 隔壁， ma7 受重傷，尤其是草嶺山區嚴重崩山，走山造成 2 個部落完全消失，20 goa7 人遭受活埋，飛山走石e5 結果，土石斬斷溪水，chiann5 作1個面積有180公頃、水深50米e5 「新草嶺潭」。出入e5 路面震kah 碎糊糊，連草嶺e5 大飯店ma7 受損害，甚至有部分建築倒去。
草嶺舊名號作番坪a2 坑，hou7 群山包圍，是一個典型e5 盆地，海拔ui3 1750公尺到450公尺。我擱會記智第1pai2 去草嶺，是ti7 我國校a2 e5 時，過年歇睏，阮坐ti7 屘姑丈平常載菜e5 貨車，1路hainn3 去草嶺，hit e5 時陣猶未敷點a2 膠路，1大陣gin2-a2 oan7-na7 sng2 oan7-na7 食si3-siu3 a2 ，雖然hainn3 kah kha-chhng giong7-beh pit 作2 peng5 ，猶原感覺真心適。
草嶺地勢高低曲折，形成十分特殊e5 景觀，有真出名e5 美景--- --蓬萊水chhiang3 、斷崖春秋、斷魂谷、峭壁雄風、同心水chhiang3 、田蛤a2 石、奇妙洞、水濂洞…。阮國中畢業晉前e5 公訓活動，就是去峭壁雄風練膽、練體力、學習團體合作。阮ma7 bat 1個人騎著家己tu2 食頭路趁錢買e5 50 a2 ，去斷崖春秋體會滄海桑田e5 悲涼。戀愛e5 時，阮招男朋友作伙去探訪會凍kap 美國大峽谷比pheng7 e5 斷魂谷，作伙散步去同心水chhiang3 ng3 望會凍仝心，去看水濂洞…奇妙e5 大自然e5 傑作。買車了後，阮ma7 bat 招媽媽去華山、樟湖、草嶺風景區chhit-tho5 ，斯當時車路已經不止a2 大條。
今年5月初，阮尪仔某招媽媽作陣來去草嶺行行leh，這是阮ti7 大地動了，第1pian3 去草嶺，阮想欲chhiau-chhoe7 阮青春e5 kha跡，想欲看伴我成長e5 草嶺變作sia2 mih 面貌。阮ui3 斗六經過桶頭，ti7 桶頭弔橋，阮看著尾蝶復育e5 khang-khoe3 the 進行，ma7 看著真che7 在地人ti7 清水溪泅水，gin2-a2 ti7 水邊、石頭邊褪剝裼sng2 水，人kap 大自然chiann5 作1幅美麗e5 圖，充滿和諧kap 歡樂。濁水溪e5 上游之1- - -清水溪，溪水親像伊e5 名hiah 呢清氣，我想著杜甫e5 詩句『在山泉水清，出山泉水濁』正港1sut a2 著無m7 著。
阮來到草嶺大飛山『觀震台』，眺望世界級e5 大飛山奇景，921 天搖地動，短短15秒鐘內，將山nih e5 khia7 家hainn3 去6公里遠e5 所在，飛去雲林古坑kap 嘉義梅山e5 交界，有人講笑ka7 號作『落跑山』。這項驚人e5 飛行紀錄，hou7 原來e5 斷崖春秋kap 斷魂谷化為烏有，in 因為崩山而誕生，ma7 因為崩山而消失，m7 koh in 猶原封存ti7 我e5 記智中。
百年來草嶺歷經4、5 pai2 大規模e5 崩山，tak8 pai2 攏造就了全球出名e5 特殊景觀，921大地震，造成新草嶺潭堰塞湖，是台灣最大e5 天然湖。當大家攏the 討論「新草嶺潭」e5 存、廢，討論kah 熱phut phut e5 時，天公伯a2 早就有伊e5 計畫。水利處評估新潭a2 差不多有10 goa7 年e5 壽命，縣政府決定ng3 觀光發展，ma7 lok 真che7 錢落去。M7-koh，人算不如天算，新草嶺潭因為尾a2 e5 『桃芝』、『納莉』風颱，帶來嚴重e5 土chhoah 流，湖面na2來na2 細，水na2來na2 淺。阮khia7 ti7 3號碼頭，聽生態解說員用真端的e5 台語講潭a2 e5 變化，伊講著潭a2 ui3 50 goa7 米深到taN chhun 5、6 米e5 深度，伊手比遠遠e5 半山腰，ka7 阮講hia 是過去坐船游湖上船e5 1號碼頭。伊笑笑a2 講出伊e5 感慨：「新潭a2 是天公伯a2 造e5 ，無幾年天公伯a2 著beh 收轉去a2 」伊e5 話充滿哲理，我相信對chit點伊有深深e5 人生體驗。根據專家表示潭a2 真有可能ti7 今年中秋著會乾了了。比日月潭大2倍e5 新草嶺潭短短無5年著欲消失a2 ，青leng3 leng3 e5 湖，翡翠般e5 色水，樹枝坦攲、坦橫ti7 giong7-beh 消失e5 湖區，白鷺鷥飛過闊闊e5 沙洲，有1種殘缺e5 美感。原本hou7 新潭a2 e5 湖水淹1半卡加e5 峭壁雄風，chim2-a2 koh 『全都露』a2 ，看來天公伯a2 真愛kap 人滾sng2 笑。
生態解說員講soah 了後，招呼tak8 家ti7 阿婆a2 e5 擔a2 位sio 坐１下，日頭赤炎炎，來１杯酸酸甜甜冰涼e5 oh- io5 （愛玉）正港是天大地大e5 享受。Ma7 有人ka7 阿婆交關阿婆家己sinn7 e5 梅a2 轉去作等路。苦茶油、香菇、山粉圓攏是草嶺e5 名產。阿婆a2 雖然有歲a2 ，動作猶原真liu2-liah8 ，精神ma7 真好，問伊平常生理好無？伊笑笑a2 講：「平常無人客來，拜六、禮拜我chiah 來作生理，托tak8 家e5 福，生理擱未bai2 」。阿婆a2 笑微微e5 面容，樂觀e5 生活態度，真使人感動，m7 koh 滿面e5 皺痕，用無言訴出伊e5 滄桑。
草嶺風景區e5 觀光業曾經chiann5 chhia-iann7 ，大地震、風災了後，tauh8-tauh8 a2 hou7 人 boe7 記伊昔日e5 風華，消失e5 人潮hou7 草嶺１個喘氣、歇睏e5 機會，hou7 伊洗盡繁華，恢復素樸kap 自然，各種鳥a2 啾啾叫、尾蝶a2 、膨鼠、暗光鳥甚至是蛇，ka7 草嶺妝kah 鬧熱phut-phut 。轉去e5 路nih ，阮看著２隻lah-hio5自由自在ti7 開闊e5 天頂，展翅飛出伊幽雅e5 姿勢。路邊e5 油桐花開kah sui2-tang-tang ，m7 知siann2-lang5 ti7 綠色e5 地毯頂頭，ia7 １ian5 白siak-siak e5 雪。
每回親近大自然，造化e5 力量攏hou7 我深深e5 感動。華語有１句話講：『人定勝天』，人定勝天e5 思考模式，傳達出人類『唯我獨尊』e5 壓霸，表現出人類對造物者kap 大自然e5 無尊重，ma7 反映出人e5 自大、狂妄，人e5 無知、淺腳，不如台語hit 句俗語：「人gau5 ，天作對頭」有深沈e5 反省。人kam2 有需要假gau5 向天挑戰？甚至正港認為家己比天卡gau5 ？我愛peh 山，每pai2 當我khia7 ti7 山頂，我感受e5 m7 是征服hit 座山e5 了不起，是peh 山e5 過程，用堅強e5 意志戰勝家己e5 軟chiann2 ，克服人貪圖安逸e5 noa2 性，hit 種情操kap 行動真值得人o-lo2 。khia7 ti7 山頂，我感覺人是hiah 呢渺小、性命是hiah 呢a2 有限，kap 浩瀚e5 宇宙相比，人是何等卑微？啥物時陣人類願意謙卑面對家己，面對人間種種，願意尊重任何性命親像家己e5 性命 ，了解佛家講e5 眾生平等e5 真義，kap 萬物和諧共存，人間將會是仙境，是新天堂樂園。
2004.05.07 ti7 清源山 石壁寮
文章定位：
